ଭୁବନେଶ୍ୱର,୧୮।୨(ବ୍ୟୁରୋ): ନିର୍ଦ୍ଦେଶିକା ନନ୍ଦିତା ଦାସଙ୍କ ଆଗାମୀ ଚଳଚ୍ଚିତ୍ର ଭୁବନେଶ୍ୱରରେ ଶୁଟିଂ ହେବ। ଏଥିରେ କମେଡିଆନ କପିଲ ଶର୍ମା ଓ ଶାହାନା ଗୋସ୍ବାମୀ ଅଭିନୟ କରିବେ। ଚଳିତ ମାସ ଶେଷଆଡ଼କୁ ଏହି ଚଳଚ୍ଚିତ୍ରର ଶୁଟିଂ ଆରମ୍ଭ ହେବ। ତେବେ ଏହି ଚଳଚ୍ଚିତ୍ର ନାମ କ’ଣ ରହିଛି ତାହାକୁ ନନ୍ଦିତା ଘୋଷଣା କରିନାହାନ୍ତି। ୨୦୧୮ରେ ସେ ବାୟୋ ପିକ୍ ‘ମୋଣ୍ଟୋ’ରେ ବିଶେଷ ସଫଳତା ପାଇବା ପରେ ନନ୍ଦିତା ଆଗାମୀ ଚଳଚ୍ଚିତ୍ର ଭୁବନେଶ୍ୱରରେ ଶୁଟିଂ କରିବାକୁ ଚାହୁଁଥିବା ସୋସିଆଲ ମିଡିଆରେ ସୂଚନା ଦେଇଛନ୍ତି। ଏହି ପ୍ରୋଜେକ୍ଟ ଆପଲଜ ଏଣ୍ଟରଟେନ୍ମେଣ୍ଟ ଓ ନନ୍ଦିତା ଦାସ ଇନିସିଏଟିଭ ଦ୍ୱାରା ପ୍ରଯୋଜିତ କରାଯାଇଛି। ଏହି ଚଳଚ୍ଚିତ୍ରରେ କପିଲଙ୍କୁ ଜଣେ ଫୁଡ ଡେଲିଭରି ବୟ ଚରିତ୍ରରେ ଦେଖିବାକୁ ମିଳିବ। ସୋସିଆଲ ମିଡିଆରେ ଏକ ପୋଷ୍ଟ ଶେୟାର କରି କପିଲ କହିଛନ୍ତି, ମୁଁ ନନ୍ଦିତା ଦାସଙ୍କ ଚଳଚ୍ଚିତ୍ରକୁ ନେଇ ବେଶ୍ ଖୁସି ଅଛି। ମୋତେ ଦର୍ଶକ ଏକ ନୂଆ ରୂପରେ ଦେଖିବାକୁ ପାଇବେ, ଯାହାକୁ ନେଇ ମୁଁ ଉତ୍ସାହିତ ଅଛି। ଚଳଚ୍ଚିତ୍ରର ପ୍ରଚ୍ଛଦପଟରେ ଥିବା ନନ୍ଦିତା ଦାସ ଓ ସମୀର ନୈରଙ୍କ ସହ କାମ କରିବାର ସୁଯୋଗ ତାଙ୍କୁ ଆନନ୍ଦ ଆଣି ଦେଇଛି। କପିଲଙ୍କ ବିପକ୍ଷରେ ସୁହାନା ପତ୍ନୀ ଭୂମିକାରେ ଅଭିନୟ କରିବେ। ଅନ୍ୟପକ୍ଷେ ନନ୍ଦିତା ଦାସ କହିଛନ୍ତି, ଜଣେ ସାଧାରଣ ମଣିଷକୁ ପ୍ରତିନିଧିତ୍ୱ କରିବାର ସମ୍ପୂର୍ଣ୍ଣ କ୍ଷମତା କପିଲଙ୍କ ପାଖରେ ରହିଛି। ସେ ନିଜ ଅଭିନୟ ମାଧ୍ୟମରେ ସମସ୍ତଙ୍କୁ ଆଶ୍ଚର୍ଯ୍ୟ କରିବେ ବୋଲି ଆଶା ରଖିଛନ୍ତି। ଏଥିସହ ସାଧାରଣ ଲୋକଙ୍କ ଆଖିରେ ଲୁଚି ରହିଥିବା କଥାକୁ ସେ ଏହି ଫିଲ୍ମ ମାଧ୍ୟମରେ ଦର୍ଶାଇବାକୁ ଚେଷ୍ଟା କରିଛନ୍ତି। ନନ୍ଦିତା ଏବେ ଭୁବନେଶ୍ୱର ଗସ୍ତରେ ଆସିଥିବା ସହ ଆଗାମୀ ଚଳଚ୍ଚିତ୍ର ଶୁଟିଂକୁ ନେଇ ବେଶ୍ ଉତ୍ସାହୀ ଥିବା କହିଛନ୍ତି।