ପୁରୀ ଅଫିସ,୧୭।୧୦: ଆସନ୍ତା ନଭେମ୍ବର ୨୭ରେ ନାଗାର୍ଜୁନ ବେଶ। ମାତ୍ର ମହାପ୍ରଭୁଙ୍କ ଏହି ବୀର ବେଶ ଦର୍ଶନରୁ ଭକ୍ତମାନେ ବଞ୍ଚତ୍ତ ହେବା ଏକପ୍ରକାର ନିଶ୍ଚିତ। କାରଣ ମହାମାରୀ କରୋନା ପାଇଁ ୭ମାସ ହେଲାଣି ଭକ୍ତଙ୍କୁ ଶ୍ରୀମନ୍ଦିରକୁ ଛଡ଼ାଯାଉ ନାହିଁ। ଆଗକୁ ଶୀତ ଦିନ ଆସୁଥିବାରୁ କାର୍ତ୍ତିକ ମାସରେ ଭକ୍ତଙ୍କ ଲାଗି ଶ୍ରୀମନ୍ଦିର ଖୋଲିବା ଆଶା ମଉଳିଗଲାଣି। ମୁଖ୍ୟ ପ୍ରଶାସକ ଶ୍ରୀମନ୍ଦିର ସେବାୟତ ନିଯୋଗ ଏବଂ ବିଭିନ୍ନ ପକ୍ଷଙ୍କ ସହ ଆଲୋଚନା କରିବା ସମୟରେ ଅଧିକାଂଶ କାର୍ତ୍ତିକ ମାସ ଶେଷ ପର୍ଯ୍ୟନ୍ତ ମନ୍ଦିର ନ ଖୋଲିବାକୁ ମତ ଦେଇଛନ୍ତି। ତେଣୁ କାର୍ତ୍ତିକର ପଞ୍ଚକରେ ପଡୁଥିବା ନାଗାର୍ଜୁନ ବେଶ ଦର୍ଶନରୁ ଭକ୍ତମାନେ ବଞ୍ଚତ୍ତ ହୋଇପାରନ୍ତି। ୨୬ବର୍ଷ ପରେ ପଡୁଥିବା ଏହି ବେଶରେ ମହାପ୍ରଭୁଙ୍କ ଦର୍ଶନ ନ ହେଲେ ନାହିଁ ପତିତପାବନଙ୍କୁ ଦର୍ଶନ କରିବାର ଭକ୍ତ ଆଶା ରଖିଛନ୍ତି। ତେଣୁ ଏଥର ପତିତପାବନଙ୍କୁ (ରନତ୍ସିଂହାସନରେ ଦାରୁଦିଅଁଙ୍କୁ ଯେପରି) ନାଗାର୍ଜୁନ ବେଶ କରିବାକୁ ସେବକମାନେ ପ୍ରସ୍ତୁତ ଅଛନ୍ତି। ସେହିପରି ବ୍ୟାରିକେଡକୁ ଅରୁଣ ସ୍ତମ୍ଭ ନିକଟକୁ ଘୁଞ୍ଚାଇ ଭକ୍ତଙ୍କୁ ପତିତପାବନଙ୍କ ଦର୍ଶନ ସୁବିଧା ଦେବା ପାଇଁ ମୁଖ୍ୟ ପ୍ରଶାସକଙ୍କ ଦୃଷ୍ଟି ଆକର୍ଷଣ କରାଯାଇଛି। ଆବଶ୍ୟକ ପଡ଼ିିଲେ ଅନ୍ଲାଇନରେ ଭକ୍ତଙ୍କ ପାଇଁ ପତିତପାବନଙ୍କ ଦର୍ଶନ ବ୍ୟବସ୍ଥା କରାଗଲେ ଭଲ ହେବ ବୋଲି ପରିଚାଳନା କମିଟି ସଦସ୍ୟ ମାଧବ ମହାପାତ୍ର କହିଛନ୍ତି।
