ଭୁବନେଶ୍ୱର,୨୬।୬(ବ୍ୟୁରୋ)/ ପିପିଲି (ସ୍ବ.ପ୍ର.): ଦୀର୍ଘଦିନର ପ୍ରତୀକ୍ଷାପରେ ଭୁବନେଶ୍ୱରରୁ ପିପିଲିକୁ ଆରମ୍ଭ ହୋଇଛି ‘ମୋ ବସ୍’ ସେବା। ଗୁରୁବାର ସକାଳେ ପିପିଲିଠାରେ ବିଧାୟକ ପ୍ରଦୀପ ମହାରଥୀ ପତାକା ଦେଖାଇ ଏହି ସେବାର ଶୁଭାରମ୍ଭ କରିବା ସହ ପ୍ରଥମେ ଟିକେଟ କାଟି ସେଥିରେ ଯାତ୍ରା କରିଥିଲେ। ପିପିଲିକୁ ମୋ ବସ୍ ଚାଲିବା ଦ୍ୱାରା ସ୍ଥାନୀୟ ବାସିନ୍ଦାଙ୍କ ସମେତ ଛାତ୍ରୀଛାତ୍ର, ବରିଷ୍ଠ ନାଗରିକ, ସାମ୍ବାଦିକ, ଶ୍ରମିକ ଓ ପର୍ଯ୍ୟଟକ ବିଶେଷ ଉପକୃତ ହୋଇପାରିବେ ବୋଲି ସେ କହିଥିଲେ।
କ୍ରୁଟ ପକ୍ଷରୁ ମିଳିଥିବା ସୂଚନାନୁସାରେ, ଭୁବନେଶ୍ୱର-ପିପିଲି ରୁଟ୍ ନଂ.୩୩ରେ ମୋଟ ୪ଟି ବସ୍ ଚଳାଚଳ ପାଇଁ ଅନୁମତି ମିଳିଛି। ମାଷ୍ଟର କ୍ୟାଣ୍ଟିନଠାରୁ ସକାଳ ୭ଟାରୁ ପ୍ରଥମ ମୋ ବସ୍ ବାହାରି ପିପିଲି ଅଭିମୁଖେ ଯାତ୍ରା କରିବା ସହ ଦାଣ୍ଡମୁକୁନ୍ଦପୁର ବାଇପାସ ଛକ ପର୍ଯ୍ୟନ୍ତ ଯିବ। ସେହିପରି ପିପିଲିରୁ ୭ଟା ୩୦ରୁ ବାହାରି ମାଷ୍ଟରକ୍ୟାଣ୍ଟିନ ଫେରିବ। ପ୍ରତି ୪୦ ମିନିଟ୍ ବ୍ୟବଧାନରେ ଗୋଟିଏ ବସ୍ ଚଳାଚଳ କରିବ। ପ୍ରତିଦିନ ମାଷ୍ଟରକ୍ୟାଣ୍ଟିନ ଷ୍ଟାଣ୍ଡ୍ରେ ବସ୍ଗୁଡିକୁ ସାନିଟାଇଜ୍ କରାଯିବା ପରେ ସେବା ଯୋଗାଇବ ବୋଲି ଡିପୋ ମ୍ୟାନେଜର ଆଶୁତୋଷ ନାୟକ କହିଛନ୍ତି। ଅନ୍ୟପକ୍ଷରେ ଯାତ୍ରୀଙ୍କ ନିମନ୍ତେ ନୋ ମାସ୍କ, ନୋ ଏଣ୍ଟ୍ରି କଟକଣା ଲାଗୁ କରାଯାଇଥିବାବେଳେ ଅନଲାଇନ୍ ଟିକେଟ ଫି’ ପେମେଣ୍ଟର ବ୍ୟବସ୍ଥା ରହିଥିବା ଦୀପ୍ତିମୟୀ ମହାପାତ୍ର କହିଛନ୍ତି। ସୂଚନାଯୋଗ୍ୟ, ଭୁବନେଶ୍ୱରରୁ ପୁରୀକୁ ପ୍ରତିଦିନ ଶତାଧିକ ବସ୍ ଚାଲୁଥିଲେ ମଧ୍ୟ ଏହାଦ୍ୱାରା ପିପିଲି ଓ ଦାଣ୍ଡମୁକୁନ୍ଦପୁର ବାସିନ୍ଦା କିନ୍ତୁ ଉପକୃତ ହୋଇପାରୁ ନ ଥିଲେ। ଏବେ ବସ୍ ଚଳାଚଳ ଆରମ୍ଭ ହେବାପରେ ସ୍ଥାନୀୟ ବାସିନ୍ଦା ଖୁସିବ୍ୟକ୍ତ କହିଛନ୍ତି। ଶୁଭାରମ୍ଭ ଅବସରରେ ପିପିଲି ବ୍ଲକ ଉପାଧ୍ୟକ୍ଷ ଯୁଧିଷ୍ଠିର ସ୍ବାଇଁ, ଆମତ୍ା ଅଧ୍ୟକ୍ଷ ଧରଣୀଧର ସାହୁ, ଆର୍ତ୍ତବନ୍ଧୁ ସାମନ୍ତରାୟ, ସମବାୟବିତ୍ ସଦାଶିବ ଦାଶ, ଶ୍ରୀଧର ପ୍ରଧାନ ପ୍ରମୁଖ ବସରେ ଯାତ୍ରା କରିଥିଲେ। ଶ୍ରୀତମ ସ୍ବାଇଁ, ଟ୍ରାଭେଲ ଟାଇମର ମୁଖ୍ୟ ପରିଚାଳକ ତପନ ମହାନ୍ତି, ପୂର୍ଣ୍ଣଚନ୍ଦ୍ର ବେହେରା ପ୍ରମୁଖ କାର୍ଯ୍ୟକ୍ରମରେ ଉପସ୍ଥିତ ଥିଲେ।
