ରାୟଗଡା,୧୧।୯ (ଭାଗ୍ୟଶ୍ରୀ ମିଶ୍ର ): ରାଜପଥ ବିଭାଗର ଖାମଖିଆଲି ମନୋଭାବ ଯୋଗୁ ବର୍ଷ ବର୍ଷ ଧରି ରାଜପଥଗୁଡ଼ିକର ନିର୍ମାଣ କି ମରାମତି ହେଉନି। ରାୟଗଡ଼ା ଜିଲା ଦେଇ ଯାଇଥିବା ୩୨୬ ନମ୍ବର ଜାତୀୟ ରାଜପଥ ଦୀର୍ଘଦିନ ହେଲା ମରାମତି ଅଭାବରୁ ମରଣଯନ୍ତା ପାଲଟିଛି। ରାୟଗଡା ସହରର ରିଲାଏନ୍ସ ପେଟ୍ରୋଲ ପମ୍ପଠାରୁ ଆରମ୍ଭକରି ଅମ୍ଲାଭଟା ଛକ ପର୍ଯ୍ୟନ୍ତ ଜାତୀୟ ରାଜପଥ ଶୋଚନୀୟ ହୋଇପଡ଼ିଛି। ଏଥିସହ ନାଗାବଳୀ ବ୍ରିଜ୍ ଏବଂ ନାଇପେଟା ବ୍ରିଜ ବହୁତ ପୁରୁଣା ହୋଇଥିବାବେଳେ ମରାମତି କରାଯାଉ ନ ଥିବାରୁ ଏହା ବିପଦସଙ୍କୁଳ ହୋଇପଡ଼ିଛି। ବ୍ରିଜ୍ ଦେଇ କୌଣସି ଭାରିଯାନ ଗଲେ ଏହା ଜୋରରେ ହଲୁଥିବାରୁ କୌଣସି ମୁହୂର୍ତ୍ତରେ ଅଘଟଣ ଘଟିବା ଆଶଙ୍କା ଥିବା ବୁଦ୍ଧିଜୀବୀ କହିଛନ୍ତି। ବ୍ରିଜଗୁଡିକ ବହୁ ପୁରୁଣା ହୋଇଥିବାରୁ ସେଥିରୁ କାଡପା ପ୍ଲେଟ, ସିମେଣ୍ଟ ଛାଡି ଲୁହା ଛଡ଼ ବାହାରି ପଡ଼ିଲାଣି। ତେବେ ବ୍ରିଜର ଅବସ୍ଥା ଶୋଚନୀୟ ଥିଲେ ମଧ୍ୟ ପ୍ରତିଦିନ ଶତାଧିକ ଭାରିଯାନ ଏହି ବ୍ରିଜ୍ ଦେଇ ବିପଦପୂର୍ଣ୍ଣ ଭାବେ ଯାତାୟାତ କରୁଛନ୍ତି। ବର୍ଷା ହେଲେ ରାସ୍ତାରେ ଥିବା ଖାଲରେ ପାଣି ଜମି ରହୁଥିବାରୁ ଲୋକେ ଜାଣି ନ ପାରି ଅନେକ ସମୟରେ ଦୁର୍ଘଟଣାର ସମ୍ମୁଖୀନ ହେଉଥିବା ଦେଖିବାକୁ ମିଳୁଛି। ରାଜପଥ ପଡୋଶୀ ଆନ୍ଧ୍ରପ୍ରଦେଶ, ଛତିଶଗଡ, ବ୍ରହ୍ମପୁର ଓ କୋରାପୁଟକୁ ସଂଯୋଗ କରୁଥିବାରୁ ଉକ୍ତ ରାସ୍ତାରେ ପ୍ରତିଦିନ ନେତା, ମନ୍ତ୍ରୀମାନେ ଯିବା ଆସିବା କରୁଥିଲେ ମଧ୍ୟ ରାସ୍ତାର ଅବସ୍ଥା ଉପରେ କାହାର ନଜର ପଡୁ ନ ଥିବା ଅଭିଯୋଗ ହେଉଛି। ଅନ୍ୟପକ୍ଷେ ବ୍ରିଜ୍ ମରାମତି ପାଇଁ ଅଞ୍ଚଳବାସୀ ଅଭିଯୋଗ କଲେ, ବିଭାଗୀୟ କର୍ତ୍ତୃପକ୍ଷ କାମଚଳା ନୀତିରେ ଖାଲଖମାରେ ମାଟି, ସିମେଣ୍ଟ ଭରି ଦେଇ ଚୁପ ବସୁଛନ୍ତି। ତୁରନ୍ତ ରାସ୍ତା ମରାମତି ସହ ବ୍ରିଜର ସ୍ଥାୟୀ ସମାଧାନ ପାଇଁ ଅଞ୍ଚଳବାସୀ ଦାବି କରିଛନ୍ତି।
