ଓ୍ବାଶିଂଟନ,୧୬ା୧୨: ଆମେରିକାର ନ୍ୟୁ ଜର୍ସି ଓ ଅନ୍ୟାନ୍ୟ ରାଜ୍ୟର ଆକାଶରେ କିଛିଦିନ ହେଲା କେତେକ ରହସ୍ୟମୟ ଡ୍ରୋନ୍ ଉଡ଼ୁଥିବାର ଦେଖାଯାଇଛି। ଏହାକୁ ନେଇ ଦେଶବାସୀ ଭୟଭୀତ ହୋଇଥିବାବେଳେ ଆମେରିକା ବାୟୁସୀମା ସୁରକ୍ଷାରେ ତ୍ରୁଟି ରହିଥିବା ନେଇ ପ୍ରଶ୍ନ ଉଠିଛି। ଏୟାରସ୍ପେସ୍ରେ ରହିଥିବା ଫାଙ୍କ ବନ୍ଦ ହେବା ଆବଶ୍ୟକ ବୋଲି ଆମେରିକାର ନିର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କ ମନୋନୀତ ଜାତୀୟ ସୁରକ୍ଷା ପରାମର୍ଶଦାତା ମାଇକ୍ ଓ୍ବାଲ୍ଟଜ କହିଛନ୍ତି। ଅନ୍ୟପକ୍ଷରେ ରାଷ୍ଟ୍ରପତି ଜୋ ବାଇଡେନ୍ଙ୍କ ପ୍ରଶାସନ ଅଭିଯୋଗକୁ ଖଣ୍ଡନ କରିଛି। ଆମେରିକା ଆକାଶରେ ଗତ କିଛିଦିନ ହେଲା ଉଡ଼ୁଥିବା ଡ୍ରୋନ୍ଗୁଡ଼ିକ ମଧ୍ୟରୁ ଅଧିକାଂଶ ଚାଳକଯୁକ୍ତ ଏୟାରକ୍ରାଫ୍ଟ। ଜାତୀୟ ସୁରକ୍ଷା ପ୍ରତି ବିପଦର କୌଣସି ପ୍ରମାଣ ନ ଥିବା ସରକାରଙ୍କ ପକ୍ଷରୁ କୁହାଯାଇଛି। ଏହା ସତ୍ତ୍ୱେ ବାଇଡେନ୍ଙ୍କ ଦଳ ସମେତ ଅନ୍ୟ ଆଇନ ପ୍ରଣେତାମାନେ ଚିନ୍ତାବ୍ୟକ୍ତ କରିଛନ୍ତି। ଜନସାଧାରଣଙ୍କ ଚିନ୍ତା ଦୂର କରିବା ଦିଗରେ ସରକାର ଅଧିକ ସ୍ବଚ୍ଛ ତଥା ତତ୍ପର ହେଉ ନ ଥିବାରୁ ସେମାନେ ନିରାଶା ପ୍ରକଟ କରିଛନ୍ତି। ନଭେମ୍ବର ୧୮ରୁ ପ୍ରତ୍ୟେକ ରାତିରେ ନ୍ୟୁ ଜର୍ସିରେ ରହସ୍ୟମୟ ଡ୍ରୋନ୍ ଦେଖିବାକୁ ମିଳୁଥିବା ସଂଘୀୟ ବିମାନ ଚଳାଚଳ ପ୍ରଶାସନ ପକ୍ଷରୁ କୁହାଯାଇଛି। ନ୍ୟୁୟର୍କ, କନେକ୍ଟିକଟ୍, ପେନ୍ସିଲ୍ଭାନିଆ, ମାସୁଚୁସେଟ୍ସ ଏବଂ ଭିର୍ଜିନିଆ ଆକାଶରେ ମଧ୍ୟରେ ଡ୍ରୋନ୍ ଦେଖିବାକୁ ମିଳିଛି। ତେବେ ସେଗୁଡ଼ିକ ସାଧାରଣ ସୁରକ୍ଷା ପ୍ରତି ବିପଦ ନୁହେଁ ବୋଲି ହ୍ବାଇଟ୍ ହାଉସ୍ ଜାତୀୟ ସୁରକ୍ଷା ପରିଷଦ କହିଛି।