ବାରଙ୍ଗ,୨୬।୧୧(ଡି.ଏନ୍.ଏ.): ସପ୍ତାହକୁ ଗୋଟେ ଦିନ ପ୍ରତି ସୋମବାର ନନ୍ଦନକାନନ ବନ୍ଦ ରହୁଛି। ଏହିଦିନ ପଶୁପକ୍ଷୀ କୋଳାହଳରୁ ଦୂରେଇ ରହିବା ସହ ପରିସରର ଆନୁଷଙ୍ଗିକ କାର୍ଯ୍ୟ କରିବା ନିମନ୍ତେ ସୋମବାର ନନ୍ଦନକାନନକୁ ବନ୍ଦ ରଖାଯାଇଛି। କେବଳ ଘରୋଇକରଣରେ ନେଇଥିବା ଠିକାଦାର ଓ କର୍ମଚାରୀଙ୍କ ସହ ଆବଶ୍ୟକତା ଥିବା ନନ୍ଦନକାନନର କର୍ମଚାରୀଙ୍କୁ ନନ୍ଦନକାନନ ମଧ୍ୟକୁ ଛଡ଼ାଯାଉଛି। କିନ୍ତୁ ଏଥିରେ ପରିବର୍ତ୍ତନ ଆଣିବାକୁ ଯାଉଛନ୍ତି ନନ୍ଦନକାନନ କର୍ତ୍ତୃପକ୍ଷ। ନନ୍ଦନକାନନର ବିକାଶ ଓ ପଶୁପକ୍ଷୀଙ୍କ ସୁରକ୍ଷାର ବୃହତ୍ତର ସ୍ବାର୍ଥକୁ ଆଖି ଆଗରେ ରଖି ସବୁଦିନ ନନ୍ଦନକାନନ ବନ୍ଦ ପରେ ଅର୍ଥାତ ସା ୬ଟା ପରେ କାହାରିକୁ ଭିତରକୁ ନ ଛାଡିବାକୁ ନିଷ୍ପତ୍ତି ନେଇଛନ୍ତି ନନ୍ଦନକାନନ କର୍ତ୍ତୃପକ୍ଷ। ଯଦି ପରିସର ଭିତରକୁ କୌଣସି କାର୍ଯ୍ୟରେ ଜରୁରୀ ଆବଶ୍ୟକ ଥିବ, ସେମାନେ ନିଜ ସବିଶେଷ ଠିକଣା ପ୍ରବେଶ ପଥରେ ଥିବା ସୁରକ୍ଷା କର୍ମଚାରୀମାନଙ୍କ ପାଖରେ ଲେଖିବେ। ଏହାପରେ ତାଙ୍କୁ ଏକ ପାସ ପ୍ରଦାନ କରାଯିବ ବୋଲି ଭୁୁବନେଶ୍ୱର ଆଞ୍ଚଳିକ ବନସଂରକ୍ଷକ ତଥା ନନ୍ଦନକାନନ ନିର୍ଦ୍ଦେଶକ ମନୋଜ ମହାପାତ୍ର ସୂଚନା ଦେଇଛନ୍ତି। ମହାପାତ୍ରଙ୍କ ସୂଚନା ଅନୁଯାୟୀ, ସୋମବାର ନନ୍ଦନକାନନ ବନ୍ଦ ରହୁଥିବାରୁ ସେହିଦିନ ୧ନଂ ଓ ୨ନଂ ଫାଟକ ବନ୍ଦ ରହୁଛି । ତେଣୁ ସୋମବାର ଆବଶ୍ୟକତା ନ ଥିବା କୌଣସି କର୍ମଚାରୀ ଓ ସାଧାରଣ ଲୋକଙ୍କ ପ୍ରବେଶକୁ ବାରଣ କରାଯିବ। ଏଥିନିମନ୍ତେ ସମସ୍ତଙ୍କୁ ସଚେତନ କରିବା ପାଇଁ ଏକ ସୂଚନାଫଳକ ପ୍ରବେଶପଥ ପାଖରେ ଖୁବଶୀଘ୍ର ଲାଗିବ। ପର୍ଯ୍ୟଟକଙ୍କ ସଂଖ୍ୟା ହ୍ରାସ ପାଇବା ପରେ ଅର୍ଥାତ ସା ହେବାମାତ୍ରେ ପରିସର ଜଙ୍ଗଲରେ ଥିବା ବାରହା ଓ ହରିଣମାନେ ଜଙ୍ଗଲ ମଧ୍ୟରୁ ବାହାରି ହଠାତ ନନ୍ଦନକାନନ ମୁଖ୍ୟରାସ୍ତା ଉପରକୁ ଚାଲିଆସୁଛନ୍ତି। ଏହି ସମୟରେ ଯାଉଥିବା ବାଇକ୍ ଚାଳକଙ୍କ ସହ ଏମାନଙ୍କର ଧକ୍କା ହେବାର ସମ୍ଭାବନା ଥିବାରୁ ଏଭଳି ନିଷ୍ପତ୍ତି ନିଆଯାଇଛି ।