ନାପିଦ୍ୱ,୧୪।୩ : ମ୍ୟାନମାର ସେନା ଏକ ବୌଦ୍ଧ ମଠ ଉପରେ ଆକ୍ରମଣ କରି ୨୮ ଜଣଙ୍କୁ ହତ୍ୟା କରିଛି। ଶାନ ରାଜ୍ୟର ଏକ ଗାଁରେ ଏହି ଆକ୍ରମଣ କରାଯାଇଥିଲା। ଏକ ବିଦ୍ରୋହୀ ସଂଗଠନ କାରେନ୍ନି ନ୍ୟାଶନାଲିଷ୍ଟ ଡିଫେନ୍ସ ଫୋର୍ସ (କେଏନଡିଏଫ) ଏହା ଦାବି କରିଛି। ଦେଶରେ ସାମରିକ ଶାସକ କ୍ଷମତା ଦଖଲ କରିବାକୁ ପ୍ରାୟ ଦୁଇ ବର୍ଷ ବିତିଛି। ସେବେଠାରୁ ଦେଶରେ ସେନା ଏବଂ ବିଦ୍ରୋହୀ ସଂଗଠନ ମଧ୍ୟରେ ହିଂସା ଜାରି ରହିଛି। ବିଗତ ଦିନରେ ସେନା ଏବଂ ବିଦ୍ରୋହୀ ଗୋଷ୍ଠୀ ମଧ୍ୟରେ ଲଢ଼େଇ ବୃଦ୍ଧି ପାଇଛି।
କେଏନଡିଏଫ ରିପୋର୍ଟ କରିଛି ଯେ ବୌଦ୍ଧ ମଠରେ ହୋଇଥିବା ଆକ୍ରମଣରେ ଉଭୟ ମ୍ୟାନମାରର ବାୟୁସେନା ଏବଂ ସେନା ମିଳିତ ଭାବେ ଆକ୍ରମଣ କରିଥିଲେ। ସେନାର ଆକ୍ରମଣ ରକ୍ଷା ପାଇବା ପାଇଁ ଲୋକମାନେ ଗାଁର ବୌଦ୍ଧ ମଠରେ ଲୁଚି ରହିଥିଲେ ମଧ୍ୟ ସେଠାରେ ସେନା ସେମାନଙ୍କୁ ଧାଡ଼ିରେ ଠିଆ କରି ଗୁଳି କରିଥିଲେ। କେଏନଡିଏଫ କହିଛି ଯେ ସେନା ଆକ୍ରମଣରେ ୨୮ରୁ ଅଧିକ ଲୋକଙ୍କର ଜୀବନ ଯାଇଛି। ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁଯାୟୀ, ସେନା ଲୋକଙ୍କୁ ମଠର କାନ୍ଥରେ ଠିଆ କରି ଗୁଳି ଚଳାଇଥିଲା। ମୃତକଙ୍କ ଙ୍ମଧ୍ୟରେ ମଠର ଭିକ୍ଷୁମାନେ ମଧ୍ୟ ଅଛନ୍ତି।