ପୁରୀ ଅଫିସ, ୨୮ା୧୧: ଏକ ଆବେଗମୟ ମୁହୂର୍ତ୍ତର ପରିସମାପ୍ତି ଘଟିଛି। ଶୁକ୍ରବାର ଶ୍ରୀମନ୍ଦିର ରତ୍ନସିଂହାସନରେ ମହାପ୍ରଭୁଙ୍କର ଦୁର୍ଲଭ ନାଗାର୍ଜୁନ ବେଶ ହୋଇଛି। ଦୀର୍ଘ ୨୫ବର୍ଷ ପରେ ପଡ଼ିିଥିବା ଏହି ବେଶ କିନ୍ତୁ ଦେଖିପାରି ନାହାନ୍ତି ଭକ୍ତ। ବିଷାଦ ଓ ଅବସୋସ ମଧ୍ୟରେ ଶେଷ ହୋଇଛି ବିଶ୍ୱନିୟନ୍ତାଙ୍କ ବୀର ବେଶ। ଏଥିସହ ଶ୍ରୀମନ୍ଦିର ଇତିହାସରେ ଯୋଡ଼ି ହୋଇଛି ଏକ ନୂଆ ଅଧ୍ୟାୟ। ବିନା ଭକ୍ତରେ ରଥଯାତ୍ରା ଭଳି ନାଗାର୍ଜୁନ ବେଶ ହୋଇଛି ଶ୍ରଦ୍ଧାଳୁଶୂନ୍ୟ। ଭକ୍ତ-ଭଗବାନଙ୍କ ମଧ୍ୟରେ ଲକ୍ଷ୍ମଣରେଖା ଟାଣିଛି ମହାମାରୀ କରୋନା, ଯେଉଁଥିପାଇଁ ସିଂହଦ୍ୱାରକୁ ପାଦ ନ ପକାଇ ଗୁମୁରି କାନ୍ଦୁଥିବା ଶ୍ରଦ୍ଧାଳୁ କେବଳ ହୃଦୟରେ ଦାରୁଦିଅଁଙ୍କ ଏହି ଯୋଦ୍ଧା ବେଶକୁ ଅନୁଭବ କରିଛନ୍ତି। ଅନ୍ୟପକ୍ଷରେ ଗର୍ଭଗୃହରେ ସେବାୟତଙ୍କ ମଧ୍ୟରେ ବିବାଦ ଯୋଗୁ ନୀତିକାନ୍ତିରେ ୩ଘଣ୍ଟା ବିଳମ୍ବ ଘଟିଛି। ଆଉ ଏହାର ସାକ୍ଷୀ ରହିଛି ରତ୍ନସିଂହାସନ।
ନାଗାର୍ଜୁନ ବେଶ ପାଇଁ ଗୁରୁବାର ରାତି ୧ଟାରେ ଶ୍ରୀମନ୍ଦିରରେ ପହୁଡ଼ ପଡ଼ିଥିଲା। ୨ଟାରେ ଦ୍ୱାରଫିଟା ନୀତି ନିର୍ଘଣ୍ଟ ହୋଇଥିବାବେଳେ ୪୫ ମିନିଟ୍ ବିଳମ୍ବରେ ଦ୍ୱାର ଖୋଲିଥିଲା। ୩ଟା ୨୫ରେ ଭିତରଶୋଧ, ୩ଟା ୩୫ରେ ମଙ୍ଗଳ ଆଳତି ସରିଥିଲା। ଏହାପରେ ଅନ୍ୟାନ୍ୟ ନୀତି ଚାଲିଥିଲା। ଭୋର ୪ଟା ୧୦ରେ ଚକ୍ରକୋଟ ବଳରାମ ଖୁଣ୍ଟିଆଙ୍କ ହରଚଣ୍ଡୀ ସାହି ବାସଭବନରୁ କଡ଼ା ସୁରକ୍ଷା ମଧ୍ୟରେ ନାଗାର୍ଜୁନ ବେଶ ଶ୍ରୀମନ୍ଦିରକୁ ବିଜେ କରାଯାଇଥିଲା। ଭୋର ୪ଟା ୩୫ରେ ଅବକାଶ ପୂଜା ବଢ଼ିବା ପରେ ୪୫ ମିନିଟ୍ ବିଳମ୍ବ ଅର୍ଥାତ୍ ୪ଟା ୪୫ରେ ନାଗାର୍ଜୁନ ବେଶ ଆରମ୍ଭ ହୋଇଥିଲା। ବେଶ ଶୃଙ୍ଗାରର ଅଳ୍ପ କେଇ ମିିନିଟ୍ ପରେ ଖୁଣ୍ଟିଆ ଏବଂ ସିଂହାରୀ ସେବାୟତଙ୍କ ମଧ୍ୟରେ ବିବାଦ ଦେଖାଦେଇଥିଲା। ରତ୍ନସିଂହାସନରେ ଅଧିକ ସିଂହାରୀ ସେବାୟତ ଥିବା ଖୁଣ୍ଟିଆ ସେବକ ଅଭିଯୋଗ ଆଣି କାହାକୁ ସେମାନେ ସ୍ବର୍ଣ୍ଣ ଅଳଙ୍କାର ମଣତି (ଅଳଙ୍କାର ଗଣତି