ଓ୍ବାଶିଂଟନ, ୨୯।୬: ଚନ୍ଦ୍ର ତଥା ମହାକାଶକୁ ଯାଉଥିବା ଯାନରେ ସୁବିଧା ସୁଯୋଗ ଯେଭଳି ମିଳିପାରିବ ସେନେଇ ନାସା ପକ୍ଷରୁ ଯୋଜନା ପ୍ରସ୍ତୁତ କରାଯାଇଛି। ମହାକାଶ ଯାନରେ ଟଏଲେଟ୍ ନିର୍ମାଣ ଲାଗି ନାସା ପକ୍ଷରୁ ସର୍ବସାଧାରଣଙ୍କର ସହାୟତା ଲୋଡ଼ା ଯାଇଛି। ଉପଯୁକ୍ତ ଟଏଲେଟ୍ ଡିଜାଇନିଂ କରିଥିବା ବ୍ୟକ୍ତିଙ୍କୁ ନାସା ପକ୍ଷରୁ ମୋଟ ୨୬ ଲକ୍ଷ ୪୦ହଜାର ଟଙ୍କାର ପୁରସ୍କାର ଦିଆଯିବ ବୋଲି ଘୋଷଣା କରାଯାଇଛି। ଟଏଲେଟ୍ ଡିଜାଇନିଂରେ ପ୍ରଥମ ସ୍ଥାନ ହାସଲ କରିଥିବା ବ୍ୟକ୍ତିଙ୍କୁ ଏଥିପାଇଁ ୧୫ ଲକ୍ଷ ଟଙ୍କାର ପୁରସ୍କାର ପ୍ରଦାନ କରାଯିବ। ସେହିପରି ଦ୍ୱିତୀୟ ପ୍ରତିଯୋଗୀଙ୍କୁ ୭ଲକ୍ଷ ୬୦ ହଜାର ଏବଂ ତୃତୀୟ ପ୍ରତିଯୋଗୀଙ୍କୁ ୩ ଲକ୍ଷ ୮୦ ହଜାର ଟଙ୍କା ଦିଆଯିବ ବୋଲି ସୂଚନା ଦିଆଯାଇଛି। ନାସାକୁ ଡିଜାଇନିଂ ପଠାଇବାର ଅନ୍ତିମ ତାରିଖ ୨୦୨୦ ଅଗଷ୍ଟ ୧୭ ତାରିଖ ରଖାଯାଇଛି। ୨୦୨୪ ମହାକାଶ ମିଶନ ପାଇଁ ନାସା ପକ୍ଷରୁ ପ୍ରସ୍ତୁତି ଜାରି ରହିଛି। ଏହି ମର୍ମରେ ଏଭଳି ବିଜ୍ଞପ୍ତି ପ୍ରକାଶ ପାଇଛି।