ଥିରୁଭାନନ୍ତପୁରମ,୨୪।୯ : କଂଗ୍ରେସ ୱାର୍କିଂ କମିଟି ସଦସ୍ୟ ଏ.କେ ଆଣ୍ଟୋନିଙ୍କ ସ୍ତ୍ରୀ ଏଲିଜାବେଥ ଆଣ୍ଟୋନିଙ୍କ ଏକ ଭିଡିଓ ଏବେ ଭାଇରାଲ ହେବାରେ ଲାଗିଛି। ଏଥିରେ ସେ ତାଙ୍କ ବଡ ପୁଅ ଭାଜପାରେ ଯୋଗଦେବାକୁ ଯଥାର୍ଥ ବୋଲି କହିଛନ୍ତି। ସେ କହିଛନ୍ତି ତାଙ୍କ ପୁଅ ତାଙ୍କର ପ୍ରାର୍ଥନା ଯୋଗୁଁ ରାଜନୀତିରେ ଏକ ନୂଆ ସୁଯୋଗ ପାଇଛନ୍ତି।
କେରଳର ଆଲାପୁଝା ସ୍ଥିତ ଖ୍ରୀଷ୍ଟିଆନ କେନ୍ଦ୍ର କ୍ରିପସାନାମ ମାରିଆନରେ ନିକଟରେ ଏକ କାର୍ଯ୍ୟକ୍ରମରେ ଏଲିଜାବେଥ ଏହା ପ୍ରକାଶ କରିଥିଲେ।
ଖ୍ରୀଷ୍ଟିଆନ ମେଡିଟେଶନ ସେଣ୍ଟରର ୟୁଟ୍ୟୁବ ଚ୍ୟାନେଲରେ ଏହାର ଏକ ଭିଡିଓ ଭାଇରାଲ ହୋଇଥିଲା। ଭିଡିଓରେ, ଏଲିଜାବେଥ ସ୍ବୀକାର କରିଛନ୍ତି ସେ ବହୁ ପୂର୍ବରୁ ଭାଜପାରୁ ଅନିଲ ଆଣ୍ଟୋନିଙ୍କ ପାଇଁ ଆମନ୍ତ୍ରଣ ବିଷୟରେ ଜାଣିଥିଲେ। ଏଲିଜାବେଥ କହିଛନ୍ତି ଅନିଲଙ୍କ ରାଜନୀତିରେ ପ୍ରବେଶ ତାଙ୍କ ପ୍ରାର୍ଥନା ଯୋଗୁ ହୋଇଥିଲା। ସେ କହିଛନ୍ତି ତାଙ୍କ ପୁଅ ଭାଜପାରେ ଯୋଗଦେବା ପରେ ଦଳ ପ୍ରତି ତାଙ୍କ ମନରେ ଅବମାନନା ଓ ଘୃଣା ଭାବ କମିଛି।
ସେଣ୍ଟ ମେରିଙ୍କ ଆଶୀର୍ବାଦ ଯୋଗୁ ଆଣ୍ଟୋନି ଶାନ୍ତ ଓ ସଂଯମତା ସହ ଭାଜପାରେ ଯୋଗଦେବାକୁ ତାଙ୍କ ପୁଅଙ୍କର ନିଷ୍ପତ୍ତିକୁ ଗ୍ରହଣ କରିଛନ୍ତି। ସେ କହିଛନ୍ତି ଉଭୟ ପୁଅ ରାଜନୀତିରେ ପ୍ରବେଶ କରିବାକୁ ଚାହୁଁଥିଲେ, କିନ୍ତୁ କଂଗ୍ରେସ ଦଳର ସାମ୍ପ୍ରତିକ ଚିନ୍ତାଧାରା ଶିବିରରେ ବଂଶବାଦ ରାଜନୀତି ବିରୋଧରେ ପଦକ୍ଷେପ ନେଇ ସେ ଆଶ୍ଚର୍ଯ୍ୟ ହୋଇଯାଇଥିବା ସେ କହିଛନ୍ତି।
ସେ କହିଛନ୍ତି, ’ଯେତେବେଳେ ମୁଁ ମୋ ପୁଅକୁ ରାଜନୀତିରେ ପ୍ରବେଶ କରିବା ପାଇଁ ପ୍ରାର୍ଥନା କଲି, ସେତେବେଳେ କଂଗ୍ରେସ ଚିନ୍ତନ ଶିବିରରେ ପରିବାରବାଦ ରାଜନୀତି ବିରୋଧରେ ଏକ ସଂକଳ୍ପ ପାରିତ ହୋଇଥିଲା। ମୁଁ ଅନୁଭବ କଲି ମୋ ପୁଅମାନେ ରାଜନୀତିରେ ପ୍ରବେଶ କରିପାରିବେ ନାହିଁ। ମୋ ସ୍ବାମୀ ପୁଅମାନଙ୍କୁ ରାଜନୀତିରେ ଆଣିବାକୁ ଚେଷ୍ଟା କଲେ ନାହିଁ।
ଏ.କେ ଆଣ୍ଟୋନିଙ୍କ ସ୍ତ୍ରୀ କହିଛନ୍ତି ସେ ତାଙ୍କ ପୁଅର ଭଲ ଭବିଷ୍ୟତ ପାଇଁ ବହୁତ ପ୍ରାର୍ଥନା କରିଥିଲେ ଏବଂ ପରେ ତାଙ୍କୁ ଅନିଲଙ୍କଠାରୁ କଲ ଆସିଥିଲା। ଭିଡିଓରେ କଲରେ ସେ ମୋତେ କହିଥିଲେ ତାଙ୍କୁ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରୁ କଲ ଆସିଛି ଏବଂ ସେମାନେ ତାଙ୍କୁ ଭାଜପାରେ ଯୋଗଦେବାକୁ କହିଛନ୍ତି। ମୋ ପୁଅ ରାଜନୀତିରେ ପ୍ରବେଶ କରିବାର ସ୍ବପ୍ନ ଦେଖିଥିଲେ। ତାଙ୍କୁ ୩୯ ବର୍ଷ ବୟସ ହୋଇଛି।
ତେବେ ଏହା ମୋ ସ୍ବାମୀଙ୍କ ପାଇଁ ଏକ ଆଶ୍ଚର୍ଯ୍ୟଜନକ ଘଟଣା। ଭାଜପାରେ ଯୋଗଦେବା ପରେ ଅନିଲ ଘରକୁ ଆସିବା ପରେ କ’ଣ ହେବ ବୋଲି ମୁଁ ଚିନ୍ତିତ ଥିଲି। ଘରେ ସବୁକିଛି ଠିକ ରଖିବା ପାଇଁ ମୁଁ ମରିୟମଙ୍କୁ ପ୍ରାର୍ଥନା କଲି ଏବଂ ସେ ମୋ କଥା ଶୁଣିଲେ। ଆଣ୍ଟୋନି ଏହାକୁ ଶାନ୍ତ ଭାବରେ ଗ୍ରହଣ କଲେ। ସେ କହିଛନ୍ତି ପରେ ଆଣ୍ଟୋନି ତାଙ୍କ ପୁଅର ନିଷ୍ପତ୍ତିକୁ ଗ୍ରହଣ କରିଥିଲେ ଏବଂ ତାଙ୍କୁ କହିଥିଲେ ସେ ଯେତେବେଳେ ଚାହିଁବେ ଘରକୁ ଆସିପାରିବେ, କିନ୍ତୁ ଘରେ ରାଜନୀତି ଉପରେ ଆଲୋଚନା ହେବା ଉଚିତ ନୁହେଁ।
