ମା’ ପାଇଁ ତା’ ପିଲା ହେଉଛି ସବୁଠୁ ମୂଲ୍ୟବାନ ଗହଣା। ତା’ର କୁନି କୁନି ହାତ ଓ ପାଦର କୋମଳ ସ୍ପର୍ଶ ତାକୁ ଅପୂର୍ବ ଆନନ୍ଦ ଦେଇଥାଏ। ଠିକ୍ ସେମିତି ସେହି କୁନି କୁନି ହାତ ଓ ପାଦର ଥିମକୁ ନେଇ ତିଆରି ହୋଇଥିବା ଜୁଏଲେରି ବି ତା’ର ଖୁବ୍ ମନଲାଖି ଆଉ ପ୍ରିୟ ହୋଇଥାଏ…
କୁହାଯାଏ, ଦୁନିଆର ସବୁ ଖୁସି ଗୋଟେ ପଟେ ଆଉ ମା’ ହେବାର ଖୁସି ଗୋଟେ ପଟେ। ମା’ ଏମିତି ଏକ ଶବ୍ଦ, ଯାହାର ଉଚ୍ଚାରଣରେ ରହିଥାଏ ପିଲାମାନଙ୍କ ପ୍ରତି ଅନାବିଳ ସ୍ନେହ, ଶ୍ରଦ୍ଧା ଆଉ ଅସୁମାରୀ ଭଲପାଇବା। ପିଲା ମୁହଁରୁ ମା’ ଡାକ ଶୁଣିଲେ ତା’ ପେଟ ପୂରିଯାଏ, ଦୁନିଆର ସବୁ ଖୁସି ତାକୁ ମିଳିଗଲା ପରି ଲାଗେ। ଧନ, ଦୌଲତ, ଗହଣା, ଗାଣ୍ଠି କେଉଁଥିରେ ବି ଆଉ ଲୋଭ ରୁହେନି। କୋଳରେ ଧରିଥିବା ଶିଶୁ ହିଁ ତା’ପାଇଁ ସବୁଠୁ ମୂଲ୍ୟବାନ ଧନ ହୋଇଯାଏ। ତା’ର କୁନି କୁନି ହାତ ଓ ପାଦର ସ୍ପର୍ଶ ମା’ର ସବୁ ଦୁଃଖକୁ ଭୁଲାଇଦିଏ। ତେଣୁ ସେହି ମା’ମାନଙ୍କର ଖୁସିକୁ ଆଖି ଆଗରେ ରଖି ଏବେ ଶିଶୁର କୁନି କୁନି ପାଦ ଓ ହାତର ଥିମ୍କୁ ନେଇ ସ୍ବତନ୍ତ୍ର ଧରଣର ଜୁଏଲେରି ମାର୍କେଟ୍କୁ ଆସିଲାଣି; ଯାହାର ଚାହିଦା ବି ବେଶ୍ ଭଲ ରହୁଥିବା ଦେଖିବାକୁ ମିଳୁଛି…
ବେବି ଫୁଟ୍ ଲକେଟ୍: ବେବି ଫୁଟ୍ ବା ଶିଶୁଙ୍କ ପାଦ ଡିଜାଇନ୍ର ଏହି ଲକେଟ୍ ଦେଖିବାକୁ ବେଶ୍ ଆକର୍ଷଣୀୟ ଲାଗିଥାଏ। ଏହା ବିଭିନ୍ନ ଡିଜାଇନ୍ରେ ମଧ୍ୟ ଆସିଥାଏ। ଯେମିତି କି: ଗୋଟିଏ ପାଦର ଲକେଟ୍, ଦୁଇଟି ପାଦ ଯୋଡ଼ି ହୋଇ ରହିଥିବା ଲକେଟ୍, ଏକାଧିକ ପାଦ ତଳକୁ ଧାଡ଼ି ଧାଡ଼ି ହୋଇ ରହିଥିବା