ଓ୍ବାଶିଂଟନ୍,୨୮ା୧୨ : ଆମେରିକାର ମହାକାଶ ଗବେଷଣା ସଂସ୍ଥା ନାସା ‘ଧ୍ୱଂସର ଦେବତା’ଙ୍କୁ ଠାବ କରିବା ପାଇଁ ଅଭିଯାନ ଚଳାଇଛି। ଏହି କ୍ଷୁଦ୍ରଗ୍ରହ ପୃଥିବୀର କକ୍ଷପଥର ନିକଟତର ହେବାରେ ଲାଗିଛି। ନିକଟରେ ଦୂରନ୍ତ ମହାକାଶରୁ ଫେରିଥିବା ନାସାର ଏକ ସ୍ପେସ୍କ୍ରାଫ୍ଟ ଏହା ଉପରେ ଗବେଷଣା ଚଳାଇଛି।
୨୦୨୯ରେ କ୍ଷୁଦ୍ରଗ୍ରହ ‘ଆପୋଫିସ୍’ ନିକଟକୁ ଯାଇ ଅନୁଧ୍ୟାନ କରିବା ପାଇଁ ନାସାର ମହାକାଶଯାନ ଓଏସ୍ଆର୍ଆଇଏସ୍-ରେକ୍ସକୁ ପଠାଯାଇଛି। କାରଣ ଏହି ସ୍ପେସ୍କ୍ରାଫ୍ଟ ଆପୋଫିସ୍ ସମ୍ପର୍କରେ ଅନେକ ଅଜଣା ତଥ୍ୟ ହାସଲ କରିବ, ଯାହାକି ଇତିହାସରେ ପୂର୍ବରୁ କେବେ ରେକର୍ଡ କରାଯାଇ ନ ଥିଲା ବୋଲି ନାସା ପକ୍ଷରୁ କୁହାଯାଇଛି। ୭ ବର୍ଷ ଧରି ବେନ୍ନୁ କ୍ଷୁଦ୍ରଗହରେ ଅନୁଧ୍ୟାନ ପରେ ସେଠାରୁ ପଥରର ନମୁନା ଧରି ଗତ ସେପ୍ଟେମ୍ବରରେ ମହାକାଶଯାନ ପୃଥିବୀ ପୃଷ୍ଠକୁ ଫେରିଥିଲା। ଗଡ୍ ଅଫ୍ କେଓସ୍ ବା ଧ୍ୱଂସର ଦେବତା ନାମ ଦିଆଯାଇଥିବା ଆପୋଫିସ୍ ୨୦୨୯ ଏପ୍ରିଲ ୧୩ରେ ପୃଥିବୀର ନିକଟତର ହୋଇପାରେ। ସେତେବେଳେ ଏହାର ଦୂରତା ପୃଥିବୀଠାରୁ ମାତ୍ର ୨୦,୦୦୦ ମାଇଲ ରହିବ। ଏତିକି ଦୂରତା କୃତ୍ରିମ ଉପଗ୍ରହଗୁଡ଼ିକ ସହ ରହିଥାଏ। ତେଣୁ ଇଷ୍ଟର୍ନ ହେମିସ୍ପିୟରରେ ଏହା ଦୃଶ୍ୟମାନ ହେବ। ୩୭୦ ୟାର୍ଡ ଆକାରର ଏହି କ୍ଷୁଦ୍ରଗ୍ରହ ପ୍ରତି ୭,୫୦୦ ବର୍ଷରେ ପୃଥିବୀ ନିକଟକୁ ଆସିଥାଏ। କକ୍ଷପଥ ନିକଟକୁ ଆସିଲେ ପୃଥିବୀର ମାଧ୍ୟାକର୍ଷଣ ଶକ୍ତି ଏହାକୁ ପ୍ରଭାବିତ କରିବ। ଏଥିଯୋଗୁ ପୃଥିବୀ ପୃଷ୍ଠ ଉପରେ କିପରି ପରିବର୍ତ୍ତନ ଆସିବ ତାହା ଓଏସ୍ଆର୍ଆଇଏସ୍-ରେକ୍ସ ବୁଝିବାକୁ ଚେଷ୍ଟା କରିବ ବୋଲି ମିଶନ ପ୍ରୋଜେକ୍ଟ ବୈଜ୍ଞାନିକ ଏମି ସାଇମନ୍ ସୂଚନା ଦେଇଛନ୍ତି।
ଗଡ୍ ଅଫ୍ କେଓସ୍ରେ ବର୍ତ୍ତମାନ ଦିନକୁ ୩୦.୬ ଘଣ୍ଟା ରହିଛି। ପୃଥିବୀ ନିକଟକୁ ଆସିଲେ ଦିନର ସମୟରେ ପରିବର୍ତ୍ତନ ଆସିପାରେ। ଏପରି କି ଉକ୍ତ କ୍ଷୁଦ୍ରଗ୍ରହରେ ଭୂସ୍ଖଳନ ଓ ଭୂକମ୍ପ ମଧ୍ୟ ସୃଷ୍ଟି ହୋଇପାରେ। ମହାକାଶ ଓ କ୍ଷୁଦ୍ରଗ୍ରହଗୁଡ଼ିକ ସମ୍ପର୍କରେ ଗବେଷଣା ପାଇଁ ଏହି ମିଶନ ମାଇଲଖୁଣ୍ଟ ହେବ ବୋଲି ଆରିଜୋନା ୟୁନିଭର୍ସିଟିରେ ଓଏସ୍ଆର୍ଆଇଏସ୍-ରେକ୍ସ ପାଇଁ ଗବେଷଣା କରିଥିବା ଡାନି ମେନ୍ଡୋଜା ଡେଲ୍ଲା ଗିଉଷ୍ଟିନା କହିଛନ୍ତି।