ବାର୍ସିଲୋନା, ୨୭ା୪ (ଏପି)-ସ୍ପେନ୍ର ଷ୍ଟାର ଖେଳାଳି ରାଫାଲ ନାଡାଲ ୧୨ ଥର ବାର୍ସିଲୋନା ଓପନ ଟେନିସ ଟାଇଟଲ ଜିତିଛନ୍ତି। ଫାଇନାଲରେ ସେ ଗ୍ରୀସ୍ର ଷ୍ଟିଫାନ୍ସ ସିତ୍ସିପାସ୍ଙ୍କୁ ୬-୪, ୬-୭ (୬), ୭-୫ ସେଟ୍ରେ ହରାଇ ଦେଇଛନ୍ତି। ଏହି କ୍ଲେ କୋର୍ଟ ଟୁର୍ନାମେଣ୍ଟରେ ସବୁଠାରୁ ଅଧିକ ଥର ଚାମ୍ପିୟନ ହେବାର ରେକର୍ଡ ନାଡାଲଙ୍କ ନାମରେ ରହିଛି। କରୋନା ମହାମାରୀ ଯୋଗୁ ନାଡାଲ ଗତବର୍ଷ ଅଧିକ ଖେଳି ପାରି ନ ଥିଲେ। ଫାଇନାଲ ମ୍ୟାଚ ୩ ଘଣ୍ଟା ୩୮ ମିନିଟ ଧରି ଚାଲିଥିଲା। ୧୯୯୧ ପରଠାରୁ ଏହା ସବୁଠାରୁ ଦୀର୍ଘ ବେଷ୍ଟ ଅଫ୍୍ ଥ୍ରି ଏଟିପି ଫାଇନାଲ ମ୍ୟାଚ୍ର ମାନ୍ୟତା ଲାଭ କରିଛି। ଏହାଛଡ଼ା ଚଳିତବର୍ଷର ସବୁଠାରୁ ଦୀର୍ଘ ବେଷ୍ଟ ଅଫ୍ ଥ୍ରି ଏଟିପି ମ୍ୟାଚ ବିବେଚିତ ହୋଇଛି। ବାର୍ସିଲୋନା ଓପନର ଗତ ୧୦ ସଂସ୍କରଣରେ ଏହା ହେଉଛି ନାଡାଲଙ୍କ ୭ମ ଏବଂ ୧୬ ସଂସ୍କରଣରେ ୧୨ତମ ଟାଇଟଲ। ମହାମାରୀ ଯୋଗୁ ଗତବର୍ଷ ଏହି ଟୁର୍ନାମେଣ୍ଟ ଖେଳାଯାଇ ନ ଥିଲା। ନାଡାଲ କହିଛନ୍ତି, ସମ୍ଭବତଃ ବାର୍ସିଲୋନାରେ ତାଙ୍କର ଏହା ଥିଲା ସବୁଠାରୁ କଷ୍ଟସାଧ୍ୟ ଫାଇନାଲ। ତେଣୁ ମୋ ପାଇଁ ଏହାଥିଲା ସବୁଠାରୁ ଗୁରୁତ୍ୱପୂର୍ଣ୍ଣ ବିଜୟ। ସୂଚନାଯୋଗ୍ୟ, ବାର୍ସିଲୋନା ଫାଇନାଲ ପଥରେ ସିତ୍ସିପାସ୍ ଗୋଟିଏ ହେଲେ ସେଟ୍ରେ ପରାଜିତ ହୋଇ ନ ଥିଲେ। ଅଷ୍ଟ୍ରେଲିଆନ ଓପନ କ୍ୱାର୍ଟରଫାଇନାଲରେ ସେ ନାଡାଲଙ୍କୁ ପରାସ୍ତ କରିଥିଲେ। ୩୪ ବର୍ଷୀୟ ନାଡାଲ ବାର୍ସିଲୋନାରେ ଜିତିଥିବା ସମସ୍ତ ୧୨ଟି ଫାଇନାଲରେ ବିଜୟ ହାସଲ କରିଛନ୍ତି। ସେ ୨୦୦୫ରୁ ୨୦୦୯, ୨୦୧୧-୧୩ ଓ ୨୦୧୬-୧୮ ଟୁର୍ନାମେଣ୍ଟରେ ପ୍ରାଧାନ୍ୟ ବିସ୍ତାର କରିଥିଲେ। ୨୦୧୯ ସେମିଫାଇନାଲରେ ସେହିବର୍ଷର ଚାମ୍ପିୟନ ଡୋମିନିକ୍ ଥିମ୍ଙ୍କଠାରୁ ସେ ପରାଜିତ ହୋଇଥିଲେ।
