ଉମରକୋଟ, ୨୪।୧(ସ୍ବ.ପ୍ର.):ନବରଙ୍ଗପୁର ଜିଲା ଉମରକୋଟ ବ୍ଲକ ଅଧୀନ ବଡ଼କୁମାରି ପଞ୍ଚାୟତର ଅନେକ ହିତାଧିକାରୀ ଏବେବି ବଞ୍ଚିତ ଅଛନ୍ତି ଆବାସ ଘରରୁ। ଗରିବ ବାସହୀନ ଲୋକଙ୍କ ପାଇଁ ସରକାର ପକ୍କା ଘର ଯୋଗେଇବା ପାଇଁ ଯୋଜନା ପ୍ରସ୍ତୁତି କରୁଥିବାବେଳେ ବାସ୍ତବ ଚିତ୍ର କିଛି ଅଲଗା ରହିଛି। ପ୍ରଧାନମନ୍ତ୍ରୀ ଆବାସ ଯୋଜନା ସାମ୍ଭାବ୍ୟ ଯୋଗ୍ୟ ହିତାଧିକାରୀଙ୍କ ତାଲିକା ପ୍ରକାଶ ପାଇଥିବାବେଳେ ବଡ଼କୁମାରି ପଞ୍ଚାୟତରେ ଅନେକ ହିତାଧିକାରୀ ଆବାସ ଘରରୁ ବଞ୍ଚତ୍ତ ହୋଇଛନ୍ତି। ବଡ଼କୁମାରୀ ପଞ୍ଚାୟତରେ ୧୯୨ ହିତାଧିକାରୀଙ୍କ ନାମ ତାଲିକାରେ ଥିବାବେଳେ ଅନେକ ଯୋଗ୍ୟ ହିତାଧିକାରୀ ଏହି ତାଲିକାରୁ ବାଦ ପଡିଛନ୍ତି। ସେଥିମଧ୍ୟରୁ ସାନ କୁମାରୀ ଆଦିବାସୀ ଗ୍ରାମର ତୁଳସୀ ରାମ ଗଣ୍ଡ, ହରିହର ଦାଶ, ବିଷମ ଗଣ୍ଡ, ଅଗଷ୍ଟ ଗଣ୍ଡ, ସାଧୁ ଗଣ୍ଡ, ସୋମନାଥ ଗଣ୍ଡ, ମଧୁ ଗଣ୍ଡ, ଜଗତୁ ଭତ୍ରା, ରାମ ଗଣ୍ଡ ଏହି ଭଳି ଅନେକ ହିତାଧିକାରୀ ଅଛନ୍ତି। ଯୋଜନାରୁ ଅନ୍ତର୍ଭୁକ୍ତ ହୋଇନଥିବା ଅନେକ ଲୋକ ଏବେବି ଜରି ପାଲ ଘେରି ଘରେ ରହୁଛନ୍ତି ଏବଂ ଏମାନେ ସମସ୍ତେ ପ୍ରାୟ ଦିନ ମଜୁରିଆ ଭାବେ କାମ କରି ପରିବାର ପୋଷଣ କରିଥାନ୍ତି। ତାଙ୍କ ପ୍ରତି ଅନ୍ୟାୟ ହୋଇଛି, ପୁଣି ଥରେ ସର୍ଭେ କରି ସଠିକ ତାଲିକା ପ୍ରସ୍ତୁତ କରାଯାଉ ବୋଲି ଆବାସ ଯୋଜନାରୁ ବାଦ ପଡିଥିବା ହିତାଧିକାରୀ ସରକାରଙ୍କୁ ଗୁହାରି କରୁଛନ୍ତି। ଯେଉଁ ହିତାଧିକାରୀ ପାଇବା ଯୋଗ୍ୟ ସେମାନଙ୍କୁ ତାଲିକା ରେ ନାମ ନ ଦିଆଯାଇ ଘର ଥିବା ଲୋକଙ୍କୁ ଘର ଯୋଗାଇ ଦିଆଯାଉଛି ବୋଲି ଲୋକେ ଅଭିଯୋଗ କରିଛନ୍ତି। ଏ ବିଷୟରେ ଉମରକୋଟ ବିଡିଓ ଡ ହିମାଞ୍ଚଳ ମାଝିଙ୍କୁ ପଚାରିବାରୁ ଯେଉଁ ଯୋଗ୍ୟ ହିତାଧିକାରୀଙ୍କ ନାମ ତାଲିକାରେ ନାହିଁ, ସେମାନେ କିପରି ଆଗାମୀ ଦିନରେ ଘର ପାଇ ପାରିବେ ଏ ନେଇ ଚେଷ୍ଟା କରାଯିବ ବୋଲି ସେ କହିଛନ୍ତି।