ରସୁଲପୁର,୪ା୧୧(ରଞ୍ଜିତ ରାଉତ): କୁଆଖିଆ ଥାନା ଅନ୍ତର୍ଗତ ବଡ଼କଇଞ୍ଚତ୍ ପଞ୍ଚାୟତ ପାଞ୍ଚଗୋଛିଆ ଗ୍ରାମର ନବଘନ ରଥ(୪୫)ଙ୍କ ପରିବାର ଶେଷରେ ମୁଣ୍ଡ ନୂଆଁଇଛନ୍ତି। ଗାଁଲୋକଙ୍କ ନିଷ୍ପତ୍ତି ଅନୁସାରେ ସେମାନେ ନବଘନଙ୍କ ମୃତଦେହ ଶେଷକୃତ୍ୟରେ ସାମିଲ ହୋଇଛନ୍ତି।
ନବଘନଙ୍କ କଟକ ବଡ଼ ଡାକ୍ତରଖାନାରେ ମୃତ୍ୟୁ ହୋଇଥିଲା। ପରେ ମୃତଦେହକୁ ତାଙ୍କ ସ୍ତ୍ରୀ ମମତା ତରାଇ ସତ୍କାର ପାଇଁ ଗାଁକୁ ଆଣିଥିଲେ। ହେଲେ ଶାଶୁଘର ଲୋକେ ମୃତଦେହ ଗ୍ରହଣ କରି ନ ଥିଲେ। ଏହାକୁ ନେଇ ବିବାଦ ଉପୁଜିଥିଲା। ଏନେଇ ମମତା ଥାନାରେ ଅଭିଯୋଗ କରିଥିଲେ। ପୋଲିସ ପହଞ୍ଚତ୍ ନବଘନଙ୍କ ପରିବାର ଲୋକଙ୍କୁ ବୁଝାଶୁଝା କରିଥିଲା। ହେଲେ ପୋଲିସ କଥାରେ ସେମାନେ ରାଜି ହୋଇ ନ ଥିଲେ। ଉକ୍ତ ଘଟଣାକୁ ଆପୋସ ସମାଧାନ ପାଇଁ ପୋଲିସ ଓ ଗାଁ ମୁରବୀଙ୍କୁ ନେଇ ଏକ ବୈଠକ ବସିଥିଲା। ବହୁ ବିଚାର ବିମର୍ଶ ପରେ ପରିବାରର ଲୋକେ ରାଜି ହୋଇଥିଲେ। ଗାଁ ଲୋକେ ମୃତଦେହ ସତ୍କାର ଦାୟିତ୍ୱ ନେଇଥିଲେ। ପରିବାର ଲୋକେ ସେଥିରେ ସାମିଲ ହୋଇଥିଲେ। ନବଘନଙ୍କୁ ପୈତୃକ ସମ୍ପତ୍ତିରୁ ଭାଗ ମିଳିବା ସହ ତାଙ୍କ ସ୍ତ୍ରୀ ଚାହିଁଲେ ଭିନ୍ନ ଏକ ପ୍ଲଟରେ ଘର କରି ରହିପାରିବେ ବୋଲି ମତ ଦେଇଥିଲେ। ସ୍ତ୍ରୀ ମମତା ଓ ତାଙ୍କ ଦୁଇପିଲା ନିଷ୍ପତ୍ତିକୁ ସମ୍ମାନ ଜଣାଇଥିଲେ। ଶାଶୁଘର ଲୋକ ଗାଁ ଲୋକଙ୍କ ନିଷ୍ପତ୍ତିକୁ ମାନି ନେଇଥିବା ଓ ତାଙ୍କ ସ୍ବାମୀଙ୍କ ମୃତଦେହ ସତ୍କାରରେ ସାମିଲ ହେବାକୁ ରାଜି ହୋଇ ଥିବାରୁ ସେ ଶାଶୁଘର ଲୋକଙ୍କ ନିକଟରେ କୃତଜ୍ଞତା ଜ୍ଞାପନ କରିଥିଲେ। ଉକ୍ତ ଘଟଣାକୁ ନେଇ ଗୁରୁବାର ବିଳମ୍ବିତ ରାତ୍ରି ପର୍ଯ୍ୟନ୍ତ ଆଲୋଚନା ହୋଇଥିଲା। ମାତ୍ର ରାତ୍ରି ସମୟରେ ମୃତଦେହ ସତ୍କାର ସମ୍ଭବପର ହୋଇ ନ ଥିଲା। ଶୁକ୍ରବାର ସକାଳୁ ଗାଁ ଲୋକଙ୍କ ଉପସ୍ଥିତିରେ ଗାଁ ମଶାଣିରେ ମୃତଦେହର ଶେଷକୃତ୍ୟ ସମ୍ପନ୍ନ ହୋଇଥିଲା। ରାତି ସାରା ପୋଲିସ ମୃତଦେହ ଜଗି ରହିଥିଲା। ଘଟଣାକୁ ନେଇ ଗାଁରେ ଯେମିତି କୌଣିସ ଅପ୍ରତିକର ପରିସ୍ଥିତି ସୃଷ୍ଟି ନ ହୁଏ ସେଥିପ୍ରତି ସଜାଗ ରହିଥିଲା। ପୋଲିସ ଉପସ୍ଥିତି ଓ ଗାଁ ଲୋକଙ୍କ ଉଦ୍ୟମରେ ସମସ୍ତ କାର୍ଯ୍ୟ ଶାନ୍ତି ଶୃଙ୍ଖଳାର ସହ ସମ୍ପନ୍ନ ହୋଇଥିଲା।
ନବଘନ ୧୭ବର୍ଷ ତଳେ ଗାଁର ଜଣେ ଦଳିତ ପରିବାର ଝିଅଙ୍କୁ ବିବାହ କରିଥିଲେ। ଏହାକୁ ପରିବାର ଲୋକେ ବିରୋଧ କରିଥିଲେ। ସେବେଠାରୁ ନବଘନ ତାଙ୍କ ସ୍ତ୍ରୀଙ୍କୁ ନେଇ ଭୁବନେଶ୍ୱରରେ ରହୁଥିଲେ। ନବଘନ ପରିବାରର ବିଭିନ୍ନ ପାରମ୍ପାରିକ କାର୍ଯ୍ୟ, ଶୁଦ୍ଧିକ୍ରିୟାରେ ସେମାନେ ସାମିଲ ହୋଇ ନ ଥିଲେ। ନବଘନଙ୍କ ଏଭଳି ଆଚରଣରେ ରାଗିଯାଇ ପରିବାର ଲୋକେ ତାଙ୍କଠରୁ ସମ୍ପର୍କ ଛିନ୍ନ କରିବା ସହ ତାତାଙ୍କୁ ଶୁଧି ହୋଇ ପଡ଼ିଥିଲେ। ସେମାନେ ନବଘନଙ୍କ ମୃତଦେହ ଗ୍ରହଣ କରିବାକୁ ଅରାଜି ହୋଇଥିଲେ। ତାଙ୍କ ସ୍ତ୍ରୀ ମାମତା ଅଡ଼ି ବସିବା ସହ ତାଙ୍କୁ ନ୍ୟାୟ ମିଳୁ ବୋଲି ଜିଦ୍ ଧରିଥିଲେ। ଏ ସବୁ ପରେ ବି ଶାଶୁଘର ଲୋକେ ତାଙ୍କୁ ସହଯୋଗ କରି ନ ଥିଲେ। ଶେଷରେ ପୋଲିସ ଓ ଗାଁ ଲୋକଙ୍କ ଉଦ୍ୟମର ଘଟଣାର ଆପୋସ ସମାଧାନ ହୋଇଥିଲା। ବିବାଦ ଭିତରେ ମୃତଦେହ ସତ୍କାର କାର୍ଯ୍ୟ ୨୪ ଘଣ୍ଟା ବିଳମ୍ବ ହୋଇଥିଲା।
