ବାରଙ୍ଗ,୩୦।୭(ଡି.ଏନ.ଏ.): ପ୍ରାଣୀ ଉଦ୍ୟାନ ନନ୍ଦନକାନନ ବୁଧବାର ଅନ୍ଲାଇନ ମାଧ୍ୟମରେ ଆନ୍ତର୍ଜାତିକ ବ୍ୟାଘ୍ର ଦିବସ ପାଳନ କରିଛି। କରୋନା ଲାଗି ନନ୍ଦନକାନନ ବନ୍ଦ ଥିବାବେଳେ ବ୍ୟାଘ୍ର ସଂରକ୍ଷଣର ବାର୍ତ୍ତା ଅନଲାଇନରେ ଦେଇଛନ୍ତି ନନ୍ଦନକାନନ କର୍ତ୍ତୃପକ୍ଷ। ଏହାସହ ବ୍ୟାଘ୍ର ସଂରକ୍ଷଣକୁ ନେଇ ଅନ୍ଲାଇନରେ ଏକ କୁଇଜ୍ ପ୍ରତିଯୋଗିତା ହୋଇଥିଲା। ନନ୍ଦନକାନନର ଓ୍ବେସାଇଟରେ ଉପଲବ୍ଧ ୨୦ଟି ପ୍ରଶ୍ନର ୭୫ଭାଗ ଠିକ୍ ଦେଇଥିବା ଉତ୍ତରଦାତାକୁ ଇ-ମେରିଟ୍ ସାର୍ଟିଫିକେଟ ପ୍ରଦାନ କରାଯିବ ବୋଲି କୁହାଯାଇଛି। ଗୋଟିଏ ବନ୍ୟ ବାଘୁଣି ଚନ୍ଦକା ଜଙ୍ଗଲରୁ ସାଥିଟିଏ ପାଇଁ ବାଘ ପ୍ରକୋଷ୍ଠକୁ ଲମ୍ପ ପ୍ରଦାନ କରି ୪-୦୧-୧୯୬୭ଠାରୁ ୨୧-୦୭-୧୯୭୮ ମରିବା ପର୍ଯ୍ୟନ୍ତ ନନ୍ଦନକାନନରେ କଟାଇବାକୁ ପଡ଼ିଥିଲା। ଏହାର ନାମ କାନନ ରଖାଯାଇଥିଲା। ସେହିପରି ୨୦୧୩ ଏପ୍ରିଲ ୨୯ତାରିଖରେ ନନ୍ଦନକାନନକୁ ଏକ ଜଙ୍ଗଲୀ ବାଘ ପ୍ରବେଶ କରିବା ଦ୍ୱାରା ତା’ର ନାମ ନନ୍ଦନ ରଖାଯାଇଥିଲା। ଏକ ନୂତନ ରକ୍ତର ବଂଶ ସୃଷ୍ଟି ଉଦ୍ଦେଶ୍ୟ ନେଇ ନନ୍ଦନ ସହ ନନ୍ଦନକାନନରେ ଜନ୍ମିତ ବାଘୁଣୀ ମେଘାର ମିଳନ ହୋଇଥିଲା। ୨୦୧୬ ଏପ୍ରିଲ ୨୦ରେ ଏମାନଙ୍କ ମିଳନରୁ ଦୁଇଟି ସାଧାରଣ ବାଘ ଜନ୍ମ ହୋଇଥିଲା। ଯାହା ନନ୍ଦନକାନନ ପାଇଁ ଗର୍ବ ଓ ଗୌରବ ସାଜିଥିବା ଘଟଣାକୁ ପିସିସିଏଫ ସନ୍ଦିପ ତ୍ରିପାଠୀ ଟୁଇଟ୍ ଯୋଗେ ଜଣାଇଛନ୍ତି।
