ଭୁବନେଶ୍ୱର, ୩୦।୯(ବ୍ୟୁରୋ): ଭାରତର ପ୍ରମୁଖ ମନୋରଞ୍ଜନ ଭିତ୍ତିକ ଚ୍ୟାନେଲ ‘ଦି କ୍ୟୁ ଟିଭି’ ନଟିଆ କମେଡିକୁ ନିଜ ଚ୍ୟାନେଲରେ ପ୍ରସାରିତ କରିବା ପାଇଁ ଉତ୍କଳ କାର୍ଟୁନ ସହ ଚୁକ୍ତି କରିଛି। ଏହି ଚୁକ୍ତିନାମା ଅନୁସାରେ ନଟିଆ କମେଡିର ସମସ୍ତ ଅଧ୍ୟାୟ ହିନ୍ଦୀରେ ଡବିଂ ହୋଇ ଦେଢ଼ବର୍ଷ ଲାଗି ‘ଦି କ୍ୟୁ ଟିଭି’ରେ ପ୍ରସାରିତ ହେବ। ଏହା ଓଡ଼ିଶାର ପ୍ରଥମ ଏପରି ଏକ ସିରିଜ୍, ଯାହାକି ହିନ୍ଦୀ ଭାଷାରେ ଡବିଂ ହୋଇ ସାରା ଭାରତରେ ପ୍ରସାରିତ ହେବ। ଉତ୍କଳ କାର୍ଟୁନ ପକ୍ଷରୁ କୁହାଯାଇଛି, ଏହାର ପ୍ରଥମ ଶ୍ରେୟ ସମସ୍ତ ଓଡ଼ିଶାବାସୀଙ୍କର। ସେମାନଙ୍କ ଭଳପାଇବା ନଟିଆକୁ ଏତେ ଆଗକୁ ନେଇଗଲା ଯେ ଏବେ ଜାତୀୟ ଚ୍ୟାନେଲ୍ ଏହା ପାଇଁ ଆଗ୍ରହ ପ୍ରକାଶ କରିଛନ୍ତି। ସୂଚନାଯୋଗ୍ୟ, ନଟିଆ କମେଡି ଓଡ଼ିଶାର ଘରେ ଘରେ ପରିଚିତ। ପିଲାମାନେ ନଟିଆ କମେଡି ଦେଖିବା ପାଇଁ ଯେତିକି ଆଗ୍ରହ ପ୍ରକାଶ କରୁଛନ୍ତି ବଡ଼ମାନେ ମଧ୍ୟ ସେତିକି ଆଗ୍ରହ ଦେଖାଉଛନ୍ତି।
