ଭୁବନେଶ୍ୱର,୧୫।୨: ବେଙ୍ଗାଲୁରୁରେ ଚାଲିଥିବା ନାଗେଶ ଟ୍ରଫି ଜାତୀୟ ଦୃଷ୍ଟିହୀନ ଟି୨୦ କ୍ରିକେଟ ଟୁର୍ନାମେଣ୍ଟର କ୍ୱାର୍ଟର ଫାଇନାଲ ମ୍ୟାଚରେ ବିଜୟୀ ହେବା ସହ ଓଡ଼ିଶା ସେମିଫାଇନାଲରେ ପ୍ରବେଶ କରିଛି। ରବିବାର ସଚିନ ତେନ୍ଦୁଲକର ଷ୍ଟାଡିୟମରେ ଅନୁଷ୍ଠିତ ତୃତୀୟ କ୍ୱାର୍ଟର ଫାଇନାଲରେ ଓଡ଼ିଶା ୮୯ ରନରେ ଝାଡଖଣ୍ଡକୁ ହରାଇ ସେମି ଫାଇନାଲ ଖେଳିବାକୁ ଯୋଗ୍ୟତା ହାସଲ କରିଛି। ଟସ୍ ଜିତି ଓଡ଼ିଶା ପ୍ରଥମେ ବ୍ୟାଟିଂ କରି ୨୦ ଓଭରରେ ଝାଡଖଣ୍ଡ ପାଇଁ ୨୧୧ ରନର ଟାର୍ଗେଟ ଧାର୍ଯ୍ୟ କରିଥିଲା। ଓଡ଼ିଶା ତରଫରୁ ନକୁଳ ୮୧, ଲିଙ୍ଗରାଜ ୪୪, ଶୁଖରାମ ୨୮, ପଙ୍କଜ ୨୦ ଓ କାଳିଆ ୧୬ ରନ କରିଥିଲେ।
ଜବାବରେ ଝାଡଖଣ୍ଡ ବ୍ୟାଟିଂ ଆରମ୍ଭ କରି ୨୦ ଓଭରରେ ୭ ଉଇକେଟ ହରାଇ ମାତ୍ର ୧୨୨ ରନ କରି ଆତ୍ମସମର୍ପଣ କରିଥିଲା। ବୋଲିଂରେ ଓଡ଼ିଶା ତରଫରୁ ପଙ୍କଜ ଭୁଏ ୩, ତପନ ଗୌଡ଼ ୨ ଓ ସିଙ୍ଗରାଇ ମାଜି ଗୋଟିଏ ଉଇକେଟ ଅକ୍ତିଆର କରିଥିଲେ। ଦମ୍ଦାର ପ୍ରଦର୍ଶନ ପାଇଁ ନକୁଳ ମ୍ୟାନ ଅଫ୍ ଦି ମ୍ୟାଚ୍ ବିବେଚିତ ହୋଇଥିଲେ। ସୋମବାର ଓଡ଼ିଶା ସେମିଫାଇନାଲରେ କର୍ନାଟକକୁ ଭେଟିବ। ସେହିପରି ଦ୍ୱିତୀୟ ସେମିରେ ହରିୟାଣା ଓ ଆନ୍ଧ୍ରପ୍ରଦେଶ ମୁହଁାମୁହିଁ ହେବେ।