ଭୁବନେଶ୍ୱର, ୨୪।୬, (ତପନ ସ୍ବାଇଁ): ଓଡ଼ିଶା ରାଜ୍ୟ ଆଥ୍ଲେଟିକ୍ସ ମିଟ୍ର ୬୯ତମ ସଂସ୍କରଣ କିଟ୍ ଓ କିସ୍ ପରିସରରେ ଥିବା ଦୂତୀ ଚାନ୍ଦ ଆଥ୍ଲେଟିକ୍ସ ଷ୍ଟାଡିୟମରେ ଆରମ୍ଭ ହୋଇଛି। କିଟ୍ ଓ କିସ୍ର ପ୍ରତିଷ୍ଠାତା ତଥା ଏମ୍ପି ଅଚ୍ୟୁତ ସାମନ୍ତ ମୁଖ୍ୟ ଅତିଥିଭାବେ ଯୋଗଦେଇ ବିଜୁ ପଟ୍ଟନାୟକ ଇନ୍ଡୋର ହଲ୍ରେ ପ୍ରତିଯୋଗିତାକୁ ଉଦ୍ଘାଟନ କରିଥିଲେ। ରାଜ୍ୟ କ୍ରୀଡ଼ା ବିଭାଗର ସୋନାଲି ଚାନ୍ଦ, ଅଲିମ୍ପିଆନ ଅନୁରାଧା ବିଶ୍ୱାଳ ସମ୍ମାନିତ ଅତିଥିଭାବେ ଯୋଗ ଦେଇଥିଲେ। ଓଡ଼ିଶା ଆଥ୍ଲେଟିକ ଆସୋସିଏଶନ ସଭାପତି ଜି.ଏସ୍. ପଟ୍ଟନାୟକ, ସମ୍ପାଦକ ଆଶୀର୍ବାଦ ବେହେରା, ଯୁଗ୍ମ ସମ୍ପାଦକ ଅଶୋକ ସାହୁ, ରବି ନାୟକ, ସହଯୋଗୀ ସମ୍ପାଦକ ବିଭୂତି ଭୂଷଣ ପଣ୍ଡା ଏବଂ ଅନ୍ୟ କର୍ମକର୍ତ୍ତା ଉପସ୍ଥିତ ଥିଲେ। ବୈଷୟିକ ନିର୍ଦ୍ଦେଶକ ଲ୍ୟୁଟନାଣ୍ଟ କଲୋନେଲ ଏ. ରାଜେଶ, ଚିଫ୍ ଅପରେଟିଂ ଅଫିସର କ୍ୟାପ୍ଟେନ ଦୀନେଶ ସୁରୀ ପ୍ରମୁଖ ସ୍ବତନ୍ତ୍ରଭାବେ ଆମନ୍ତ୍ରିତ ହୋଇଥିଲେ। ବିଭିନ୍ନ ବୟସ ବର୍ଗ (ଉଭୟ ମହିଳା ଓ ପୁରୁଷ)ରେ ୧୫୦୦ରୁ ଊର୍ଦ୍ଧ୍ୱ ଆଥ୍ଲେଟ ଏହି ପ୍ରତିଯୋଗିତାରେ ଅଂଶଗ୍ରହଣ କରିଛନ୍ତି। ଏହା ବ୍ୟତୀତ ୧୦୦ ଟିମ୍ ଅଫିସିଆଲ, ୨୦୦ ଟେକ୍ନିକାଲ ଅଫିସିଆଲ ପରିଚାଳନା ଦାୟିତ୍ୱରେ ରହିଛନ୍ତି। ୨୨ ତାରିଖରୁ ଆରମ୍ଭ ହୋଇଥିବା ପ୍ରତିଯୋଗିତା ୨୫ ପର୍ଯ୍ୟନ୍ତ ଚାଲିବ।
ପ୍ରତିଯୋଗିତାର ପ୍ରଥମ ଦିବସରେ ଅନୁଷ୍ଠିତ ପୁରୁଷ ୫୦୦୦ ମିଟର ରେସ୍ରେ ମୟୂରଭଞ୍ଜର ତାରକ ମାଣ୍ଡି, ମହିଳା ୫୦୦୦ ମିଟର ରେସ୍ରେ ବରଗଡ଼ର ନମିତା ପ୍ରଧାନ ଏବଂ ମହିଳା ଜାଭେଲିନ ଥ୍ରୋରେ ଓଡ଼ିଶା ପୋଲିସର ସସ୍ମିତା