ଭୁବନେଶ୍ୱର, ୨୭।୩(କ୍ରୀଡ଼ା ପ୍ରତିନିଧି)-
ସ୍ଥାନୀୟ କଳିଙ୍ଗ ଷ୍ଟାଡିୟମରେ ଚାଲିଥିବା ସର୍ବପ୍ରଥମ ହକି ଇଣ୍ଡିଆ ଜାତୀୟ ଏକାଡେମୀ ମହିଳା ହକି ଟୁର୍ନାମେଣ୍ଟରେ ସାଇ ଏକାଡେମୀକୁ ଡବଲ ଟାଇଟଲ ମିଳିଛି। ଗୁରୁବାର ସବ୍ଜୁନିୟର ବିଭାଗ ଫାଇନାଲରେ ସଡନ୍ ଡେଥ୍ ୫-୪ (ଶୁଟ୍ ଆଉଟ) ଗୋଲରେ ଓଡ଼ିଶା ନାଭାଲ ଟାଟା ହକି ହାଇ ପରଫର୍ମାନ୍ସ ସେଣ୍ଟର (ଏନଟିଏଚ୍)କୁ ହରାଇଥିବା ସାଇ ଶୁକ୍ରବାର ଜୁନିୟର ବିଭାଗ ଫାଇନାଲରେ ମଧ୍ୟପ୍ରଦେଶ ଏକାଡେମୀକୁ ୨-୧ ଗୋଲରେ ହରାଇ ଦେଇଛି। ବିଜୟୀ ଦଳ ପକ୍ଷରୁ ସଞ୍ଜନା ହୋରୋ ୭ ଓ ୨୩ତମ ମିନିଟରେ ୨ଟି ଗୋଲ ଦେଇଥିବାବେଳେ ଯୋଗିତା ବର୍ମା ୨୫ତମ ମିନିଟରେ ଗୋଟିଏ ଗୋଲ ପରିଶୋଧ କରିଥିଲେ। ପ୍ଲେ-ଅଫ୍ରେ ଏନଟିଏଚ୍ ୫-୧ ଗୋଲରେ ଅମୃତସର ଖାଲସା ହକି ଏକାଡେମୀକୁ ହରାଇ ତୃତୀୟ ସ୍ଥାନ ଅଧିକାର କରିଛି। ଓଡ଼ିଶା ଦଳ ପକ୍ଷରୁ ତନୁ କିଷାନ ୨୮, ୩୮ ଏବଂ ଅଧିନାୟିକା ଜ୍ୟୋତି ଛତ୍ରି ୨୧ ଓ ୪୮ତମ ମିନିଟରେ ୨ଟି ଲେଖାଏ ଏବଂ କମଳା ସିଂ ୩୧ତମ ମିନିଟରେ ଗୋଟିଏ ଗୋଲ ଦେଇଥିଲେ। ବିପକ୍ଷ ଦଳର ତରନପ୍ରିତ କୌର ୧୭ତମ ମିନିଟରେ ଗୋଟିଏ ଗୋଲ ପରିଶୋଧ କରିଥିଲେ। ଭାରତୀୟ ହକି ଦଳର ପୂର୍ବତନ ଅଧିନାୟକ ପଦ୍ମଶ୍ରୀ ଦିଲୀପ ତିର୍କୀ, ରାଜ୍ୟ କ୍ରୀଡ଼ା ବିଭାଗର ପ୍ରମୁଖ ସଚିବ ବିଶାଳ କୁମାର ଦେବ, ହକି ଇଣ୍ଡିଆ ସମ୍ପାଦକ ପ୍ରତାପ ଶତପଥୀ, ଟାଟା ଷ୍ଟିଲ୍ର ଚିଫ୍ ରେସିଡେଣ୍ଟ ଏକ୍ଜିକ୍ୟୁଟିଭ୍ ଦେବାଶିଷ ଜେନା ପ୍ରମୁଖ ଅତିଥିଭାବେ ଯୋଗଦେଇ ପୁରସ୍କାର ପ୍ରଦାନ କରିଥିଲେ।
