ଅମରାବତୀ,୯।୯: ଶନିବାର ପୂର୍ବାହ୍ନରେ ଆନ୍ଧ୍ରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ତଥା ତେଲୁଗୁ ଦେଶମ ପାର୍ଟି (ଟିଡିପି) ମୁଖ୍ୟ ଏନ ଚନ୍ଦ୍ରବାବୁ ନାଇଡୁଙ୍କୁ କ୍ରାଇମବ୍ରାଞ୍ଚ ତଦନ୍ତ ବିଭାଗ (ସିଆଇଡି) ଗିରଫ କରିଛି। ଦୁର୍ନୀତି ଅଭିଯୋଗରେ ଏହି ଗିରଫଦାରୀ କରାଯାଇଛି। ଶନିବାର ସକାଳେ ନନ୍ଦିଆଲରେ ଏକ ବଡ଼ ଧରଣର ଗଣ୍ଡଗୋଳ ହୋଇଥିଲା ଯେତେବେଳେ ଟିଡିପି ନେତାଙ୍କୁ ଗିରଫ କରିବା ପାଇଁ ପୋଲିସ ଟିମ ଆସିଥିଲା।
ପାର୍ଟି ନେତାମାନେ ଦାବି କରିଛନ୍ତି ଯେ ପୋଲିସ ଚନ୍ଦ୍ରବାବୁଙ୍କୁ ଓରଭାକଲ ବିମାନବନ୍ଦରରୁ ବିମାନ ଯୋଗେ ବିଜୟୱାଡାକୁ ନେଇଯିବ। ତେବେ ଚନ୍ଦ୍ରବାବୁ ତାଙ୍କ ଗିରଫଦାରୀକୁ ତୀବ୍ର ବିରୋଧ କରିଛନ୍ତି। କୌଣସିି ଅଭିଯୋଗର କିଛି ପ୍ରମାଣ ନ ଦେଖାଇ ଏହି ଗିରଫ କରାଯାଇଛି ବୋଲି ସେମାନେ ଦାବି କରିଛନ୍ତି। ପ୍ରମାଣ ଉପସ୍ଥାପିତ ହେଲେ ହିଁ ସେ ଆଇନ ସହ ସହଯୋଗ କରିବେ ବୋଲି ଚନ୍ଦ୍ରବାବୁ କହିଛନ୍ତି।
ତେଲୁଗୁ ଦେଶମ ପାର୍ଟିର ନେତା ଓ କର୍ମୀମାନେ ତିରୁପତିସ୍ଥିତ ଅନ୍ନପୂର୍ଣ୍ଣା ସାରୁକୁଲୁ କେନ୍ଦ୍ରରେ ଏନ ଚନ୍ଦ୍ରବାବୁ ନାଇଡୁଙ୍କୁ ବେଆଇନ ଭାବେ ଗିରଫ କରିବା ବିରୋଧରେ ବିରୋଧ କରିଛନ୍ତି। ଏଥି ସହ ଚନ୍ଦ୍ରବାବୁ ନାଇଡୁଙ୍କ ପୁଅ ନାରା ଲୋକେଶ ମଧ୍ୟ ତାଙ୍କ ପିତାଙ୍କୁ ସିଆଇଡି ଗିରଫ କରିବା ପରେ ବିରୋଧ କରି ନିଜର ଅସନ୍ତୋଷ ବ୍ୟକ୍ତ କରିଛନ୍ତି।