କୋହିମା,୨।୩: ନାଗାଲାଣ୍ଡ ବିଧାନସଭା ନିର୍ବାଚନରେ ଏନଡିପିପି ଏବଂ ଭାଜପା ସହଯୋଗୀ ପ୍ରାର୍ଥୀ ହେକାନି ଜଖାଲୁ ଦିମାପୁର-୩ ବିଧାନସଭା ଆସନ ଜିତିଛନ୍ତି। ଏହା ସହ ସେ ନାଗାଲାଣ୍ଡ ବିଧାନସଭାକୁ ନିର୍ବାଚିତ ହୋଇଥିବା ପ୍ରଥମ ମହିଳା ହୋଇଛନ୍ତି। ସେ ୧,୫୩୬ ଭୋଟରେ ଜିତିଥିଲେ।
୪୮ ବର୍ଷ ବୟସ୍କ ଏନଡିପିପି ନେତା ହେକାନି ଆଇନ ଅଧ୍ୟୟନ କରିଛନ୍ତି। ସେ ୨୦୧୩ରେ ସାନ ଫ୍ରାନ୍ସିସ୍କୋ ସ୍କୁଲ ଅଫ ଲ’ରୁ ମାଷ୍ଟର ଅଫ ଲରେ ସ୍ନାତକ ଅର୍ଜନ କରିଥିଲେ। ହେକାନିଙ୍କର ୫.୫୮ କୋଟି ମୂଲ୍ୟର ସମ୍ପତ୍ତି ଅଛି। ତାଙ୍କ ନିର୍ବାଚନ ପ୍ରମାଣପତ୍ରରେ ସେ ନିଜ ଉପରେ ୪୧.୯୫ ଲକ୍ଷରୁ ଅଧିକ ଋଣ ଥିବା କହିଛନ୍ତି। ହେକାନିଙ୍କ ନିର୍ବାଚନ ପ୍ରମାଣପତ୍ର ଅନୁଯାୟୀ, ହେକାନି ଏବଂ ତାଙ୍କ ସ୍ବାମୀଙ୍କର ଅଧଡଜନ କାର ଅଛି। ଏହାର ମୋଟ ମୂଲ୍ୟ ୧.୩୨ କୋଟିରୁ ଅଧିକ ଟଙ୍କା ବୋଲି କୁହାଯାଉଛି।
ସୂଚନାନୁସାରେ, ହେକାନି ୩୦,୦୦୦ ଟଙ୍କା ମୂଲ୍ୟର ଅଳଙ୍କାର ଏବଂ ୨ ଲକ୍ଷ ଟଙ୍କା ମୂଲ୍ୟର ଘଣ୍ଟା ପିନ୍ଧନ୍ତି। ସେହିଭଳି ତାଙ୍କ ସ୍ବାମୀଙ୍କ ପାଖରେ ୬୦ ହଜାର ମୂଲ୍ୟର ସୁନା ରିଙ୍ଗ ଏବଂ ଦୁଇ ଲକ୍ଷ ମୂଲ୍ୟର ସୁନା ଚେନ ଅଛି। ତାଙ୍କର ମୋଟ ଚଳନ ସମ୍ପତ୍ତି ୩.୫୧ କୋଟିରୁ ଅଧିକ।
ହେକାନିଙ୍କ ନିଜ ନାମରେ କୌଣସି ଘର ନାହିଁ। ଏହି ପ୍ରମାଣପତ୍ରରେ ସେ ସୂଚନା ଦେଇଛନ୍ତି ଯେ, ତାଙ୍କର ୨୨.୫୦ ଲକ୍ଷ ଟଙ୍କା ଏବଂ ୧୫ ଲକ୍ଷ ଟଙ୍କା ମୂଲ୍ୟର ଦୁଇଟି କୃଷି ଜମି ଅଛି। ଏହା ବ୍ୟତୀତ ତାଙ୍କ ସ୍ବାମୀଙ୍କ ନାମରେ ଏକ ବ୍ୟବସାୟିକ ଏବଂ ଆବାସିକ କୋଠା ଅଛି।