ଲାହୋର,୨୮।୯: ପାକିସ୍ତାନ କ୍ରିକେଟ ଟିମ୍କୁ ବଡ଼ ଝଟ୍କା। ଦଳର ତାରକା ଦ୍ରୁତ ବୋଲର୍ ନସିମ ଶାହ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ତାଙ୍କୁ କିଛି ଦିନ ଧରି ପ୍ରବଳ ଜ୍ୱର ହୋଇଥିଲା। ଏପରିକି ତାଙ୍କ ଫୁସ୍ଫୁସ୍ରେ ସଂକ୍ରମଣ ହୋଇଥିବା ଜଣାପଡ଼ିଛି। ତାଙ୍କର ଡେଙ୍ଗୁ ଟେଷ୍ଟ କରାଯିବା ସହ ଚିକିତ୍ସା କରାଯାଉଛି। ଏଭଳି ସ୍ଥିତିରେ ସେ କେବେ ସୁସ୍ଥ ହେବେ ତାହା ସ୍ପଷ୍ଟ ହୋଇନାହିଁ। ଆଗାମୀ ଦିନରେ ବିଶ୍ୱକପ୍ ଭଳି ଗୁରୁତ୍ୱପୂର୍ଣ୍ଣ ମୁକାବିଲା ଆସୁଥିବାରୁ ଦଳ ପାଇଁ ଏହା ଚିନ୍ତାର କାରଣ ପାଲଟିଛି।
କହିରଖୁଛୁ, ପାକିସ୍ତାନ ଟିମ୍ ଏବେ ଇଂଲଣ୍ଡ ବିପକ୍ଷରେ ୭ ମ୍ୟାଚ୍ ବିଶିଷ୍ଟ ଘରୋଇ ଟି୨୦ ସିରିଜ୍ ଖେଳୁଛି। ସେପ୍ଟେମ୍ବର ୨୮ରେ ଏହାର ୫ମ ମୁକାବିଲା ଖେଳାଯିବ। ଏଯାବତ ଖେଳାଯାଇଥିବା ୪ ମ୍ୟାଚ୍ରେ ଉଭୟ ଟିମ୍ ବରାବର ସ୍ଥିତିରେ ରହିଛନ୍ତି। ପାକିସ୍ତାନର ଷ୍ଟାର ଦ୍ରୁତ ବୋଲର ଶାହିନ ଶାହ ଆଫ୍ରିଦି ଆହତ ଥିବା ଯୋଗୁ ଇଂଲଣ୍ଡରେ ଚିକିତ୍ସିତ ହେଉଛନ୍ତି। ତାଙ୍କ ଅନୁପସ୍ଥିତିରେ ନସିମ ମୁଖ୍ୟ ବୋଲର ଭୂମିକା ତୁଲାଇ ଆସୁଥିଲେ। ଏବେ ସେ ମଧ୍ୟ ଦଳରୁ ବାହାରିଥିବା ଯୋଗୁ ଦଳ ଚିନ୍ତାରେ ରହିଛି। ତେବେ ନସିମ ସୁସ୍ଥ ହୋଇ ବିଶ୍ୱକପ୍ ଟିମ୍ ସହ ଯୋଡ଼ି ହେବେ ବୋଲି ଆଶା କରାଯାଉଛି।