ସୂଚନାଯୋଗ୍ୟ,ଗତ କିଛି ଦିନ ତଳେ ରାୟଗଡା ଜିଲା କଲ୍ୟାଣସିଂପୁରର ଉପରସାଜା ଗ୍ରାମରେ ନିର୍ମାଣାଧୀନ ବ୍ରିଜ ଭୁଶୁଡି ୪ ଶିଶୁଙ୍କ ସମେତ ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଥିଲା। ଏହି ଘଟଣା ଜିଲା ତଥା ରାଜ୍ୟରେ ଆଲୋଡନ ସୃଷ୍ଟି କରିଥିଲା l ତେଣୁ ଏହି ୨ଟି ପୁରୁଣା ବ୍ରିଜ୍ରେ କିଛି ଦୁର୍ଘଟଣା ଘଟିବା ପୂର୍ବରୁ ରାଜପଥ ବିଭାଗ ତୁରନ୍ତ ମରାମତି କରିବାକୁ ଦାବି ହୋଇଛି। ଏ ନେଇ ରାୟଗଡାର ଜଣେ ଆଇନଜୀବୀ ଲାବଣ୍ୟ ମୋହନ ପଟ୍ଟନାୟକ କହିଛନ୍ତି, ଏଭଳି ବିପଦପୂର୍ଣ୍ଣ ରାସ୍ତା ଦେଇ ଯିବା ଆସିବା କରିବାକୁ ଭୟ ଲାଗୁଛି। ତେଣୁ ତୁରନ୍ତ ରାସ୍ତା ମରାମତି କରିବାକୁ ସେ ଦାବି କରିଛନ୍ତି l ରାୟଗଡ଼ା ଜାତୀୟ ରାଜପଥ କାର୍ଯ୍ୟାଳୟରେ ଅବସ୍ଥାପିତ ଏସ୍ଡିଓ ବିକ୍ରମ ପାଣିଗ୍ରାହୀ ସୁନାବେଡାରେ ଥିବା ମୁଖ୍ୟ ଡିଭିଜନ କାମ ଥିବା ଦର୍ଶାଇ ରାୟଗଡାରେ ଅନୁପସ୍ଥିତ ରହୁଛନ୍ତି। ଫଳରେ ଲକ୍ଷ୍ମୀପୁର ଜେଇଙ୍କୁ ରାୟଗଡା ଅତିରିକ୍ତ ଦାୟିତ୍ୱ ଦିଆଯାଇଥିବାବେଳେ ସେ ମଧ୍ୟ ଅଧିକାଂଶ ସମୟରେ ଅନୁପସ୍ଥିତ ରହୁଥିବାରୁ ୪ ଜଣ ପିଅନଙ୍କୁ ନେଇ ଚାଲିଛି ଜାତୀୟ ରାଜପଥ ବିଭାଗ l ତେଣୁ ଜାତୀୟ ରାଜପଥରେ ଏକ ସ୍ଥାୟୀ ଜେଇଙ୍କୁ ନିଯୁକ୍ତି କରିବାକୁ ମଧ୍ୟ ସାଧାରଣରେ ଦାବି ହୋଇଛି। ରାଜପଥ ସମସ୍ୟା ସମ୍ପର୍କରେ ପାଣିଗ୍ରାହୀଙ୍କୁ ଫୋନ୍ ଯୋଗେ ଯୋଗାଯୋଗ କରିବାରୁ ଉପରିସ୍ଥ ଅଧିକାରୀଙ୍କୁ ନୂତନ ବ୍ରିଜ ପାଇଁ ପ୍ରସ୍ତାବ ଦିଆଯାଇଛି। ତେବେ ବ୍ରିଜ୍ ମରାମତି କାମ ଅତିଶୀଘ୍ର ଆରମ୍ଭ କରାଯିବ ବୋଲି ସେ କହିଛନ୍ତି l