ଭୁବନେଶ୍ୱର,୭ା୧୦: ରାଜ୍ୟ ମଧ୍ୟରେ ୨୪ ବ୍ରିଜ୍ ନିର୍ମାଣ ଲାଗି ଜାତୀୟ କୃଷି ଏବଂ ଗ୍ରାମୀଣ ବିକାଶ ବ୍ୟାଙ୍କ(ନାବାର୍ଡ) ୩୦୩ କୋଟି ଟଙ୍କାର ଋଣ ସହାୟତା ଯୋଗାଇ ଦେଇଛି। ବ୍ୟାଙ୍କ ଏହାର ଗ୍ରାମୀଣ ଭିତ୍ତିଭୂମି ଉନ୍ନତୀକରଣ ପାଣ୍ଠି(ଆର୍ଆଇଡିଏଫ୍) ଅନ୍ତର୍ଗତ ଏଭଳି ପଦକ୍ଷେପ ଗ୍ରହଣ କରିଛି। ମୋଟ ୧୩ ଜିଲାରେ ଏହି ପ୍ରକଳ୍ପଗୁଡିକୁ ରାଜ୍ୟ ସରକାରଙ୍କ ଓ୍ବାର୍କସ ଏବଂ ରୁରାଲ ଡେଭଲପମେଣ୍ଟ ବିଭାଗ କାର୍ଯ୍ୟାନ୍ବୟନ କରୁଛି। ପ୍ରକଳ୍ପଗୁଡିକ ୪୩୩୭.୧୫ ମିଟର ବିଶିଷ୍ଟ ହୋଇଥିବା ବେଳେ ୮୨୩ ଗ୍ରାମର ୨୪.୧୩ ଲକ୍ଷ ଲୋକଙ୍କୁ ଯୋଗାଯୋଗ ସୁବିଧା ପ୍ରଦାନ କରିବାରେ ସହାୟକ ହେବ। ରାଜ୍ୟ ସରକାରଙ୍କ ଦ୍ୱାରା ପ୍ରସ୍ତାବିତ ଗୁରୁତ୍ୱପୂର୍ଣ୍ଣ ପ୍ରକଳ୍ପଗୁଡିକ ଲାଗି ବ୍ୟାଙ୍କ ଏଭଳି ସହାୟତା ଦେଉଥିବା ଜଣାପଡିଛି। ଏହି ପ୍ରକଳ୍ପଗୁଡିକ ରାଜପଥ, ବ୍ରିଜ୍ ନିର୍ମାଣ, ଜଳସେଚନ ଏବଂ ପାନୀୟ ଜଳ ଯୋଗାଣ ଭଳି କ୍ଷେତ୍ର ସହ ଜଡିତ। ବର୍ତ୍ତମାନର ସହାୟତା ସହ ଆର୍ଆଇଡିଏଫ୍ରେ ନାବାର୍ଡ ଅଦ୍ୟାବଧି ୧୭୯୬ କୋଟି ଟଙ୍କା ଯୋଗାଇ ଦେଇଛି। ଓଡ଼ିଶାର ଗ୍ରାମୀଣ ଅର୍ଥ ବ୍ୟବସ୍ଥା ଏବଂ ଲୋକଙ୍କ ଜୀବନଧାରଣ ମାନରେ ଉନ୍ନତି ଆଣିବାରେ ଏଭଳି ଭିତ୍ତିଭୂମି ପ୍ରକଳ୍ପ ବିଶେଷ ଭାବେ ସହାୟକ ହେବ ବୋଲି ନାବାର୍ଡ ସିଜିଏମ୍ ସି.ଉଦୟଭାସ୍କର କହିଛନ୍ତି।