ପଦ୍ମପୁର,୧୭ା୯(ପ୍ରଦୀପ୍ତ ଦାଶ): ଭାରତ ସରକାରଙ୍କ ନୂଆଦିଲ୍ଲୀସ୍ଥିତ କେନ୍ଦ୍ର ନାଟକ ଏକାଡେମୀ ପକ୍ଷରୁ ଦେଶର ୭୫ ଜଣ ବରିଷ୍ଠ ଶିଳ୍ପୀଙ୍କୁ ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ପୁରସ୍କୃତ କରାଯାଇଛି। ନୂଆଦିଲ୍ଲୀ ବିଜ୍ଞାନ ଭବନରେ ଆୟୋଜିତ ଏକ ଭବ୍ୟ ସମାରୋହରେ ମାନ୍ୟବର ଉପରାଷ୍ଟ୍ରପତି ଜଗଦୀପ ଧନଖର ଏହି ସମ୍ମାନଜନକ ଅମୃତ ପୁରସ୍କାର ପ୍ରଦାନ କରିଛନ୍ତି। ଲୋକବାଦ୍ୟ ବ୍ରହ୍ମବୀଣା ବାଦକ ଆନନ୍ଦ ବାଗ ଅନ୍ୟତମ। ବରଗଡ଼ ଜିଲା ପଦ୍ମପୁର ବ୍ଲକ ଅନ୍ତର୍ଗତ ବିଶିପାଲି ଗ୍ରାମର ଏହି ଶିଳ୍ପୀ ସାରା ଜୀବନ ଲୋକବାଦ୍ୟ ବ୍ରହ୍ମବୀଣାର ବାଦନ ଓ ଗାୟନରେ ସମର୍ପିତ ହୋଇଛନ୍ତି। ୮୫ ବର୍ଷ ବୟସର ଏହି ବରିଷ୍ଠ କଳାକାର ଦେବଗୁନିଆ ସଂପ୍ରଦାୟର କୌଳିକ ଲୋକବାଦ୍ୟ ବ୍ରହ୍ମବୀଣାକୁ ଜାତୀୟ ସ୍ତରରେ ବିଭିନ୍ନ ସ୍ବନାମଧନ୍ୟ ମଞ୍ଚରେ ପରିବେଷଣ କରି ଅଞ୍ଚଳକୁ ଗୌରବ ଆଣିଛନ୍ତି। ସେ ବୁରୋମୁଣ୍ତା ଗ୍ରାମରେ ଥିବା କଳାଗ୍ରାମ ଆଦିବାଦ୍ୟଦଳର ଜଣେ ସକ୍ରିୟ ସଦସ୍ୟ।
ସୂଚନାଯୋଗ୍ୟ, ସେ ଏଭଳି ସମ୍ମାନଜନକ କେନ୍ଦ୍ର ସଙ୍ଗୀତ ଏକାଡେମୀ ପୁରସ୍କାର ପାଇବା କ୍ଷେତ୍ରରେ ପଶ୍ଚିମ ଓଡ଼ିଶାରେ ପ୍ରଥମ ଲୋକ କଳାକାର। ଏକ ଅଖ୍ୟାତ ପଲ୍ଲୀରୁ ଦିଲ୍ଲୀ ଜାତୀୟସ୍ତରକୁ ପହଞ୍ଚିବାରେ ରବିରତନ ସାହୁଙ୍କ ଅବଦାନକୁ କେହି ଅସ୍ବୀକାର କରି ପାରିବେ ନାହିଁ। ଜାତୀୟ ଅମୃତ ପୁରସ୍କାର ପାଇବା ପରେ ଅଞ୍ଚଳରେ ଖୁସିର ଲହରୀ ଖେଳି ଯାଇଛି। ଆନନ୍ଦଙ୍କୁ ଅନେକ କଳାକାର,ଶୁଭେଚ୍ଛୁଙ୍କ ପ୍ରଶଂସାର ସୁଅ ଛୁଟିଛି।