ବ୍ୟୋଙ୍ଗକକ,୮।୧: ମ୍ୟାନମାରର ଉତ୍ତର-ପଶ୍ଚିମ ଦିଗରେ ଥିବା ଏକ ଗ୍ରାମରେ ସାମରିକ ବିମାନ ଆକ୍ରମଣରେ ୯ଜଣ ଶିଶୁଙ୍କ ସମେତ ଅତି କମରେ ୧୭ଜଣ ସାଧାରଣ ନାଗରିକଙ୍କ ମୃତ୍ୟୁ ଘଟିଛି। ଅନ୍ୟ ପ୍ରାୟ ୨୦ ଜଣ ମଧ୍ୟ ଆହତ ହୋଇଛନ୍ତି। ସ୍ଥାନୀୟ ଲୋକ ତଥା ମାନବାଧିକାର କର୍ମୀ ଦାବି କରିଛନ୍ତି ଯେ ସକାଳେ ଭାରତୀୟ ସୀମାର ଦକ୍ଷିଣରେ ଥିବା ସାଗିଙ୍ଗ ଅଞ୍ଚଳର ଖମ୍ପତ ସହରର କାନନ ଗ୍ରାମରେ ଏହି ଏୟାର ଷ୍ଟ୍ରାଇକ ହୋଇଛି।
ତେବେ ସାମରିକ ସରକାର ଏହି ଆକ୍ରମଣର ଦାୟିତ୍ୱ ଗ୍ରହଣ କରିବାକୁ ମନା କରିଦେଇଥିଲେ ଏବଂ ଏହି ଖବରରେ କୌଣସି ସତ୍ୟତା ନାହିଁ ବୋଲି କହିଥିଲେ।
ଫେବୃଆରୀ ୨୦୨୧ରେ ଅଙ୍ଗ ସାନ ସୁ-କିର ନିର୍ବାଚିତ ସରକାରକୁ ସେନା ବହିଷ୍କାର କରିବା ପରେ ଅନେକ ସଂଗଠନ ଅସ୍ତ୍ର ଉଠାଇଛନ୍ତି। ସେବେଠାରୁ ଦେଶର ବଡ଼ ଭାଗରେ ସେନା ଏବଂ ସେମାନଙ୍କ ମଧ୍ୟରେ ବିବାଦ ଲାଗି ରହିଛି। ବିଗତ ଦୁଇ ବର୍ଷ ମଧ୍ୟରେ ସାମରିକ ସରକାର ବିଦ୍ରୋହୀମାନଙ୍କ ବିରୋଧରେ ଏୟାର ଷ୍ଟ୍ରାଇକ ତ୍ୱରାନ୍ବିତ କରିଛନ୍ତି।
ଉଦ୍ଧାର କାର୍ଯ୍ୟରେ ସାହାଯ୍ୟ କରିଥିବା ଜଣେ ସ୍ଥାନୀୟ ବାସିନ୍ଦା ରବିବାର ଏପିଙ୍କୁ କହିଛନ୍ତି ଯେ ଖମ୍ପତ ଉପକଣ୍ଠରେ ଥିବା କାନନ ଗ୍ରାମରେ ଏକ ଜେଟ ଯୁଦ୍ଧ ବିମାନ ତିନିଟି ବୋମା ଫିଙ୍ଗିଛି। ଏହି କାରଣରୁ ଗାଁ ବିଦ୍ୟାଳୟ ଏବଂ ଏହାର ଆଖପାଖ ଅଟ୍ଟାଳିକାରେ ରହୁଥିବା ୧୭ଜଣ ସାଧାରଣ ନାଗରିକଙ୍କର ମୃତ୍ୟୁ ଘଟିଥିଲା। ନାମ ଗୋପନ ରଖିବା ସର୍ତ୍ତରେ ଜଣେ ବାସିନ୍ଦା କହିଛନ୍ତି ଯେ ସ୍କୁଲ ନିକଟରେ ଥିବା ପ୍ରାୟ ୧୦ ଟି ଘର ବୋମା ଦ୍ୱାରା ନଷ୍ଟ ହୋଇଯାଇଛି। ଖମ୍ପତ ସହରର ଅଧିକାଂଶ ବାସିନ୍ଦା ସଂଖ୍ୟାଲଘୁ ଖ୍ରୀଷ୍ଟିଆନ ଅଟନ୍ତି।
