ବାରଙ୍ଗ,୧୮।୧୧(ଲିଙ୍ଗରାଜ ରାଉତ): ନନ୍ଦନକାନନ ପ୍ରାଣୀଉଦ୍ୟାନ ଓ ରାଜ୍ୟ ଉଦ୍ଭିଦ ଉଦ୍ୟାନକୁ ସଂଯୋଗ କରୁଥିବା ବହୁ ପ୍ରତୀକ୍ଷିତ ‘ରୋପ୍ୱେ’ ପୁଣିଥରେ ଆରମ୍ଭ ହୋଇଛି। ଶୁକ୍ରବାର ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ମନ୍ତ୍ରୀ ପ୍ରଦୀପ କୁମାର ଅମାତ ଏହାକୁ ଉଦ୍ଘାଟନ କରିଛନ୍ତି। ୧୩ବର୍ଷ ପରେ ଶନିବାରଠାରୁ ପର୍ଯ୍ୟଟକ ଏହାର ମଜା ଉଠାଇବେ। ତେବେ ଲୋକାର୍ପଣ ପରେ ମନ୍ତ୍ରୀ ପ୍ରଥମେ ରୋପ୍ୱେରେ ବସି ମଜା ନେଇଥିଲେ। ମନ୍ତ୍ରୀଙ୍କ ସହିତ ଉତ୍ତର ଭୁବନେଶ୍ବର ବିଧାୟକ ସୁଶାନ୍ତ କୁମାର ରାଉତ, ଜଟଣୀ ବିଧାୟକ ସୁରେଶ କୁମାର ରାଉତରାୟ ଓ ଜଙ୍ଗଲ ବିଭାଗର ବରିଷ୍ଠ ଅଧିକାରୀମାନେ ରୋପ୍ଓ୍ବେରେ ବସିଥିଲେ। ଏହି ଅବସରରେ ମନ୍ତ୍ରୀ ଅମାତ କହିଲେ, ମୁଖ୍ୟମନ୍ତ୍ରୀ ରାଜ୍ୟର ବନ୍ୟପ୍ରାଣୀଙ୍କ ସୁରକ୍ଷା ଓ ଅଭିବୃଦ୍ଧି ପାଇଁ ସର୍ବଦା ଗୁରୁତ୍ୱ ଦେଇ ଆସୁଛନ୍ତି। ଏଥିପାଇଁ ରାଜ୍ୟ ସରକାର ‘ଆମ ଓଡ଼ିଶା ନବୀନ ଓଡ଼ିଶା’ ଏବଂ ୫-ଟି ଯୋଜନାରେ ନନ୍ଦନକାନନକୁ ବିଶ୍ୱସ୍ତରୀୟ କରିବାକୁ ଯାଉଛନ୍ତି। ଖୁବ୍ଶୀଘ୍ର ବିଶ୍ୱସ୍ତରୀୟ କାର୍ଯ୍ୟ ଆରମ୍ଭ ହେବ ବୋଲି ମନ୍ତ୍ରୀ କହିଛନ୍ତି।
୧୩କୋଟିରୁ ଊଦ୍ଧର୍ବ ଟଙ୍କା ବ୍ୟୟରେ ନୂତନ ଜ୍ଞାନକୌଶଳରେ ଆରମ୍ଭ ହୋଇଥିବା ଏହି ରୋପ୍ୱେ କାଞ୍ଜିଆ ହ୍ରଦ ଉପର ଦେଇ ଯିବ। ରୋପ୍ୱେରେ ବୁଲିବା ସମୟରେ ପର୍ଯ୍ୟଟକମାନେ ହ୍ରଦର ପ୍ରାକୃତିକ ପରିବେଶକୁ ଉପଭୋଗ ସହିତ ରାଜ୍ୟ ଉଦ୍ଭିଦ ଉଦ୍ୟାନର ବିଭିନ୍ନ ପ୍ରଜାତିର ଫୁଲବଗିଚା ଦେଖିପାରିବେ। ଏହି ରୋପ୍ୱେର ଲମ୍ବ ୬୨୬ ମିଟର ରହିଥିବାବେଳେ ପର୍ଯ୍ୟଟକଙ୍କ ପାଇଁ ଜଣକ ପିଛା ଟିକେଟ ମୂଲ୍ୟ ୧୨୦ ଟଙ୍କା ରହିଛି। ଏହାର ଟିକେଟ କାଉଣ୍ଟର ନନ୍ଦନକାନନ ଏବଂ ରାଜ୍ୟଉଭିଦ ଉଦ୍ୟାନ ପାଖରେ ରହିଛି। ନନ୍ଦନକାନନରେ ପ୍ରଥମେ ରାଜ୍ୟ ସରକାର ୧୯୮୮ରେ ରୋପ୍ୱେ ନିର୍ମାଣ ପାଇଁ ଭୂମି ପୂଜନ କରିଥିଲେ। ୧୯୯୪ ଅକ୍ଟୋବର ୧୦ରେ ତତ୍କାଳୀନ ମୁଖ୍ୟମନ୍ତ୍ରୀ ସ୍ବର୍ଗତ ବିଜୁ ପଟ୍ଟନାୟକ ଏହାକୁ ଉଦ୍ଘାଟନ କରିବା ପରେ ପର୍ଯ୍ୟଟକମାନେ ରୋପ୍ଓ୍ବେର ମଜା ଉଠାଇଥିଲେ। ତେବେ ରୋପ୍ୱେରେ ବାରମ୍ବାର ଯାନ୍ତ୍ରିକ ତ୍ରୁଟି ଦେଖାଦେବାରୁ ନନ୍ଦନକାନନ କର୍ତ୍ତୃପକ୍ଷ ପର୍ଯ୍ୟଟକଙ୍କ ସୁରକ୍ଷା ଦୃଷ୍ଟିରୁ ୨୦୧୧ଠାରୁ ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ ଘୋଷଣା କରିଥିଲେ। ୨୦୨୧ ଅକ୍ଟୋବର ୮ରେ ୬୭ତମ ବନ୍ୟପ୍ରାଣୀ ସପ୍ତାହ ପାଳନ ଅବସରରେ ପୁନଃ ଚଳାଚଳ ପାଇଁ ନନ୍ଦନକାନନ ପକ୍ଷରୁ ଦାମୋଦର ରୋପ୍ଓ୍ବେ ଇନ୍ଫ୍ରା ଲିମିଟେଡ୍ ସହ ଚୁକ୍ତିନାମା ହୋଇଥିଲା। ପିପିପି ମୋଡ୍ରେ ଏହି ଘରୋଇ ସଂସ୍ଥା ରୋପ୍ଓ୍ବେ ପରିଚାଳନା କରିବ। ଏହି ଲୋକାର୍ପଣ କାର୍ଯ୍ୟକ୍ରମରେ ଜଙ୍ଗଲ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ସତ୍ୟବ୍ରତ ସାହୁ, ପ୍ରଧାନ ମୁଖ୍ୟ ବନସଂରକ୍ଷକ ତଥା ମୁଖ୍ୟ ବନ୍ୟପ୍ରାଣୀ ତତ୍ତ୍ୱାବଧାରକ(ପିସିସିଏଫ୍) ସୁଶାନ୍ତ ନନ୍ଦ, ନନ୍ଦନକାନନର ପୂର୍ବତନ ଉପନିର୍ଦ୍ଦେଶକ ଡା. ସଞ୍ଜିତ କୁମାର, ନନ୍ଦନକାନନ ନିର୍ଦ୍ଦେଶକ ମନୋଜ ଭି ନାୟାର, ଉପନିର୍ଦ୍ଦେଶକ ସନଥ୍ କୁମାର ନାରାୟଣଙ୍କ ସମେତ ଜଙ୍ଗଲ ବିଭାଗର ବହୁ ପଦାଧିକାରୀ ଉପସ୍ଥିତ ଥିଲେ। ଉତ୍ସବକୁ ନନ୍ଦନକାନନ ପର୍ଯ୍ୟଟକ ପରିଚାଳନା ସହକାରୀ ବନ ସଂରକ୍ଷକ ଶରତ ସାହୁ, ଜନ୍ତୁ କ୍ୟୁରେଟର ଡା. ରଶ୍ମିରଞ୍ଜନ ସ୍ବାଇଁ, ରେଞ୍ଜର ସରୋଜ ପଣ୍ଡା, ଜୟକୃଷ୍ଣ ନାୟକ, ଜି. ଏଫ୍. ଖାନ, ରଞ୍ଜିତ୍ ମହାନ୍ତି, ରୋପ୍ୱେର ମୁଖ୍ୟ ପରିଚାଳକ ମହେଶ ମହୋତା ପ୍ରମୁଖ ପରିଚାଳନା କରିଥିଲେ।