ଢେଙ୍କାନାଳ ଅଫିସ, ୬।୮: ପାଖକୁ ଆସି ଉପରେ ପଡ଼ି ବଢ଼ାଉଛନ୍ତି ଭାବ। ଖୁବ୍ କମ୍ ସମୟରେ ଜିତି ନେଉଛନ୍ତି ଭରସା। ସରଳତାର ସୁଯୋଗ ନେଇ କୌଶଳକ୍ରମେ ନିଶାମିଶା ଖାଦ୍ୟପଦାର୍ଥ ଦେଇଦେଉଛନ୍ତି। ଆଉ ଚେତାଶୂନ୍ୟ ହୋଇଗଲା ପରେ ଲୁଟି ନେଉଛନ୍ତି ସର୍ବସ୍ବ। ଏଭଳି ଏକ ନିଶାଦିଆ ଲୁଟେରା ଗ୍ୟାଙ୍ଗ୍ ଏବେ ଢେଙ୍କାନାଳ ସହରରେ ଆତଙ୍କ ସୃଷ୍ଟି କରିଛନ୍ତି। ଗତ ସପ୍ତାହକ ମଧ୍ୟରେ ସମାନ ଉପାୟରେ ୫ ଜଣଙ୍କଠାରୁ ଲୁଟ୍ ହୋଇଛି। ସେମାନେ ମୁଖ୍ୟତଃ ରାସ୍ତାପାର୍ଶ୍ୱ ବ୍ୟବସାୟୀଙ୍କୁ ଟାର୍ଗେଟ କରୁଛନ୍ତି। ଗଳିକନ୍ଦିରେ ପଇଁତରା ମାରୁଥିବା ଏହି ଗ୍ୟାଙ୍ଗ୍ ପୋଲିସର ମୁଣ୍ଡବ୍ୟଥା ବଢ଼ାଇଥିବାବେଳେ ଭୟରେ ଦିନ କାଟୁଛନ୍ତି ସହରବାସୀ।
ଶୁକ୍ରବାର ସ୍ପଷ୍ଟ ଦିବାଲୋକରେ ନିଶାଦିଆ ଲୁଟେରାମାନେ ଜଣେ ଶୁଖୁଆ ବେପାରୀଙ୍କଠାରୁ ୭ ହଜାର ଟଙ୍କା ଲୁଟି ନେଇଥିବା ଅଭିଯୋଗ ହୋଇଛି। ଚେତାଶୂନ୍ୟ ଅବସ୍ଥାରେ ସମ୍ପୃକ୍ତ ବ୍ୟବସାୟୀଙ୍କୁ ପୋଲିସ ଉଦ୍ଧାର କରି ଚିକିତ୍ସାଳୟରେ ଭର୍ତ୍ତି କରିଛି। ସୂଚନା ଅନୁଯାୟୀ, ରଥଗଡ଼ା ନିକଟରେ ଏକ ବ୍ୟାଙ୍କ ସମ୍ମୁଖରେ ଦୀର୍ଘଦିନ ହେଲା ଶୁଖୁଆ ବ୍ୟବସାୟ କରି ଆସୁଛନ୍ତି ଲକ୍ଷ୍ମୀଧର ମଲ୍ଲିକ। ଅପରାହ୍ନ ପ୍ରାୟ ୨ଟାରେ କେତେଜଣ ବ୍ୟକ୍ତି ତାଙ୍କ ନିକଟରେ ପହଞ୍ଚତ୍ ବହୁ ପରିମାଣର ଶୁଖୁଆ କିଣିବାକୁ କହିଥିଲେ। କିଛି ସମୟ ପରେ ଏକ ଛୋଟ ବୋତଲରେ ମୃଦୁ ପାନୀୟ ପିଇବାକୁ ଦେଇଥିଲେ। ବ୍ୟବସାୟୀ ଜଣକ ଏହାକୁ ପିଇବା ପରେ ଚେତାଶୂନ୍ୟ ହୋଇପଡ଼ିଯାଇଥିଲେ। ଏହାର ସୁଯୋଗରେ ଦୁର୍ବୃତ୍ତମାନେ ତାଙ୍କ ପକେଟରୁ ୭ହଜାର ଟଙ୍କା ନେଇ ପଳାଇଥିଲେ। ଲକ୍ଷ୍ମୀଧର ତଳେ ପଡ଼ିଥିବା ଦେଖି କେତେଜଣ ଦୋକାନୀ ଏବଂ ଯୁବକ ତାଙ୍କୁ ଉଠାଇବାକୁ ଚେଷ୍ଟା କରିଥିଲେ। ହେଲେ ସେ ଉଠି ପାରି ନ ଥିଲେ। ତାଙ୍କ ଆଖି ନିସ୍ତେଜ ହୋଇ ବନ୍ଦ ହୋଇଯାଉଥିଲା। କିଛି ସମୟ ପରେ ସାମାନ୍ୟ ସୁସ୍ଥ ହେବା ପରେ ସେ ସମସ୍ତ ବିଷୟ କହିଥିଲେ। ସୂଚନା ପାଇ ଟାଉନ ଥାନା ପୋଲିସ ପହଞ୍ଚତ୍ ତାଙ୍କୁ ଉଦ୍ଧାର କରି ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ।
ଅପରାହ୍ନରେ ରାସ୍ତାରେ ଜନଗହଳି କମିବା ପରେ ଲୁଟେରାମାନେ ରାସ୍ତାପାର୍ଶ୍ୱ ବ୍ୟବସାୟୀଙ୍କୁ ଟାର୍ଗେଟ କରୁଛନ୍ତି। ତୁରନ୍ତ ଏ ଦିଗରେ ପୋଲିସ ପଦକ୍ଷେପ ନେବାକୁ ଗଣେଶ ବଜାର କମିଟି ପକ୍ଷରୁ ଦାବି କରାଯାଇଛି। ଟାଉନ ଥାନାଧିକାରୀ ରାଜେନ୍ଦ୍ର ମହାପାତ୍ର ଏ ନେଇ ଗଣେଶ ବଜାର କମିଟି ସହିତ ଆଲୋଚନା କରିଛନ୍ତି। ଏଭଳି ଅପରାଧ ଘଟାଉଥିବା ଅପରାଧୀଙ୍କ ଉପରେ ନଜର ରଖିବା ସହ ସେମାନଙ୍କୁ ଧରିବାରେ ସହାୟତା କରିବାକୁ ଥାନାଧିକାରୀ ନିବେଦନ କରିଛନ୍ତି। ଅନ୍ୟପଟେ ବ୍ୟାଙ୍କ ଏଟିଏମ୍ରେ ଲାଗିଥିବା ସିସିଟିଭି କ୍ୟାମେରା ଫୁଟେଜ୍ ମାଧ୍ୟମରେ ଅପରାଧୀଙ୍କ ନିକଟରେ ପହଞ୍ଚତ୍ବାକୁ ପୋଲିସ ଉଦ୍ୟମ କରୁଛି।