ଭୁବନେଶ୍ୱର,୩୧ା୧୨: ନବରତ୍ନ ରାଷ୍ଟ୍ରାୟତ୍ତ ଉଦ୍ୟୋଗ ନ୍ୟାଶନାଲ ଆଲୁମିନିୟମ କମ୍ପାନୀ ଲିମିଟେଡ୍ (ନାଲ୍କୋ)ର ନୂତନ ଡାଉନଷ୍ଟ୍ରିମ୍ ଉତ୍ପାଦର ଶୁଭାରମ୍ଭ କରାଯାଇଛି। ବିଶେଷକରି କମ୍ପାନୀର ନୂତନ ଡାଉନଷ୍ଟ୍ରିମ୍ ଉତ୍ପାଦ ‘ଆଲୁମିନିୟମ୍ ଏଲ୍ଇଡି କ୍ୟାପ୍ ଷ୍ଟକ୍ ଏଲୋୟ ଏଏ୧୧୦୦ର କଏଲ୍ ଫର୍ମ ଏଚ୧୨ ସହ ଶୁଭାରମ୍ଭ କରାଯାଇଛି। ଏପରିକି ନିକଟରେ ଓଡ଼ିଶା ଗସ୍ତରେ ଆସି ଭୁବନେଶ୍ବରସ୍ଥିତ ନାଲ୍କୋ କର୍ପୋରେଟ୍ କାର୍ଯ୍ୟାଳୟ ପରିଦର୍ଶନ ସମୟରେ କେନ୍ଦ୍ର ଖଣି ସଚିବ ବିବେକ ଭରଦ୍ୱାଜଙ୍କ ଦ୍ବାରା ଆଭାସି ମାଧ୍ୟମରେ ଅନୁଗୋଳସ୍ଥିତ ନାଲ୍କୋର ସ୍ମେଲଟର ୟୁନିଟ୍ର ଆର୍ପିୟୁଠାରୁ ଉକ୍ତ ଉତ୍ପାଦର ଆନୁଷ୍ଠାନିକ ଭାବେ ଶୁଭାରମ୍ଭ ହୋଇଯାଇଛି। ଏହି ପରିପ୍ରେକ୍ଷୀରେ ନାଲ୍କୋ ସିଏମ୍ଡି ଶ୍ରୀଧର ପାତ୍ର, ଭାରତ ସରକାରଙ୍କ ଖଣି ମନ୍ତ୍ରଣାଳୟ ଯୁଗ୍ମ ସଚିବ ଡ. ବୀଣା କୁମାରୀ ଡି, ନାଲ୍କୋର ନିର୍ଦ୍ଦେଶକ ମଣ୍ଡଳୀ ଏବଂ ଅନ୍ୟାନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ। ଉକ୍ତ ଉନ୍ମୋଚନ କାର୍ଯ୍ୟକ୍ରମର ଏକ ଅଂଶ ଭାବେ ଉତ୍ପାଦନ ୟୁନିଟ୍ ଅର୍ଥାତ୍ ଅନୁଗୋଳ ନାଲ୍କୋ ସ୍ମେଲଟର ପ୍ଲାଣ୍ଟରେ ରୋଲ୍ଡ୍ ପ୍ରଡକ୍ଟ ୟୁନିଟ୍ରେ ସ୍ବତନ୍ତ୍ର ବ୍ୟବସ୍ଥା କରାଯାଇ ଉତ୍ପାଦର ପ୍ରଥମ ସାମଗ୍ରୀକୁ ମଧ୍ୟ ପଠାଯାଇଥିଲା। ଏହା ସାଧାରଣତଃ ଏଲ୍ଇଡି ବଲ୍ବରେ କ୍ୟାପ୍ ଭାବେ ବ୍ୟବହୃତ ହୁଏ, ଯାହା ବଲ୍ବ ନିମନ୍ତେ ଉତ୍ତାପ ନିୟନ୍ତ୍ରଣର ଭାବେ କାମ କରେ। ଉତ୍ତାପ ନିୟନ୍ତ୍ରଣର ପ୍ରୟୋଗଗୁଡ଼ିକ ପାଇଁ ଆଲୁମିନିୟମ୍ ଏକ ଆଦର୍ଶ ଓ ଉପଲବ୍ଧ ପଦାର୍ଥ ଭାବେ ପରିଗଣିତ ହୋଇଥାଏ। ଏପରିକି ଏହା ଏଲ୍ଇଡି ବଲ୍ବ କ୍ୟାପ୍ ପାଇଁ ଏଏ୧୧୦୦ ଅଧିକ ଉପଯୁକ୍ତ।