କରି ହେପାଜତରେ ଦେବା) ଦେବେ ସେ ନେଇ ଆପତ୍ତି ଉଠାଇଥିଲେ। ଫଳରେ ବେଶ ଶୃଙ୍ଗାର ବନ୍ଦ ରହିଥିଲା। ଏହାପରେ ପ୍ରଶାସନିକ ଅଧିକାରୀ ପହଞ୍ଚତ୍ ବୁଝାଶୁଝା କରିଥିଲେ। ଆପୋସ ସମାଧାନ ପାଇଁ ଉଦ୍ୟମ ଭିତରେ ସମୟ ଗଡ଼ିଥିଲା। ସମାଧାନ ପରେ ଠାକୁରଙ୍କୁ ନାଗାର୍ଜୁନ ବେଶରେ ବିଭୂଷିତ କରାଯାଇଥିଲା। ଭୋର ୪ଟାରୁ ବେଶ ଆରମ୍ଭ ହୋଇ ସକାଳ ୭ଟାରେ ଶେଷ ହେବାକୁ ପୂର୍ବରୁ ନୀତି ନିର୍ଘଣ୍ଟ ହୋଇଥିଲା। ମାତ୍ର ଏହି ବିବାଦ ଯୋଗୁ ୩ ଘଣ୍ଟା ବିଳମ୍ବ ଅର୍ଥାତ୍ ପୂର୍ବାହ୍ନ ୧୦ଟା ୧୫ରେ ବେଶ ଶୃଙ୍ଗାର ସରିଥିଲା। ଏହାପରେ ଅନ୍ୟାନ୍ୟ ନୀତି ଚାଲିଥିଲା। ପୂର୍ବାହ୍ନ ୧୧ଟା ୫ରେ ଗୋପାଳ ବଲ୍ଲଭ, ମଧ୍ୟାହ୍ନ ୧୨ଟା ୨୫ରେ ସକାଳ ଧୂପ ଏବଂ ଅପରାହ୍ନ ୧ଟା ୪୫ରେ ବାଳଧୂପ ବଢ଼ିଥିଲା। ତେବେ ଅପରାହ୍ନ ସାଢେ ୧ଟାରେ ଭୋଗମଣ୍ଡପ ଶେଷ ପାଇଁ ସମୟ ନିର୍ଘଣ୍ଟ ହୋଇଥିବାବେଳେ ଏଥିରେ ଦେଢଘଣ୍ଟା ବିଳମ୍ବ ଘଟିଥିଲା। ଅପରାହ୍ନ ୩ଟାରେ ଭୋଗମଣ୍ଡପ ବଢ଼ିଥିଲା। ସେହିପରି ୨ଟାରେ ବେଶ ଓଲାଗି ପାଇଁ ସମୟ ଧାର୍ଯ୍ୟ ହୋଇଥିବାବେଳେ ୩ଟା ୫୫ରେ ଏହା ଆରମ୍ଭ ହୋଇ ଅପରାହ୍ନ ୫ଟାରେ ସରିଥିଲା। ଏହି ବେଶକୁ ଶ୍ରୀମନ୍ଦିର ପ୍ରଶାସନ ନିଜ ହେପାଜତକୁ ନେଇ ପଶ୍ଚିମ ଦ୍ୱାର ନିକଟ ନୀଳାଦ୍ରି ବିହାର ମ୍ୟୁଜିୟମ୍ରେ ସାଇତି ରଖିଛି। ଏହାପରେ ମହାପ୍ରଭୁଙ୍କର ଅନ୍ୟାନ୍ୟ ନୀତିକାନ୍ତି କରାଯାଇଛି।
ଏ ସମ୍ପର୍କରେ ମୁଖ୍ୟ ପ୍ରଶାସକ ଡ. କ୍ରିଷନ କୁମାର କହିଛନ୍ତି, ଦୁଇ ସେବାୟତ ଗୋଷ୍ଠୀଙ୍କ ମଧ୍ୟରେ ସମନ୍ବୟର ଅଭାବ ଯୋଗୁ ନୀତିରେ ବିଳମ୍ବ ଘଟିଲା। ଏହାର ତର୍ଜମା କରାଯାଇ ଆଗକୁ ମହାପ୍ରଭୁଙ୍କ ନୀତିକାନ୍ତି କିପରି ଶୃଙ୍ଖଳିତ ହେବ ତାହା ଉପରେ ଗୁରୁତ୍ୱ ଦିଆଯିବ। ସେହିପରି ଜିଲାପାଳ ବଲୱନ୍ତ ସିଂ କହିଛନ୍ତି, ବିବାଦ ପରେ ଉଭୟ ପକ୍ଷ ସେବାୟତଙ୍କ ମଧ୍ୟରେ ଆପୋସ ସମାଧାନ ହୋଇଛି। ପ୍ରଶାସନ ଅନୁରୋଧକୁ ରକ୍ଷା କରି ସହଯୋଗ କରିଥିବାରୁ ଶ୍ରଦ୍ଧାଳୁ, ସେବାୟତ ସମସ୍ତଙ୍କୁ ଜିଲାପାଳ ଧନ୍ୟବାଦ ଦେଇଛନ୍ତି।