ଚେନ୍ନାଇ,୨୫।୧: ଅଷ୍ଟ୍ରେଲିଆ ଗସ୍ତରେ କ୍ରିକେଟ୍ର ୩ଟି ଫର୍ମାଟରେ ଡେବ୍ୟୁ କରି ଇତିହାସ ରଚିଥିଲେ ଟି. ନଟରାଜନ। ଅଷ୍ଟ୍ରେଲିଆ ଯିବା ପୂର୍ବରୁ ଗୋଟିଏ ଫର୍ମାଟରେ ସ୍ଥାନ ମିଳିବ ବୋଲି ଆଶା କରି ନ ଥିବା ନଟରାଜନ ୩ଟି ଫର୍ମାଟରେ ସ୍ଥାନ ପାଇ ଜବରଦସ୍ତ ପ୍ରଦର୍ଶନ କରିଥିଲେ। ଗୋଟିଏ ଗସ୍ତରେ ୩ଟି ଫର୍ମାଟରେ ସ୍ଥାନ ପାଇବାରେ ସେ ପ୍ରଥମ ଭାରତୀୟ କ୍ରିକେଟର୍ ହୋଇଥିଲେ। ଚମତ୍କାର ପ୍ରଦର୍ଶନ କରି ନିଜ ଗାଁ ସଲେମ ଜିଲାର ଚିନ୍ନାପାମପଟ୍ଟୀରେ ପହଞ୍ଚିବା ପରେ ତାଙ୍କୁ ଜୋରଦାର ସ୍ବାଗତ କରାଯାଇଥିଲା। ନିକଟରେ ଏକ ସାକ୍ଷାତକାରରେ ନଟରାଜନ କହିଛନ୍ତି, ଦଳରେ ସ୍ଥାନ ପାଇବା ମୋ ପାଇଁ ସ୍ବପ୍ନ ଥିଲା, ଏତେ ଶୀଘ୍ର ୩ଟି ଫର୍ମାଟରେ ସ୍ଥାନ ପାଇବି କେବେ ଆଶା କରି ନ ଥିଲି। ମୋତେ କୋଚ ଏବଂ ସାଥୀ ଖେଳାଳି ସହଯୋଗ କରିଥିଲେ। ବିରାଟ କୋହଲି ଏବଂ ଅଜିଙ୍କେ ରାହାନେଙ୍କ ଅଧିନାୟିକତ୍ୱରେ ଖେଳିବା ଭଲ ଲାଗିଲା। ଦୁହେଁ ମୋତେ ଭଲ ଭାବରେ ସମ୍ଭାଳି ଥିଲେ। ଟି-୨୦ ସିରିଜ୍ ଜିତିବା ପରେ କୋହଲି ଯେତେବେଳେ ବିଜୟ ଟ୍ରଫି ମୋ ହାତରେ ଦେଇଥିଲେ ସେତେବେଳେ ମୁଁ ଭାବପ୍ରବଣ ହୋଇଯାଇଥିଲି। ମୋ ଆଖିରୁ ଲୁହ ଆସିଯାଇଥିଲା ବୋଲି ସେ କହିଛନ୍ତି।