ନୂଆଦିଲ୍ଲୀ, ୧୪।୯: ସୋମବାର ଲୋକ ସଭା ଏବଂ ରାଜ୍ୟ ସଭାର ମୌସୁମୀ ଅଧିବେଶନ ଆରମ୍ଭ ହୋଇଛି। ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସଂସଦ ଭବନରେ ପହଞ୍ଚି ସୀମାରେ ଶତ୍ରୁ ସହିତ ଲଢୁଥିବା ଯବାନଙ୍କ ମନୋବଳ ବଢ଼ାଇଛନ୍ତି। ମୋଦି କହିଛନ୍ତି ଯେ, ଯବାନଙ୍କ ପଛରେ ଦେଶ ଛିଡ଼ା ହୋଇଛି। ଚାଇନା ସହିତ ଜାରି ରହିଥିବା ସୀମା ବିବାଦ ସମୟରେ ପ୍ରଧାନମନ୍ତ୍ରୀଙ୍କ ଏଭଳି ମନ୍ତବ୍ୟ ବେଶ୍ ଗୁରୁତ୍ୱପୂର୍ଣ୍ଣ ବୋଲି ରାଜନୈତିକ ମହଲରେ ଚର୍ଚ୍ଚା ହେଉଛି। ଉଚ୍ଚ ପାହାଡ଼ରେ ବିଭିନ୍ନ ପ୍ରାକୃତିକ ସମସ୍ୟା ମଧ୍ୟରେ ଦେଶର ବୀର ଯବାନ ଦେଶର ସୀମାରେ ମୁତୟନ ରହିଛନ୍ତି। ଯେଭଳି ଆତ୍ମବିଶ୍ୱାସ ସହିତ ଯବାନମାନେ ସୀମାରେ ଦେଶର ରକ୍ଷା କରୁଛନ୍ତି, ସେମାନଙ୍କ ପାଇଁ ସଂସଦର ସମସ୍ତ ସଦସ୍ୟ ନିଶ୍ଚିତ ଏକଜୁଟ ହେବେ ବୋଲି ମୋଦି କହିଛନ୍ତି। ଏହା ସହିତ କରୋନା ମହାମାରୀ ସଙ୍କଟରେ ସତର୍କ ରହିବା ଲାଗି ପ୍ରଧାନମନ୍ତ୍ରୀ ଦେଶବାସୀଙ୍କୁ ପରାମର୍ଶ ଦେଇଛନ୍ତି। ଶୀଘ୍ର କରୋନା ପ୍ରତିଷେଧକ ଟିକା ଆସିଲେ ଏହି ସମସ୍ୟାର ସମାଧାନ ହେବ। ଯେପର୍ଯ୍ୟନ୍ତ ଟିକା ନ ଆସିଛି ସେ ପର୍ଯ୍ୟନ୍ତ ସରକାରଙ୍କ ପକ୍ଷରୁ ଜାରି ହୋଇଥିବା ମାର୍ଗଦର୍ଶିକା ପାଳନ କରିବାକୁ ସେ କହିଛନ୍ତି।
