ପୁରୀ ଅଫିସ,୨୫।୧୧: ଦୀର୍ଘ ୨୫ବର୍ଷ ପରେ ପଡ଼ୁଛି ମହାପ୍ରଭୁଙ୍କ ନାଗାର୍ଜୁନ ବେଶ। ଆସନ୍ତା ୨୭ ତାରିଖରେ ଏହି ଦୁର୍ଲଭ ବେଶ ଅନୁଷ୍ଠିତ ହେବ। ଏଥର କରୋନା ମହାମାରୀ ପାଇଁ ଏହି ବେଶକୁ ଭକ୍ତମାନେ ଦେଖିପାରିବେ ନାହିଁ। ତେବେ ମହାପ୍ରଭୁଙ୍କର ଏହି ମହାର୍ଘ ବେଶକୁ ନିଆରା ଢଙ୍ଗରେ ପ୍ରସ୍ତୁତ କରିଛନ୍ତି ଜଣେ ଡିପ୍ଲୋମା ଛାତ୍ର। ଏହି ଯୁବ ଶିଳ୍ପୀ ଜଣଙ୍କ ହେଲେ ପୁରୀ କୁମୁଟିପାଟଣାର ବିଶ୍ୱଜିତ ନାୟକ (୧୯)। ୩,୫୭୫ ଖଣ୍ଡ ଆଇସ୍କ୍ରିମ୍ କାଠିରେ ନାଗାର୍ଜୁନ ବେଶ ତିଆରି କରି ବିଶ୍ୱଜିତ ଏବେ ସମସ୍ତଙ୍କ ଦୃଷ୍ଟି ଆକର୍ଷଣ କରିପାରିଛନ୍ତି। ଏ ସମ୍ପର୍କରେ ବିଶ୍ୱଜିତ୍ କହିଛନ୍ତି, ଏହି ବେଶ ତିଆରି କରିବାକୁ ତାଙ୍କୁ ୧୬ ଦିନ ସମୟ ଲାଗିଛି। ୩,୫୭୫ ଖଣ୍ଡ ଆଇସ୍କ୍ରିମ୍ କାଠିରେ ୪୦ ଇଞ୍ଚ ଉଚ୍ଚତା ଏବଂ ୨୨ ଇଞ୍ଚ ଚଉଡ଼ାର ବେଶ ତିଆରି କରିଛନ୍ତି। ପୂର୍ବରୁ ସେ ଆଇସ୍କ୍ରିମ୍ କାଠିରେ ନନ୍ଦିଘୋଷ ରଥ ଏବଂ କୁନି ଗଣେଶ ତିଆରି କରିଥିବାରୁ ନାଗାର୍ଜୁନ ବେଶ ପାଇଁ ତାଙ୍କୁ ବେଶି ସମସ୍ୟା ହୋଇ ନ ଥିଲା। ସୂଚନାଥାଉ କି, ସପ୍ତମ ଶ୍ରେଣୀରେ ପଢୁଥିବାବେଳେ ଆଇସ୍କ୍ରିମ୍ କାଠିରେ ସିଂହାସନ କରି ମହାପ୍ରଭୁ ଶ୍ରୀଜଗନ୍ନାଥଙ୍କୁ ବସାଇଥିଲେ ବିଶ୍ୱଜିତ, ଯାହା ବେଶ୍ ଆକର୍ଷଣୀୟ ହୋଇଥିଲା। ପରିବାର, ସମ୍ପର୍କୀୟ ଏହାକୁ ଦେଖିବା ପରେ ତାଙ୍କୁ ପ୍ରେରଣା ଦେଇଥିଲେ। ଆଇସ୍କ୍ରିମ କାଠିକୁ ନେଇ ସେ ଆଗକୁ ବଢିବାକୁ ସ୍ବପ୍ନ ଦେଖିଥିବା ବିଶ୍ୱଜିତ କହିଛନ୍ତି।
