ଭୁବନେଶ୍ୱର, ୨୬।୩(କ୍ରୀଡ଼ା ପ୍ରତିନିଧି)-ସ୍ଥାନୀୟ କଳିଙ୍ଗ ଷ୍ଟାଡିୟମରେ ଚାଲିଥିବା ସର୍ବପ୍ରଥମ ହକି ଇଣ୍ଡିଆ ଜାତୀୟ ଏକାଡେମୀ ମହିଳା ହକି ଟୁର୍ନାମେଣ୍ଟର ସବ୍ଜୁନିୟର ବିଭାଗରେ ସାଇ ଏକାଡେମୀ ଚାମ୍ପିୟନ ହୋଇଛି। ଗୁରୁବାର ଅନୁଷ୍ଠିତ ତୀବ୍ର ସଂଘର୍ଷପୂର୍ଣ୍ଣ ଫାଇନାଲରେ ସାଇ ସଡନ୍ ଡେଥ୍ ୫-୪ (ଶୁଟ୍ ଆଉଟ) ଗୋଲରେ ଓଡ଼ିଶା ନାଭାଲ ଟାଟା ହକି ହାଇ ପରଫର୍ମାନ୍ସ ସେଣ୍ଟର (ଏନଟିଏଚ୍)କୁ ପରାସ୍ତ କରିଛି। ଫାଇନାଲ ବେଶ୍ ରୋମାଞ୍ଚକ ହୋଇଥିଲା। ଏନ୍ଟିଏଚ୍ର ଅମନ ପ୍ରୀତ କୌର ୮ତମ ମିନିଟରେ ଗୋଲ ଦେଇ ଦଳକୁ ଅଗ୍ରଣୀ କରାଇଥିବାବେଳେ ୩୮ତମ ମିନିଟରେ ସାଇ ଅଧିନାୟିକା ସୋନମ ଗୋଲଟିକୁ ପରିଶୋଧ କରି ଦେଇଥିଲେ। ୪୨ତମ ମିନିଟରେ ପ୍ରିୟା ଟପ୍ପୋ ଗୋଲ ଦେଇ ପୁଣି ଏନଟିଏଚ୍କୁ ଅଗ୍ରଣୀ ଦେଇଥିଲେ। ମାତ୍ର ସାଇର କୀର୍ତ୍ତି ୫୫ତମ ମିନିଟରେ ଗୋଲଟିକୁ ପରିଶୋଧ କରିଦେବାରୁ ମ୍ୟାଚ ୨-୨ ସ୍ଥିତିରେ ଶେଷ ହୋଇଥିଲା। ଫଳାଫଳ ନିର୍ଣ୍ଣୟ ପାଇଁ ଶୁଟ୍ ଆଉଟର ସହାୟତା ନିଆଯାଇଥିଲା। ମାତ୍ର ଏହି ପର୍ଯ୍ୟାୟ ମଧ୍ୟ ୫-୫ ଗୋଲରେ ବରାବର ରହିଥିଲା। ଫଳରେ ସଡନ୍ ଡେଥ୍ ପଦ୍ଧତି ଅବଲମ୍ବନ କରାଯାଇଥିଲା। ପ୍ରଥମ ୩ ସୁଯୋଗରୁ ସାଇ ୨ଟି ଗୋଲ ଦେଇଥିବାବେଳେ ଏନଟିଏଚ୍ ମାତ୍ର ଗୋଟିଏ ଗୋଲ ସ୍କୋର କରିବାକୁ ସକ୍ଷମ ହୋଇଥିଲା। ଫଳରେ ସାଇ ଚାମ୍ପିୟନ ହୋଇଥିଲା। ସାଇ ପକ୍ଷରୁ ପ୍ରିୟା ଓ ପୂଜା ସାହୁ ଗୋଲ ଦେଇଥିବାବେଳେ ସୋନମ ମିସ୍ କରିଥିଲେ। ଅନ୍ୟପକ୍ଷରେ ଏନ୍ଟିଏଚ୍ର ସୁମି ମୁଣ୍ଡାରୀ ଗୋଲ ଦେବାରେ ସକ୍ଷମ ହୋଇଥିବାବେଳେ ଟୁଟି ଇଲାନି ଓ ଅସିମା ରାଉଦ ମିସ୍ କରିଥିଲେ। ଫଳରେ ଲିଗ୍ ପର୍ଯ୍ୟାୟରେ ଚମତ୍କାର ପ୍ରଦର୍ଶନ କରିଥିବା ଏନଟିଏଚ୍ ଦୁର୍ଭାଗ୍ୟଜନକ ଭାବେ ରନର୍ସଅପ୍ରେ ସନ୍ତୁଷ୍ଟ ରହିଥିଲା। ପ୍ଲେ-ଅଫ୍ ମ୍ୟାଚରେ ମଧ୍ୟପ୍ରଦେଶ ଏକାଡେମୀ ୮-୦ ଗୋଲରେ ରାଉଣ୍ଡ ଗ୍ଲାସ ପଞ୍ଜାବ ହକି କ୍ଲବ ଏକାଡେମୀକୁ ପରାସ୍ତ କରି ତୃତୀୟ ସ୍ଥାନ ଅଧିକାର କରିଛି।
ଜୁନିୟର ସେମିରେ ଏନଟିଏଚ୍ ପରାସ୍ତ
ପ୍ରତିଯୋଗିତାର ଜୁନିୟର ବିଭାଗରେ ସେମିଫାଇନାଲରୁ ଏନଟିଏଚ୍ର ଅଭିଯାନ ଶେଷ ହୋଇଛି। ଗୁରୁବାର ସେମିଫାଇନାଲରେ ଏନଟିଏଚ୍ ୦-୬ ଗୋଲରେ ସାଇ ଏକାଡେମୀଠାରୁ ହାରି ଯାଇଛି। ଲିଗ୍ ପର୍ଯ୍ୟାୟରେ ଅପରାଜେୟ ରହିଥିବା ଏନ୍ଟିଏଚ୍ ସେମିଫାଇନାଲରେ ଆଶାନୁରୂପ ପ୍ରଦର୍ଶନ କରିପାରି ନ ଥିଲା। ଅନ୍ୟ ଏକ ସେମିଫାଇନାଲରେ ମଧ୍ୟପ୍ରଦେଶ ହକି ଏକାଡେମୀ ୨-୧ ଗୋଲରେ ଅମୃତସରର ଖାଲସା ହକି ଏକାଡେମୀକୁ ହରାଇ ଦେଇଛି। ଫାଇନାଲ ଶୁକ୍ରବାର ଅନୁଷ୍ଠିତ ହେବ।