ବେହେରା ସ୍ବର୍ଣ୍ଣ ପଦକ ପାଇଛନ୍ତି। ସେହିପରି ୧୪ ବର୍ଷରୁ କମ୍ ବାଳକ ୬୦୦ ମିଟର ରନ୍ରେ କେନ୍ଦୁଝରର ସଞ୍ଜୟ ହାଁସଦା, ହାଇଜମ୍ପରେ କିଟ୍ର ଲଳିତ ଲାଗୁରି, ଶଟ୍ପୁଟ୍ରେ କଟକର ସତ୍ୟଜିତ ତ୍ରିପାଠୀ, ୧୬ ବର୍ଷରୁ କମ୍ ବାଳକ ହାଇଜମ୍ପରେ ସୋନପୁରର ଉମେଶ ବେହେରା, ଶଟ୍ପୁଟ୍ରେ ଜଗତ୍ସିଂହପୁରର ମାନସ ଖଟୁଆ, ୧୮ ବର୍ଷରୁ କମ୍ ବାଳକ ହାଇଜମ୍ପରେ ପାରାଦୀପ ପୋର୍ଟର ଅମିତ ଅମନ ରାଉତ, ଶଟ୍ପୁଟ୍ରେ କଟକର ଓଁକାର ପ୍ରସାଦ ନନ୍ଦ, ୨୦ ବର୍ଷରୁ କମ୍ ୫୦୦୦ ମିଟର ରେସ୍ରେ କିଟ୍ର ପଙ୍କଜ ସୋରେନ, ହାଇଜମ୍ପରେ ଜଗତ୍ସିଂହପୁରର ଅନନ୍ତ କୁମାର ସ୍ବାଇଁ, ଶଟ୍ପୁଟ୍ରେ ସମୀର କୁମାର ଲେଙ୍କା ଓ ୨୩ ବର୍ଷରୁ କମ୍ ବାଳକ ୫୦୦୦ ମିଟର ରେସ୍ରେ ନୂଆପଡ଼ାର ରଶ୍ମି ରଞ୍ଜନ ନାୟକ ସ୍ବର୍ଣ୍ଣ ପଦକ ପାଇଛନ୍ତି। ୧୪ ବର୍ଷରୁ କମ୍ ବାଳିକା ଲଙ୍ଗଜମ୍ପରେ ବରଗଡ଼ର ଅରୁଣା ବାରିକ, ୬୦୦ ମିଟର ରେସ୍ରେ ଭୁବନେଶ୍ୱରର ସୁନୀତା ପିଙ୍ଗୁଆ, ୧୬ ବର୍ଷରୁ କମ୍ ବାଳିକା ଲଙ୍ଗଜମ୍ପରେ ଭୁବନେଶ୍ୱରର ପାର୍ବତୀ ହାଁସଦା, ଜାଭେଲିନ୍ ଥ୍ରୋରେ ଯାଜପୁରର ତେଜସ୍ବିନୀ ଧଳ, ୧୮ ବର୍ଷରୁ କମ୍ ବାଳିକା ଲଙ୍ଗଜମ୍ପରେ କୋରାପୁଟର ସଞ୍ଜୁ ହାନ୍ତାଳ, ଜାଭେଲିନ ଥ୍ରୋରେ ସୁନ୍ଦରଗଡ଼ର ଅମ୍ରିତା ଡୁଙ୍ଗଡୁଙ୍ଗ, ୨୦ ବର୍ଷରୁ କମ୍ ବାଳିକା ୫୦୦୦ ମିଟର ରେସ୍ରେ କଟକର ସ୍ବର୍ଣ୍ଣଲତା ଶର୍ମା, ଜାଭେଲିନ୍ ଥ୍ରୋରେ କିଟ୍ର ପି. ଅର୍ପିତା ଅର୍ଚ୍ଚନା ସାହୁ, ୨୩ ବର୍ଷରୁ କମ୍ ବାଳିକା ୫୦୦୦ ମିଟର ରେସ୍ରେ ନୂଆପଡ଼ାର ଗୁଲାପ ରାଉତ, ଜାଭେଲିନ୍ ଥ୍ରୋରେ ସୁନ୍ଦରଗଡ଼ର ଦମୟନ୍ତୀ ଖେସ୍ ସ୍ବର୍ଣ୍ଣିମ ସଫଳତା ପାଇଛନ୍ତି।