ପୁରୀ ଅଫିସ,୨୬ା୧୧:ଦିନକ ପରେ ମହାପ୍ରଭୁଙ୍କ ନାଗାର୍ଜୁନ ବେଶ। ଏହି ବେଶକୁ ପଟ୍ଟଚିତ୍ରରେ ଦେଖାଇବାକୁ ଚେଷ୍ଟା କରିଛନ୍ତି ଶିଳ୍ପୀ ପଙ୍କଜ ବେହେରା। ପଙ୍କଜ କହିଛନ୍ତି, କରୋନା କଟକଣା ଯୋଗୁ ଏଥର ଶ୍ରଦ୍ଧାଳୁ ନାଗାର୍ଜୁନ ବେଶ ଦେଖିପାରିବେ ନାହିଁ। ତେଣୁ ପଟ୍ଟଚିତ୍ରରେ ଅବିକଳ ଏହି ବେଶ କରିବାକୁ ମନସ୍ଥ କଲି। ମହାପ୍ରଭୁଙ୍କ ଆଶୀର୍ବାଦରୁ ୭ମାସ ମଧ୍ୟରେ ବଡ଼ ବଡ଼ ୫ଟି ପଟ୍ଟଚିତ୍ର ପ୍ରସ୍ତୁତ କରିଛି। ଏହାକୁ ପଟ୍ଟଚିତ୍ର ସେଣ୍ଟର ସଂଗ୍ରହାଳୟରେ ରଖାଯାଇଛି। ବର୍ଷତମାମ୍ ଯେ କେହି ଏହାକୁ ଦେଖି ପାରିବେ। ସୂଚନାଥାଉ କି, ପଙ୍କଜ ମହାପ୍ରଭୁଙ୍କର ଶହ ଶହ ପେଣ୍ଟିଂ ତିଆରି କରିଛନ୍ତି। ପୁରୀ ଗସ୍ତରେ ଆସିଥିବା ଭାରତର ଏକାଧିକ ପୂର୍ବତନ ରାଷ୍ଟ୍ରପତି ଏବଂ ବିଶିଷ୍ଟ ବ୍ୟକ୍ତିଙ୍କୁ ଭେଟି ସ୍ବରୂପ ସରକାରଙ୍କ ପକ୍ଷରୁ ପଙ୍କଜଙ୍କ କଳାକୃତି ପ୍ରଦାନ କରାଯାଇଛି।
ସେହିପରି ପୁରୀ କୁମ୍ଭାରପଡ଼ାର ଶାଶ୍ୱତ ରଞ୍ଜନ ସାହୁ ଦିଆସିଲି କାଠିରେ ତିଆରି କରିଛନ୍ତି ଶ୍ରୀଜଗନ୍ନାଥଙ୍କ ନାଗାର୍ଜୁନ ବେଶ। ସେ ଏହି ବେଶକୁ ୫-ଟି ସଚିବ ଭି.କେ. ପାଣ୍ଡିଆନଙ୍କୁ ଭେଟିଦେବା ପାଇଁ ଇଚ୍ଛା ରଖିଛନ୍ତି। ଏ ସମ୍ପର୍କରେ ଯୁକ୍ତ ୩ ପ୍ରଥମ ବର୍ଷର ଛାତ୍ର ଶାଶ୍ୱତ କହିଛନ୍ତି, ପିଲାଟି ଦିନରୁ ଚିତ୍ର କଳା ପ୍ରତି ଆଗ୍ରହ ରହିଛି। ପୂର୍ବରୁ ଦିଆସିଲି କାଠିରେ ମହାପ୍ରଭୁଙ୍କ ପ୍ରତିମୂର୍ତ୍ତି ତିଆରି କରିଥିବାରୁ ନାଗାର୍ଜୁନ ବେଶ କରିବାକୁ ଆଗ୍ରହ ହେଲା। ୩,୬୩୫ ଦିଆସିଲି କାଠି ଏବଂ ଅଠା ବ୍ୟବହାର କରି ୨୯ ଇଞ୍ଚ ଉଚ୍ଚତା ଓ ୨୬ ଇଞ୍ଚ ଚଉଡ଼ା ବିଶିଷ୍ଟ ଏହି ପ୍ରତିମୂର୍ତ୍ତି ତିଆରି କରିଛି। ଏଥିପାଇଁ ତାଙ୍କୁ ୧୧ ଦିନ ଲାଗିଛି।