କଟକ ଅଫିସ, ୪ା୪: କେନ୍ଦ୍ର ସରକାରଙ୍କ ଅନୁବନ୍ଧିତ ଗୁଜରାଟ କାଉସିଲ ଅନ ସାଇନ୍ସ ଆଣ୍ଡ ଟେକ୍ନୋଲୋଜି ଦ୍ୱାରା ୩୦ତମ ଜାତୀୟ ଶିଶୁ ବିଜ୍ଞାନ କଂଗ୍ରେସ (ନ୍ୟାଶନାଲ ଚାଇଲ୍ଡ ସାଇନ୍ସ କଂଗ୍ରେସ) ଅହମଦାବାଦରେ ଅନୁଷ୍ଠିତ ହୋଇଯାଇଛି। ଏଥିରେ ଭାରତ, ଦୁବାଇ, ସଂଯୁକ୍ତ ଆରବ ଏମିରେଟ୍ସ, କତାର ଆଦି ବିଭିନ୍ନ ଦେଶରୁ ୮୫୦ରୁ ଊର୍ଦ୍ଧ୍ୱ ଛାତ୍ରୀଛାତ୍ର ଅଂଶଗ୍ରହଣ କରିଥିଲେ। ସେମାନଙ୍କ ମଧ୍ୟରେ ଭାରତର ୨୦ଟି ରାଜ୍ୟ ଓ ୯ଟି ୟୁନିଅନ ଟେରିଟୋରିର ଛାତ୍ରୀଛାତ୍ର ରହିଥିଲେ। ଏହି ଶିଶୁ ବିଜ୍ଞାନ କଂଗ୍ରେସରେ କଟକ ସଦର କନ୍ଦରପୁର ଉପକଣ୍ଠ ଦଣ୍ଡୁଆସିପଡ଼ା ବାସିନ୍ଦା ଜୀବନ ଜ୍ୟୋତି ଜେନା ଏବଂ ତପସା ଜେନାଙ୍କ ପୁତ୍ର ତଥା ଗୁରୁ ନାନକ ପବ୍ଲିକ ସ୍କୁଲ ନବମ ଶ୍ରେଣୀର ଛାତ୍ର ଜୟଦୀପ ଜେନା ସ୍ବର୍ଣ୍ଣ ପଦକ ଓ ପ୍ରମାଣପତ୍ର ଲାଭ କରିଛନ୍ତି। ଜୟଦୀପ ମତ୍ସ୍ୟ ବ୍ଲୁ ମାନୁରି ନାମକ ପ୍ରକଳ୍ପ ପ୍ରଦର୍ଶନ କରିଥିଲେ, ଯାହାକି ଏକ ଖତ। ଏହା ମାଛର ବର୍ଜ୍ୟବସ୍ତୁ, କ୍ରାବ୍ ଶେଲ୍, ଲୋବଷ୍ଟର ସ୍କିନ୍ ଇତ୍ୟାଦିରେ ପ୍ରସ୍ତୁତ ହୋଇଥିଲା। ଏହି ପ୍ରକଳ୍ପ ପ୍ରସ୍ତୁତ କରିବା ପାଇଁ ବିଦ୍ୟାଳୟର ବିଜ୍ଞାନ ଶିକ୍ଷୟିତ୍ରୀ ସୁଦୀପ୍ତା ଦାଶ ଗାଇଡ୍ କରିଥିଲେ। ବିଜ୍ଞାନ କଂଗ୍ରେସରେ ପ୍ରକଳ୍ପ ପ୍ରଦର୍ଶନ ପୂର୍ବରୁ ଜଗତପୁରସ୍ଥିତ ବାୟୋକେମିକାଲ ଲାବୋରୋଟୋରୀ, ସିଟି ଲ୍ୟାବ ଆଦି ବିଭିନ୍ନ ସ୍ଥାନରେ ପରୀକ୍ଷଣ କରାଯାଇଥିଲା। ଭୁବନେଶ୍ୱରସ୍ଥିତ ପ୍ରଭୁଜୀ ଇଂଲିଶ୍ ମିଡିୟମ୍ ସ୍କୁଲଠାରେ ଅନୁଷ୍ଠିତ ରାଜ୍ୟସ୍ତରୀୟ ପ୍ରଦର୍ଶନୀରେ ଏହି ପ୍ରକଳ୍ପଟି ପ୍ରଶଂସା ପାଇବା ସହ ଆଦୃତ ଲାଭ କରିଥିଲା।
