ଇମ୍ଫାଲ,୪।୫ : ଖ୍ୟାତି ସମ୍ପନ୍ନ ବକ୍ସର ଏମସି ମେରିକୋମ ଗୁରୁବାର ମଣିପୁରରେ ଘଟିଥିବା ହିଂସାକୁ ଦୂର କରିବା ପାଇଁ କେନ୍ଦ୍ରର ସହାୟତା ଲୋଡିଛନ୍ତି। ବୁଧବାର ଏଠାରେ ଏକ ଆଦିବାସୀ ଆନ୍ଦୋଳନ ସମୟରେ ହିଂସା ଆରମ୍ଭ ହୋଇଥିଲା, ଯାହା ପରେ ରାଜ୍ୟର ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ସେନା ଏବଂ ଆସାମ ରାଇଫଲ୍ସ ପଠାଯାଇଥିଲା।
ପଦକ ବିଜେତା ବକ୍ସର ତାଙ୍କ ଟୁଇଟରରେ ରାଜ୍ୟରେ ଚାଲିଥିବା ହିଂସାର ଫଟୋ ଶେୟାର କରିଛନ୍ତି। ଏହି ପୋଷ୍ଟରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ଏବଂ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କୁ ମଧ୍ୟ ଟ୍ୟାଗ କରିଛନ୍ତି। କେନ୍ଦ୍ର ମନ୍ତ୍ରୀମାନଙ୍କୁ ଟ୍ୟାଗ କରି ମେରିକୋମ କହିଛନ୍ତି, ମୋ ରାଜ୍ୟ ଜଳୁଛି, ଦୟାକରି ସାହାଯ୍ୟ କରନ୍ତୁ।
ପ୍ରତିରକ୍ଷା ମୁଖପାତ୍ର କହିଛନ୍ତି, ରାତି ସମୟରେ ରାଜ୍ୟରେ ପରିସ୍ଥିତିକୁ ନିୟନ୍ତ୍ରଣକୁ ଆଣିବା ପାଇଁ ସେନା ଏବଂ ଆସାମ ରାଇଫଲ୍ସ ରାଜ୍ୟ ପୋଲିସ ସହିତ ତତ୍ପର ହୋଇଥିଲେ। ସକାଳେ ଫୋର୍ସ ହିଂସାକାରୀଙ୍କୁ ଗିରଫ କରିବାରେ ସକ୍ଷମ ହୋଇଥିଲେ।
ଭାରତର ମହିଳା ବକ୍ସର ମେରିକୋମ ରାଜ୍ୟସଭାର ଏମପି ଅଛନ୍ତି। ତାଙ୍କ ରାଜ୍ୟରେ ଆରମ୍ଭ ହୋଇଥିବା ଏହି ହିଂସା ସମ୍ପର୍କରେ ଖବରଦାତାମାନଙ୍କ ସହ କଥାବାର୍ତ୍ତା କରି ଶାନ୍ତି ଏବଂ ନିରାପତ୍ତା ପାଇଁ ସରକାରଙ୍କୁ ନିବେଦନ କରିଛନ୍ତି। ସେ କହିଛନ୍ତି ମଣିପୁରର ପରିସ୍ଥିତି ଭଲ ନୁହେଁ। ଗତକାଲି ରାତିରୁ ରାଜ୍ୟରେ ଅବସ୍ଥା ବିଗିଡି ଯାଇଛି। ଏହି ପ୍ରସଙ୍ଗରେ ମୁଁ କେନ୍ଦ୍ର ସରକାରଙ୍କୁ ନିବେଦନ କରୁଛି, ଗୁରୁତ୍ୱପୂର୍ଣ୍ଣ ପଦକ୍ଷେପ ଗ୍ରହଣ କରନ୍ତୁ ଏବଂ ରାଜ୍ୟରେ ଶାନ୍ତି ଓ ନିରାପତ୍ତା ଯୋଗାଇ ଦିଅନ୍ତୁ। ହିଂସାରେ ଅନେକ ଲୋକ ନିଜ ପରିବାରକୁ ହରାଇଛନ୍ତି। ରାଜ୍ୟରେ ପରିସ୍ଥିତି ଶୀଘ୍ର ସ୍ବାଭାବିକ ହେବା ଉଚିତ।