ଲକେଟ୍, ଶିଶୁର ପାଦ ଓ ସେଥିରେ ତା’ର ନାମ ଲେଖା ହୋଇଥିବାର ଲକେଟ୍ ତଥା ମା’ର ପାପୁଲି ଉପରେ ଶିଶୁର ପାପୁଲି ଥିବା ଡିଜାଇନ୍ର ଲକେଟ୍ ଇତ୍ୟାଦି ଅନ୍ୟତମ। ଏହା ଉଭୟ ସୁନା, ରୁପା ତଥା ଆର୍ଟିଫିସିଆଲ୍ ଜୁଏଲେରି ଭାବେ ମଧ୍ୟ ଉପଲବ୍ଧ। ଏହି ଲକେଟ୍କୁ ମା’ମାନେ ଚାହିଁଲେ ବେକରେ ଚେନ୍ ସାଙ୍ଗରେ ପିନ୍ଧିପାରିବେ ନଚେତ୍ ଷ୍ଟାଇଲିଶ୍ ଲୁକ୍ ପାଇଁ ଏହାକୁ ହାତରେ ବ୍ରେସ୍ଲେଟ୍ କରିକି ମଧ୍ୟ ପିନ୍ଧିପାରିବେ।
ବେବି ଫୁଟ୍ ବ୍ରେସ୍ଲେଟ୍: ଶିଶୁଙ୍କ ପାଦ ଆକୃତିର ଏକାଧିକ ଲକେଟ୍କୁ ନେଇ ଖୁବ୍ ସୁନ୍ଦର ସୁନ୍ଦର ବ୍ରେସ୍ଲେଟ୍ ବି ଏବେ ମାର୍କେଟ୍ରେ ମିଳିଲାଣି। ସେହିପରି ଚୁଡ଼ି ଡିଜାଇନ୍ର ବ୍ରେସ୍ଲେଟ୍ ଉପରେ ହୋଇଥିବା ଶିଶୁଙ୍କ ପାଦ ଓ ହାତ ପାପୁଲିର ଆକୃତି ବି ବେଶ୍ ଆକର୍ଷଣୀୟ ଲାଗିଥାଏ। ବିଶେଷକରି ଫ୍ୟାଶନପ୍ରିୟ ମା’ମାନଙ୍କର ଏହି ଷ୍ଟାଇଲ୍ର ବ୍ରେସ୍ଲେଟ୍ ଖୁବ୍ ପସନ୍ଦ ହୋଇଥାଏ।
ବେବି ଫୁଟ୍ ରିଂ: ଶିଶୁଙ୍କ ହାତ ଓ ପାଦ ଡିଜାଇନ୍ର ରିଂ ବା ମୁଦିକୁ ହାତରେ ପିନ୍ଧିଲେ ତାହା ବେଶ୍ ସୁନ୍ଦର ଦେଖାଯାଇଥାଏ। ଏହା ଉଭୟ ସୁନା, ରୁପା ତଥା ଆର୍ଟିଫିସିଆଲ୍ ଜୁଏଲେରି ଭାବେ ମଧ୍ୟ ମାର୍କେଟ୍ରେ ଉପଲବ୍ଧ।
ବେବି ଫୁଟ୍ ଇୟର ରିଂ: ଖାସ୍କରି ମା’ମାନଙ୍କର ଚାହିଦା ତଥା ପସନ୍ଦକୁ ଦେଖି ଆଜିକାଲି ଶିଶୁଙ୍କ ହାତ ତଥା ପାଦର ଡିଜାଇନ୍ ହୋଇଥିବା ଇୟର୍ ରିଂ ବି ମାର୍କେଟ୍କୁ ଆସିଗଲାଣି। ଏହା ଉଭୟ ଷ୍ଟଡ୍ ତଥା ଲଙ୍ଗ୍ ଡିଜାଇନ୍ରେ ଉପଲବ୍ଧ ହେଉଛି। ତା’ଛଡ଼ା ସବୁ ପ୍ରକାରର ଆଉଟ୍ଫିଟ୍ ସହ ଏହି ଇୟର ରିଂ ବି ବେଶ୍ ଭଲ ମାନୁଛି।