ଭୁବନେଶ୍ୱର,୨୭।୪: ବିଧାନସଭା ନିର୍ବାଚନ ପାଇଁ ବିଜୁ ଜନତା ଦଳ(ବିଜେଡି) ପକ୍ଷରୁ ଶନିବାର ଆଉ ତିନି ଆସନ ପାଇଁ ପ୍ରାର୍ଥୀ ତାଲିକା ଘୋଷଣା କରାଯାଇଛି। ଏହାକୁ ମିଶାଇ ଏଯାବତ ଆଠ ପର୍ଯ୍ୟାୟ କରି ବିଜେଡି ୧୪୪ ଆସନ ପାଇଁ ପ୍ରାର୍ଥୀ ଘୋଷଣା କରିଥିଲେ ମଧ୍ୟ ତିନି ଚର୍ଚ୍ଚିତ ଆସନରେ ଟିକେଟ୍ ଘୋଷଣା କରିପାରି ନାହିଁ। ବାକିଥିବା ତିନି ଆସନ ହେଉଛି ଯାଜପୁର ଜିଲାର କୋରେଇ, ନୟାଗଡ଼ର ଖଣ୍ଡପଡ଼ା ଏବଂ ବାଲେଶ୍ୱରର ନୀଳଗିରି।
ଗତ ତିନି ବିଧାନସଭା ନିର୍ବାଚନରେ ବିଜେଡି କୋରେଇରୁ ତିନି ଜଣଙ୍କୁ ପ୍ରାର୍ଥୀ କରିଛି। ୨୦୦୯ରେ ପ୍ରିତିରଞ୍ଜନ ଘଡେଇ, ୨୦୧୪ରେ ଆକାଶ ଦାସ ନାୟକ ଏବଂ ୨୦୧୯ରେ ଅଶୋକ ବଳଙ୍କୁ ପ୍ରାର୍ଥୀ କରିଥିଲା। ତେବେ ଚଳିତ ନିର୍ବାଚନରେ ବିଜେଡି ଟିକେଟ୍ ନ ପାଇବା ଆଶଙ୍କାରେ ଆକାଶ ଭାଜପାରେ ଯୋଗ ଦେଇଛନ୍ତି। ଏହାପରେ ଭାଜପା ଆକାଶଙ୍କୁ କୋରେଇରୁ ପ୍ରାର୍ଥୀ କରିଛି। ବର୍ତମାନର ବିଧାୟକ ଅଶୋକ ବଳଙ୍କୁ ବିଜେଡି ପୁଣିଥରେ ଟିକେଟ ନ ଦେଇପାରେ। ଚର୍ଚ୍ଚା ହେଉଛି ବିଜେଡି ସାଧାରଣ ସମ୍ପାଦକ ପ୍ରଣବ ପ୍ରକାଶ ଦାସଙ୍କ ସାନଭାଇ ଏଠାରୁ ଟିକେଟ ପାଇ ପାରନ୍ତି। କିଛିଦିନ ପୂର୍ବରୁ କୋରେଇର ପୂର୍ବତନ ବିଧାୟକ ପ୍ରିତିରଞ୍ଜନ ଘଡେ଼ଇଙ୍କ ପତ୍ନୀ ତଥା ଅଭିନେତ୍ରୀ ଝିଲିକ ଭଟ୍ଟାଚର୍ଯ୍ୟଙ୍କୁ କୋରେଇ ଟିକେଟ ମିଳିପାରେ ବୋଲି ଚର୍ଚ୍ଚା ହେଉଥିଲା। ଏସବୁ ଚର୍ଚ୍ଚା ମଧ୍ୟରେ ଏପର୍ଯ୍ୟନ୍ତ କୋରେଇ ଆସନ ଝୁଲି ରହିଛି।
ସେହିପରି ନୟାଗଡ ଜିଲାର ଖଣ୍ଡପଡ଼ା ଆସନ ମଧ୍ୟ ବେଶ ଗୁରୁତ୍ୱପୂର୍ଣ୍ଣ। କାରଣ ବିଧାୟକ ସୌମ୍ୟରଂଜନ ପଟ୍ଟନାୟକଙ୍କୁ ବିଜେଡି ଦଳରୁ ନିଲମ୍ବିତ କରିସାରିଛି। ପୂର୍ବତନ ବିଧାୟକ ଅନୁଭବ ପଟ୍ଟନାୟକ ଏଠାରୁ ବିଜେଡି ଟିକେଟ ପାଇଁ ଆଶାୟୀ ଥିଲେ ମଧ୍ୟ ଖଣ୍ଡପଡାର ବିଜେଡି ଅଙ୍କ ଏପର୍ଯ୍ୟନ୍ତ ଛିଡିପାରୁ ନାହିଁ।
ସେହିଭଳି ବାଲେଶ୍ୱର ଜିଲାର ନୀଳଗିରି ଟିକେଟ ଘୋଷଣା କରିବାକୁ ମଧ୍ୟ ବିଜେଡି ଅକାଳରେ ପଡିଛି। ୨୦୧୪ରେ ବିଜେଡିରୁ ଏବଂ ୨୦୧୯ରେ ଭାଜପାରୁ ଟିକେଟ ପାଇ ବିଧାୟକ ନିର୍ବାଚିତ ହୋଇଥିବା ସୁକାନ୍ତ କୁମାର ନାୟକ ୨୦୨୪ରେ ପୁଣି ବିଜେଡି ଶିବିରକୁ ଫେରିଛନ୍ତି। ଯାହାକୁ ନେଇ ବିଜେଡି ଦ୍ବନ୍ଦରେ ପଡିଛି। ୨୦୧୯ରେ ସୁକାନ୍ତ ବିଜେଡି ପ୍ରାର୍ଥୀ ସନ୍ତୋଷ ଖଟୁଆଙ୍କୁ ମାତ୍ର ୧.୫୭୭ ଖଣ୍ଡ ଭୋଟରେ ପରାଜିତ କରିଥିଲେ। ତେଣୁ ଏଠାରେ ଦୁଇ ନେତାଙ୍କୁ ନେଇ ବିଜେଡିର ଅଙ୍କ ଅଟକିଛି।
