ନୂଆଦିଲ୍ଲୀ,୭।୨: ନ୍ୟାଶନାଲ ବ୍ୟାଙ୍କ ଫର୍ ଏଗ୍ରିକଲଚର ଆଣ୍ଡ ରୁରାଲ ଡେଭଲମେଣ୍ଟ(ନାବାର୍ଡ) ୨୦୨୦-୨୧ ଆର୍ଥିକ ବର୍ଷ ପାଇଁ ବିଭିନ୍ନ କ୍ଷେତ୍ରର ବିକାଶ ନିମନ୍ତେ ପ୍ରାୟ ୩୦,୨୦୦ କୋଟି ଟଙ୍କା ମଞ୍ଜୁର କରିଥିବା ସୂଚନା ମିଳିଛି। ଏ ସମ୍ପର୍କରେ ଶନିବାର ବ୍ୟାଙ୍କ ପକ୍ଷରୁ କୁହାଯାଇଛି ଯେ ଗତ ୧୦ ମାସ ମଧ୍ୟରେ ବିଭିନ୍ନ କ୍ଷେତ୍ର ପାଇଁ ପ୍ରାୟ ୧୬,୫୦୦ କୋଟି ଟଙ୍କା ବଣ୍ଟନ କରାଯାଇଛି। ଚଳିତ ଆର୍ଥିକ ବର୍ଷ ଶେଷ ସୁଦ୍ଧା ବଳକା ରାଶି ହିତାଧିକାରୀ ଓ ବିଭିନ୍ନ କ୍ଷେତ୍ରକୁ ବଣ୍ଟାଯିବା ଯୋଜନା ରହିଛି।
ଦେଶର ସମସ୍ତ ଗ୍ରାମୀଣ ଅଞ୍ଚଳର ବିକାଶ ଓ ସମାଜର ଅଭିବୃଦ୍ଧି ପାଇଁ ବ୍ୟାଙ୍କ ଏହି ରାଶି ବିନିଯୋଗ କରିଛି। ସଂସ୍ଥାର ରୁରାଲ ଇନ୍ଫ୍ରାଷ୍ଟକ୍ଚର ଡେଭଲମେଣ୍ଟ ଫଣ୍ଡ (ଆର୍ଆଇଡିଏଫ୍) ଜରିଆରେ ଏହି ରାଶି ବଣ୍ଟାଯାଇଛି। ୨୦୨୧-୨୨ ଆର୍ଥିକ ବର୍ଷର ବଜେଟ ବ୍ୟବସ୍ଥା ସହିତ ଚଳିତ ଆର୍ଥିକ ବର୍ଷର ବ୍ୟୟବରାଦ ଓ ବିବରଣୀ ପ୍ରଦାନ ଅବସରରେ ନାବାର୍ଡର ଅଧ୍ୟକ୍ଷ ଜି.ଆର୍. ଚିନ୍ତାଲ କହିଛନ୍ତି, ୩୦ ହଜାର କୋଟି ଟଙ୍କାରୁ ୨୦୨୧ ଜାନୁୟାରୀ ଶେଷ ସୁଦ୍ଧା ସଂସ୍ଥା ପ୍ରାୟ ୧୬,୫୦୦ କୋଟି ଟଙ୍କା ବାଣ୍ଟିଛି।
