ଲକ୍ଷ୍ନୌ,୩୦।୫ : ଉତ୍ତରପ୍ରଦେଶର ଆଗ୍ରାରେ ସ୍ତ୍ରୀ-ସ୍ବାମୀଙ୍କ ବିବାଦର ଏକ ନିଆରା ମାମଲା ସାମ୍ନାକୁ ଆସିଛି। ସ୍ତ୍ରୀ କହିଛନ୍ତି ତାଙ୍କ ବାପା ବହୁତ ଯୌତୁକ ଦେଇଛନ୍ତି, ତେଣୁ ସେ ରୋଷେଇ କରିବେ ନାହିଁ। କେବଳ ଏତିକି ନୁହେଁ, ସ୍ତ୍ରୀ ସ୍ବାମୀଙ୍କୁ ଯୌତୁକ ଟଙ୍କାରେ ଘରେ ଚାକରାଣୀ ରଖିବାକୁ କହିଥିଲେ। ନିଜେ ରାନ୍ଧ ଖାଅ ଏବଂ ମୋତେ ମଧ୍ୟ ଖାଇବାକୁ ଦିଅ। ଏହିସବୁ କାରଣରୁ ସ୍ତ୍ରୀ ସ୍ବାମୀଙ୍କ ମଧ୍ୟରେ କଳହ ବଢ଼ିବାକୁ ଲାଗିଲା। ପରେ ସ୍ତ୍ରୀ ତାଙ୍କ ସ୍ବାମୀ ଏବଂ ଶାଶୁଙ୍କ ବିରୋଧରେ ଯୌତୁକ ନିର୍ଯାତନା ଅଭିଯୋଗ ଆଣିଥିଲେ।
ରିପୋର୍ଟ ଅନୁଯାୟୀ, ଏହି ଅଭିଯୋଗ ପରେ ଉଭୟଙ୍କୁ ପରିବାର ପରାମର୍ଶ କେନ୍ଦ୍ରରେ ପରାମର୍ଶ ଦିଆଯାଇଥିଲା। ପରାମର୍ଶଦାତା ଉଭୟଙ୍କ ସହ କଥା ହୋଇଥିଲେ। ସ୍ବାମୀ କହିଥିଲେ ସ୍ତ୍ରୀ କୌଣସି ଘରୋଇ କାମ କରନ୍ତି ନାହିଁ। ଏପରିକି ଖାଦ୍ୟ ରାନ୍ଧନ୍ତି ନାହିଁ ଏବଂ କିଛି କହିଲେ ଝଗଡା କରନ୍ତି। ଦିନସାରା ଫୋନରେ ବ୍ୟସ୍ତ ରୁହନ୍ତି। ଯେତେବେଳେ ପରାମର୍ଶଦାତା ସ୍ତ୍ରୀଙ୍କ ସହ କଥା ହୋଇଥିଲେ, ସେତେବେଳେ ସେ ସ୍ପଷ୍ଟ ଭାବରେ କହିଥିଲେ ତାଙ୍କ ବାପା ବିବାହରେ ବହୁତ ଯୌତୁକ ଦେଇଛନ୍ତି। ସେ କିପରି ରୋଷେଇ କରିବେ ଜାଣନ୍ତି ନାହିଁ। ସ୍ବାମୀ ଏବଂ ଶାଶୁଙ୍କ ପାଇଁ ସେ ଖାଦ୍ୟ ରାନ୍ଧି ପାରିବେ ନାହିଁ । ସେ ଘର କାମ କରିବେ ନାହିଁ। ମହିଳାଙ୍କ ଅଜବ ଯୁକ୍ତି ଶୁଣି ପରାମର୍ଶଦାତା ମଧ୍ୟ ଆଶ୍ଚର୍ଯ୍ୟ ହୋଇ ଯାଇଥିଲେ । ମହିଳାଙ୍କୁ ବୁଝାଇବାକୁ ତାଙ୍କ ପାଖରେ ଶବ୍ଦ ମଧ୍ୟ ନ ଥିଲା।
ଉଭୟ ପକ୍ଷ ଶୁଣିବା ପରେ ପରାମର୍ଶଦାତା ଆସନ୍ତା ସପ୍ତାହରେ ପରାମର୍ଶ ଦେବାକୁ କହିଛନ୍ତି। ଫ୍ୟାମିଲି କାଉନସେଲିଂ ସେଣ୍ଟରରେ ଏହି ବିଷୟ ଆଲୋଚନାର ବିଷୟ ପାଲଟିଛି। ମହିଳା ଜଣକ ପ୍ରାୟ ତିନି ବର୍ଷ ପୂର୍ବେ ସଦର ପୋଲିସ ଷ୍ଟେଶନ ଅଞ୍ଚଳରେ ରହୁଥିବା ଜଣେ ଯୁବକଙ୍କ ସହ ବିବାହ କରିଥିଲେ। ଯୁବକ ଜଣକ ଏକ ଘରୋଇ କମ୍ପାନୀରେ କାମ କରନ୍ତି । ଉଭୟ ଉଚ୍ଚଶିକ୍ଷିତ । କିନ୍ତୁ, ଘରର କାମକୁ ନେଇ ଉଭୟଙ୍କ ମଧ୍ୟରେ ବିବାଦ ଲାଗି ରହିଛି।
ମହିଳା ଜଣକ ଅଧିକ ସମୟ ଫୋନରେ ବ୍ୟସ୍ତ ରୁହନ୍ତି। ସାମ୍ପ୍ରତିକ ଯୁଗରେ ସୋସିଆଲ ମିଡ଼ିଆ ପୃଥିବୀ ବହୁ ଅଜଣା ଲୋକଙ୍କୁ ନିକଟତର କରୁଛି। ତେବେ ଲୋକେ ଏଥିରେ ବ୍ୟସ୍ତ ରହି ନିଜ ପରିବାର ସଦସ୍ୟ ଏବଂ ପ୍ରିୟ ପରିଜନଙ୍କ ପାଖରେ ରହି ମଧ୍ୟ ଦୂରେଇ ଯାଉଛନ୍ତି। ଏନେଇ ପରିବାର କୋର୍ଟ ଚିନ୍ତା ପ୍ରକଟ କରିଛନ୍ତି।