ବଅଁରପାଳ, ୪।୩ (ଡି.ଏନ.ଏ.): ଅନୁଗୋଳ ଜିଲା ନାଲ୍କୋ ଥାନା ଅଞ୍ଚଳରେ ଅପରାଧ ସଂଖ୍ୟା ବୃଦ୍ଧି ପାଉଛି। ବିଶେଷକରି ଘନ ଘନ ଚୋରି ଅଞ୍ଚଳବାସୀଙ୍କ ଚିନ୍ତାର କାରଣ ପାଲଟିଛି। ପୋଲିସ ପକ୍ଷରୁ ପାଟ୍ରୋଲିଂ ବ୍ୟବସ୍ଥାକୁ କଡ଼ାକଡ଼ି କରାଯାଉ ନ ଥିବାରୁ ଏପରି ଅସାମାଜିକ କାର୍ଯ୍ୟକଳାପ ବୃଦ୍ଧି ପାଉଥିବା ଆଲୋଚନା ହେଉଛି।
ଗତ ୧୮ ତାରିଖ ରାତିରେ ନାଲ୍କୋ କଲୋନୀର କ୍ୱାର୍ଟର୍ସ ନଂ. ୧୦୦୧ରେ ପଶି ଦୁର୍ବୃତ୍ତମାନେ ଗଡ଼ରେଜ ଭାଙ୍ଗି ସୁନା ଗହଣା ନେଇଯାଇଥିବା ଥାନାରେ ଅଭିଯୋଗ ହୋଇଥିଲା। ସେହି ରାତିରେ କୁଲାଡ଼ ଗ୍ରାମର ଜଣେ ମହିଳାଙ୍କ କବାଟ ଭାଙ୍ଗି ଦୁର୍ବୃତ୍ତମାନେ ଗହଣା ଚୋରି କରିଥିବା ଥାନାରେ ଏତଲା ଦିଆଯାଇଥିଲା। ସେହିପରି ନାଲ୍କୋ ସ୍ମେଲଟର ପ୍ଲାଣ୍ଟରେ ୨୪ ଘଣ୍ଟିଆ ସୁରକ୍ଷା ବ୍ୟବସ୍ଥା ଥିଲେ ମଧ୍ୟ ଦୁର୍ବୃତ୍ତମାନେ ଲକ୍ଷାଧିକ ଟଙ୍କାର କେବୁଲ ଓ କପର ସ୍ମେଲଟର ଷ୍ଟୋରରୁ ଚୋରାଇ ନେଇଥିବା ଅଭିଯୋଗ ହୋଇଛି। ସେହିପରି ଦୁର୍ବୃତ୍ତମାନଙ୍କ କବଳରୁ ମନ୍ଦିର ମଧ୍ୟ ବାଦ୍ ପଡ଼ିନାହିଁ। ବଳରାମପ୍ରସାଦ ଶିବ ମନ୍ଦିରରେ ପଶି ଦୁର୍ବୃତ୍ତମାନେ ହୁଣ୍ଡି ବାକ୍ସ ଭାଙ୍ଗି ବହୁ ଟଙ୍କା ଲୁଟି ନେଇଥିବା ବେଳେ ମା’ଦୁର୍ଗା ମନ୍ଦିରରୁ ସୁନା ଗହଣା ଚୋରାଇ ନେଇଛନ୍ତି। ବୁଧବାର ରାତିରେ ପିଙ୍ଗୁଆ ଗ୍ରାମର ଜଣେ ବ୍ୟକ୍ତିଙ୍କ ଘରେ ପଶି ଲକ୍ଷାଧିକ ଟଙ୍କାର ଲୁହାଛଡ଼ ଚୋରି କରିଛନ୍ତି। ଦୈନିକ ରାତିରେ ଏପରି ଆପରାଧିକ କାର୍ଯ୍ୟକଳାପ ବଢ଼ୁଥିବାବେଳେ ପୋଲିସର ନୀରବତାକୁ ନେଇ ସାଧାରଣରେ ଅସନ୍ତୋଷ ଦେଖାଦେଇଛି। ନାଲ୍କୋ ପକ୍ଷରୁ ଥାନାକୁ ଗାଡ଼ି ଓ କର୍ମଚାରୀମାନଙ୍କୁ ଘର ଯୋଗାଇ ଦିଆଯାଇଥିଲେ ମଧ୍ୟ ଅଞ୍ଚଳରେ ଅପରାଧ ସଂଖ୍ୟା ବଢ଼ି ଚାଲିବା ଯୋଗୁ ଅସନ୍ତୋଷ ସୃଷ୍ଟି ହୋଇଛି। ଏ ସମ୍ପର୍କରେ ଅନୁଗୋଳ ଏସ୍ଡିପିଓ ରମାକାନ୍ତ ମହାଳିକ କହିଛନ୍ତି, ଦୁର୍ବୃତ୍ତମାନଙ୍କୁ ଧରିବା ପାଇଁ ସ୍ବତନ୍ତ୍ର ଟିମ୍ ନିୟୋଜିତ କରାଯାଇଛି। ଏଥିପାଇଁ ୨୦୦ କର୍ମଚାରୀ କାର୍ଯ୍ୟରେ ଲାଗିଛନ୍ତି।