ଓ୍ବାଶିଂଟନ୍,୧୯।୪: ନାସାର ଏକ ଅଚଳ ଉପଗ୍ରହ ବୁଧବାର ପୃଥିବୀପୃଷ୍ଠକୁ ଖସିବା ନେଇ ଆମେରିକୀୟ ମହାକାଶ ଗବେଷଣା ସଂସ୍ଥା ପକ୍ଷରୁ ସତର୍କ କରାଯାଇଛି। ୬୦୦ ପାଉଣ୍ଡ (୨୭୨ କିଲୋଗ୍ରାମରୁ ଅଧିକ) ଓଜନର ଏହି ଉପଗ୍ରହ ବୁଧବାର ରାତି ୯ଟା ୩୦ ମିନିଟ୍ (ଇଷ୍ଟର୍ନ ଟାଇମ୍)ରେ ପୃଥିବୀ ବାୟୁ ମଣ୍ଡଳରେ ପ୍ରବେଶ କରିବ। ତେବେ ଏହା କେଉଁ ସ୍ଥାନରେ ପଡ଼ିବ ତାହା ସ୍ପଷ୍ଟ ହୋଇ ନାହିଁ।
ପୃଥିବୀରେ ପଡ଼ିବା ପୂର୍ବରୁ ଏହାର ଅଧିକାଂଶ ଭାଗ ଆକାଶରେ ଜଳିଯାଇଥିବ। ରୁଭେନ୍ ରାମାଟି ହାଇ ଏନର୍ଜି ସୋଲାର ସ୍ପେକ୍ଟ୍ରୋସ୍କୋପିକ୍ ଇମେଜର (ଆର୍ଏଚ୍ଇଏସ୍ଏସ୍ଆଇ) ନାମକ ଏହି ସାଟେଲାଇଟ୍କୁ ସୋଲାର ଫ୍ଲେୟାର ସମ୍ପର୍କିତ ତଥ୍ୟ ସଂଗ୍ରହ ପାଇଁ ୨୦୦୨ରେ ନାସା ମହାକାଶକୁ ପ୍ରେରଣ କରିଥିଲା। କିନ୍ତୁ ୨୦୧୮ରେ ଏହା ଅଚଳ ହୋଇପଡ଼ିବା ଯୋଗୁ ନାସା ସହ ଯୋଗାଯୋଗରୁ ବିଚ୍ଛିନ୍ନ ହୋଇଥିଲା।
ତେବେ ଚଳିତବର୍ଷ ଦ୍ୱିତୀୟ ଥର ପାଇଁ ନାସା ସାଟେଲାଇଟ୍ ପୃଥିବୀରେ ମାଡ଼ ହେବାକୁ ଯାଉଛି। ଏହା ପୂର୍ବରୁ ଗତ ଜାନୁୟାରୀରେ ୫,୪୦୦ ପାଉଣ୍ଡ (୨୪୪୯ କିଲୋଗ୍ରାମରୁ ଅଧିକ) ଓଜନର ଉପଗ୍ରହ ପୃଥିବୀରେ ପଡ଼ିଥିଲା।
