ଭୁବନେଶ୍ୱର,୨୬।୩: ବିଧାୟକଙ୍କ ନିଲମ୍ବନକୁ ନେଇ କଂଗ୍ରେସ ପ୍ରେସମିଟ୍ କରିଛି। ଘଟଣାକୁ ନିନ୍ଦା କରି ରାଜ୍ୟ ସରକାରଙ୍କ ଉପରେ ବର୍ଷିଛନ୍ତି ବରିଷ୍ଠ ନେତା ନରସିଂହ ମିଶ୍ର। ବିଧାନସଭା ଉପରେ ବାଚସ୍ପତିଙ୍କ ନିୟନ୍ତ୍ରଣ ନ ଥିବା ସେ ଅଭିଯୋଗ କରିଛନ୍ତି। ବିଧାୟକଙ୍କୁ ଭେଟିବାକୁ ବିଧାନସଭା ପରିସରକୁ ଆମକୁ ଛଡ଼ାଗଲାନି। ଆଇନ ଅନୁସାରେ ଆମେ ପୂର୍ବତନ ସଦସ୍ୟ ହିସାବରେ ପରିସରକୁ ଯାଇପାରିବୁ। କିନ୍ତୁ ବାଚସ୍ପତିଙ୍କ ବିନା ଅନୁମତିରେ ପୋଲିସ ପରିସରକୁ ଯାଇପାରିବନି। ବାଚସ୍ପତିଙ୍କ ଏଭଳି କୌଣସି ନିର୍ଦ୍ଦେଶ ନ ଥିବା ମଧ୍ୟ ପୋଲିସ କହିଥିଲେ। ପୋଲିସ ଲଗାଇ ମାଡ଼ ମରାଗଲା, ଉଠାଇ ନିଆଗଲା ବୋଲି ନରସିଂହ ମିଶ୍ର କହିଛନ୍ତି। ଯାହା ଜଣାପଡୁଛି ବିଧାନସଭା ଉପରେ ବାଚସ୍ପତିଙ୍କ ନିୟନ୍ତ୍ରଣ ନାହିଁ। ଏକଛତ୍ରବାଦ ଶାସନ ଚାଲିଛି। କଂଗ୍ରେସ ଦୃଢ଼ ନିନ୍ଦା କରୁଛି। ଏହା ଗଣତନ୍ତ୍ରର ହତ୍ୟା, ଏନେଇ ଉଚିତ୍ ଜବାବ ଦିଆଯିବ ନରସିଂହ କହିଛନ୍ତି।
