ମୁମ୍ବାଇ,୧୨।୪: ଅଷ୍ଟ୍ରେଲିଆର ସର୍ବଶ୍ରେଷ୍ଠ ଅଧିନାୟକ ରିକି ପଣ୍ଟିଂ ଏବେ ଆଇପିଏଲରେ ଦିଲ୍ଲୀ କ୍ୟାପିଟାଲ୍ସର କୋଚ ଦାୟିତ୍ୱ ତୁଲାଉଛନ୍ତି। ତାଙ୍କ ନେତୃତ୍ୱରେ ଦଳର ପ୍ରଦର୍ଶନ ମଧ୍ୟ ଉଚ୍ଚକୋଟୀର ରହିଛି। ୨୦୨୦ରେ, ଦିଲ୍ଲୀ ପ୍ରଥମ ଥର ପାଇଁ ଟୁର୍ନାମେଣ୍ଟର ଫାଇନାଲରେ ପହଞ୍ଚିବାରେ ସଫଳ ହୋଇଥିଲା। ଏଥର ଦଳ ତିନିଥର ଚାମ୍ପିୟନ ଦଳ ଚେନ୍ନାଇ ସୁପର କିଙ୍ଗ୍ସକୁ ପରାସ୍ତ କରି ଅଭିଯାନ ଆରମ୍ଭ କରିଛି ଦିଲ୍ଲୀ। ଏସବୁ ମଧ୍ୟରେ ପଣ୍ଟିଂଙ୍କର ଗୋଟିଏ ଭିଡିଓ ଭାଇରାଲ ହେବାରେ ଲାଗିଛି।
୨୦୦୭ରେ ଆସିଥିବା ବଲିଉଡ୍ ଫିଲ୍ମ ଚକ୍ ଦେଇଣ୍ଡିଆରେ ଶାହରୁଖ ଖାନଙ୍କୁ ହକି କୋଚ କବୀର ଖାନ ଭୂମିକାରେ ଦେଖିବାକୁ ମିଳିଥିଲା। ଫିଲ୍ମରେ ବଡ଼ ବଡ଼ ଦାଢି ରଖି କବୀର ଖେଳାଳିଙ୍କ ମନୋବଳ ଦୃଢ କରୁଥିବା ଦେଖିବାକୁ ମିଳିଥିଲା। ପଣ୍ଟିଂର ଏପରି କିଛି ଭିଡିଓ ମଧ୍ୟ ଭାଇରାଲ ହୋଇଥିଲା, ସେବେଠାରୁ ସେ ସୋସିଆଲ ମିଡିଆରେ ଆଇପିଏଲର କବୀର ଖାନ ଭାବରେ ପରିଚିତ ହୋଇଥିଲେ। ଦିଲ୍ଲୀ କ୍ୟାପିଟାଲ୍ସର ଟୁଇଟର ହ୍ୟାଣ୍ଡେଲରୁ ଏକ ସମାନ ଭିଡିଓ ପୋଷ୍ଟ କରାଯାଇଛି ଯେଉଁଥିରେ ମୁଖ୍ୟ ପ୍ରଶିକ୍ଷକ ତାଙ୍କ ବିଷୟରେ ଖୋଲାଖୋଲି ଭାବେ କହୁଛନ୍ତି।
ଭିଡିଓରେ, ପଣ୍ଟିଂଙ୍କୁ ପଚରାଯାଇଥିଲା ଯେ ତାଙ୍କର ମଧ୍ୟ କବୀର ଖାନଙ୍କ ଭଳି ଦକ୍ଷତା ଅଛି କି, ପଣ୍ଟିଂ ସମ୍ପୂର୍ଣ୍ଣ ଭାବେ ମନା କରିଦେଇଥିଲେ। ସେ କହିଛନ୍ତି ଯେ, ଏହା ଏକ ରୀତିନୀତି, ଯାହା ସେ ପ୍ରତ୍ୟେକ ଖେଳ ପୂର୍ବରୁ କରନ୍ତି। ପ୍ରତ୍ୟେକ ମ୍ୟାଚ୍ ପୂର୍ବରୁ ସେ କ୍ଲିନ ସେଭ ହୁଅନ୍ତି । ଥଟ୍ଟା କରି ପଣ୍ଟିଂ ଆହୁରି ମଧ୍ୟ କହିଛନ୍ତି ଯେ ଯଦି ତାଙ୍କ ସ୍ତ୍ରୀ ତାଙ୍କୁ ଦାଢି ରଖିଥିବା ଦେଖନ୍ତି, ତେବେ ସେ ବୋଧହୁଏ ଛାଡପତ୍ର କରିବେ। ମୁଁ ଆଗାମୀ ଦୁଇ ଦିନ ମଧ୍ୟରେ ସେଭ କରିବି । ମୁଁ ଜାଣେ ନାହିଁ ତୁମେମାନେ ଏହା ଲକ୍ଷ୍ୟ କରିଛ କି ନାହିଁ, କିନ୍ତୁ ମୁଁ ପ୍ରତ୍ୟେକ ଖେଳର ପୂର୍ବ ରାତିରେ କ୍ଲିଭ କରେ ବୋଲି ସେ କହିଛନ୍ତି।
