ପୁରୀ ଅଫିସ,୨୭।୧୧: ସବୁ ପ୍ରତୀକ୍ଷାର ଅନ୍ତ ଘଟିଛି । ଦୁର୍ଲଭ ନାଗାର୍ଜୁନ ବେଶକୁ ନେଇ ଚାଲଥିବା ଚର୍ଚ୍ଚା, ଆଲୋଚନାରେ ବି ପୂର୍ଣ୍ଣଛେଦ ପଡିଛି। ବୀର ବେଶରେ ସଜେଇ ହୋଇଛନ୍ତି ମହାପ୍ରଭୁ । ଝଲସିଉଠୁଛି ଶ୍ରୀମନ୍ଦିର ରତ୍ନସିଂହାସନ। କିନ୍ତୁ ବିଡ଼ମ୍ବନା ଦୀର୍ଘ ୨୫ ବର୍ଷ ପରେ ପଡିଥିବା ଏହି ଦିବ୍ୟ ବେଶକୁ ଦେଖିପାରୁନାହାନ୍ତି ଭକ୍ତ। କରୋନା ମହାମାରୀ ଟାଣିଛି ଲକ୍ଷ୍ମଣରେଖା। ଭକ୍ତଙ୍କୁ ସିଂହଦ୍ୱାର ମନା । ୧୪୪ ଧାରା ନିୟମକୁ ଉଲ୍ଲଂଘନ ନ କରି କିଏ ଘରେ ଥାଇ ତ ପୁଣି କେହି ବଡ଼ଦାଣ୍ଡର କଟକଣା ବ୍ୟାରିକେଡ ବାହାରେ ଠିଆ ହୋଇ ମହାପ୍ରଭୁଙ୍କୁ ପ୍ରାର୍ଥନା କରୁଛନ୍ତି । ତେବେ ଏହା ଭିତରେ ମହାପ୍ରଭୁଙ୍କ ନୀତିକାନ୍ତିରେ ବହୁ ବିଳମ୍ବ ଘଟିଛି । ସେବାୟତଙ୍କ ମଧ୍ୟରେ ବିବାଦ ଯୋଗୁ ପ୍ରାୟ ୩ ଘଣ୍ଟା ବିଳମ୍ବରେ ମହାପ୍ରଭୁଙ୍କ ନାଗାର୍ଜୁନ ବେଶ ସରିଛି। ଏଥିପାଇଁ ପ୍ରଶାସନ ପକ୍ଷରୁ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି । ସହରର ବିଭିନ୍ନ ସ୍ଥାନରେ ୨୫ ପ୍ଲାଟୁନ ଫୋର୍ସ ମୁତୟନ ହୋଇଥିବା ବେଳେ କେନ୍ଦ୍ରାଞ୍ଚଳ ଡିଆଇଜି ଆଶିଷ ସିଂଙ୍କ ପ୍ରତ୍ୟକ୍ଷ ତତ୍ତ୍ବାବଧାରେ ସୁରକ୍ଷା ବ୍ୟବସ୍ଥା କଡ଼ାକଡ଼ି ହୋଇଛି ।
ଗୁରୁବାର ରାତି ୪ଟା ୧୦ରେ ହରଚଣ୍ଡୀସାହିସ୍ଥିତ ଚକ୍ରକୋଟ ବଳରାମ ଖୁଣ୍ଟିଆଙ୍କ ଘରୁ ବେଶ ଶ୍ରୀମନ୍ଦିରକୁ ବିଜେ କରିଥିଲା । ଭୋର ୪ଟା ୩୫ରେ ଅବକାଶ ପୂଜା ସରିଥିବା ବେଳେ ନାଗାର୍ଜୁନ ବେଶ ପାଇଁ ଆରମ୍ଭ ହୋଇଥିଲା ପ୍ରକ୍ରିୟା । ମାତ୍ର ସୁନା ଅଳଙ୍କାର ମଣତିକୁ ନେଇ ସେବାୟତଙ୍କ ମଧ୍ୟରେ ବିବାଦ ଯୋଗୁ ସକାଳ ୭ଟାରେ ଶେଷ ହେବାକୁ ଥିବା ନାଗାର୍ଜୁନ ବେଶ ପୂର୍ବାହ୍ନ ୧୦ଟା ୧୫ରେ ସରିଥିଲା ।