ମିଳିଲା ହିଜବୁଲ୍ଲାହ ମୁଖ୍ୟ ନସରଲ୍ଲାଙ୍କ ମୃତଦେହ! ଶରୀରରେ ନାହିଁ କୌଣସି ଆଘାତ ଚିହ୍ନ, ତେବେ କେମିତି ହେଲା ମୃତ୍ୟୁ ?
10 ନୂଆଦିଲ୍ଲୀ,୨୯।୯: ଗତ ଶୁକ୍ରବାର (ସେପ୍ଟେମ୍ବର ୨୭) ରେ ଇସ୍ରାଏଲର ଏୟାର ଷ୍ଟ୍ରାଇକରେ ନିହତ ହୋଇଥିବା ହିଜବୁଲ୍ଲାହ ମୁଖ୍ୟ ହାସନ ନସରାଲ୍ଲାଙ୍କ ମୃତଦେହ ଉଦ୍ଧାର କରାଯାଇଛି। ସୁରକ୍ଷା ଏବଂ ଡାକ୍ତରୀ ଦଳ ମୃତଦେହକୁ ଆକ୍ରମଣ ସ୍ଥାନରୁ ଉଦ୍ଧାର କରିଛନ୍ତି। ଏଥି ସହିତ, ଇସ୍ରାଏଲ କ୍ରମାଗତ ଭାବରେ ହିଜବୁଲ ଉପରେ ଆକ୍ରମଣ କରୁଛି ଏବଂ ରବିବାର (ସେପ୍ଟେମ୍ବର ୨୯) ଲେବାନନ ସୀମାରେ ଟ୍ୟାଙ୍କ ନିୟୋଜିତ କରିଛି।
ନ୍ୟୁଜ୍ ଏଜେନ୍ସି ରଏଟର୍ସ ଅନୁଯାୟୀ, ହିଜବୁଲ ନେତାଙ୍କ ମୃତଦେହକୁ ‘ସୁରକ୍ଷିତ’ ଉଦ୍ଧାର କରାଯାଇଛି। ମେଡିକାଲରୁ ମିଳିଥିବା ଖବର ଏବଂ ସୁରକ୍ଷା ସୂତ୍ରରୁ ପ୍ରକାଶ ଯେ ବେରୁଟର ଦକ୍ଷିଣ ଉପକଣ୍ଠରେ ଇସ୍ରାଏଲର ଏୟାର ଷ୍ଟ୍ରାଇକ୍ ସ୍ଥଳରେ ତାଙ୍କ ମୃତଦେହ ଅକ୍ଷୁର୍ଣ୍ଣ ଅବସ୍ଥାରେ ମିଳିଛି।
ତାଙ୍କ ଶରୀରରେ କୌଣସି କ୍ଷତ ନଥିବା ବେଳେ ପ୍ରବଳ ବିସ୍ଫୋରଣ ଯୋଗୁଁ ମୃତ୍ୟୁର କାରଣ ହୋଇଥାଇପାରେ ଆକଳନ କରାଯାଉଛି। ଅନ୍ୟପକ୍ଷରେ ଇସ୍ରାଏଲ କହିଛି ଯେ ହିଜବୁଲ ଟାର୍ଗେଟ ଉପରେ ଆକ୍ରମଣ ଜାରି ରହିଛି। ଏକ ନୂତନ ରିପର୍ତରେ ଇସ୍ରାଏଲ୍ ସେନା କହିଛି ଯେ ଗତ କିଛି ଘଣ୍ଟା ମଧ୍ୟରେ ଏହା ଲେବାନନରେ ଅନେକ ହିଜବୁଲ ଟାର୍ଗେଟକୁ ଆକ୍ରମଣ କରିଛି। ସେନା କହିଛି ଯେ ଏହି ଆକ୍ରମଣର ଉଦ୍ଦେଶ୍ୟ ହିଜବୁଲାର ରକେଟ୍ ଲଞ୍ଚର୍ ଏବଂ ଅସ୍ତ୍ରଶସ୍ତ୍ର ଗୋଦାମକୁ ନଷ୍ଟ କରିବା ଥିଲା।
ମାସେ ଧରି ଯୋଜନା ଏବଂ ବହୁ ଗୁପ୍ତଚର ସୂଚନା ପରେ ଇସ୍ରାଏଲ୍ ଅଣ୍ଡରଗ୍ରାଉଣ୍ଡ ବଙ୍କର ଉପରେ ଏକ ସଠିକ୍ ଷ୍ଟ୍ରାଇକ୍ କରିଥିଲା ଯେଉଁଠାରେ ନସରଲ୍ଲା ଏବଂ ଅନ୍ୟାନ୍ୟ ହିଜବୁଲ ନେତାମାନେ ସାକ୍ଷାତ କରୁଥିଲେ। ଏହି ବଙ୍କର୍ ଦକ୍ଷିଣ ବେରୁଟର ଏକ ବ୍ୟସ୍ତବହୁଳ ରାସ୍ତାରୁ ୬୦ ଫୁଟ ତଳେ ରହିଥିଲା।
ଗତ କିଛି ସପ୍ତାହ ମଧ୍ୟରେ, ଇସ୍ରାଏଲ୍ ପ୍ରତିରକ୍ଷା ବାହିନୀ (IDF) ଲେବାନନ୍ ଭିତରେ ଆକ୍ରମଣକୁ ତୀବ୍ର କରିଛି। ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ଦାବି କରିଛନ୍ତି ଯେ ଏହି ଆକ୍ରମଣ ଆତଙ୍କବାଦୀ ଗୋଷ୍ଠୀ ହିଜବୁଲକୁ ଧ୍ୱଂସ କରିବା ପାଇଁ ଉଦ୍ଦିଷ୍ଟ, ଯାହା ଇସ୍ରାଏଲର ସାଧାରଣ ନାଗରିକଙ୍କ ଉପରେ ଆକ୍ରମଣ କରିବାକୁ ଯୋଜନା କରୁଛି।