ଭୋପାଳ,୨୦ ।୧୦: ମଧ୍ୟପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ କମଲନାଥ ଏକ ଜନସଭାରେ ଉଦ୍ବୋଧନ ଦେବା ସମୟରେ ଭାରତୀୟ ଜନତା ପାର୍ଟି(ଭାଜପା) ମନ୍ତ୍ରୀ ଇର୍ମତି ଦେବୀଙ୍କୁ ଆଇଟମ ବୋଲି କହି ଅଡୁଆରେ ପଡି ଯାଇଛନ୍ତି । ଯଦିଓ ସେ ଏକ ପ୍ରକାର ଏଥିପାଇଁ କ୍ଷମା ମାଗି ସାରିଲେଣି ତଥାପି ଅଡୁଆ ତାଙ୍କ ପିଛା ଛାଡୁନି । ଭାଜପା ପ୍ରତି ମୁହୂର୍ତ୍ତରେ ଏହି ଟିପ୍ପଣିକୁ ନେଇ ତାଙ୍କୁ ଘେରୁଥିବା ବେଳେ ନିର୍ବାଚନ କମିଶନ ମଧ୍ୟ ଏ ସମ୍ପର୍କରେ କମଲନାଥଙ୍କୁ ରିପୋର୍ଟ ମାଗିଛନ୍ତି । ଏହାପରେ ଏବେ ମହିଳା କମିଶନ ମଧ୍ୟ କଂଗ୍ରେସକୁ କମଲନାଥଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନେବାକୁ ଦାବି କରିଥିବା ବେଳେ ପ୍ରଶ୍ନ କରିଛି ସେ ଆଇଟମ କ’ଣ । ଜାତୀୟ ମହିଳା କମିଶନ ଅଧ୍ୟକ୍ଷା ରେଖା ଶର୍ମା ମଙ୍ଗଳବାର କହିଛନ୍ତି ପୂର୍ବତନ ମୁଖ୍ୟମନ୍ତ୍ରୀଙ୍କ ଏଭଳି ବୟାନ ନିଶ୍ଚିତ ଭାବେ ଭୁଲ୍ । କମଲନାଥ କହିଛନ୍ତି ଯେ ସେ ଏକ ସୂଚିରେ ଏହା ପଢିଥିଲେ । ତେବେ ସେ ସୂଚିରେ କେଉଁଠି ମନ୍ତ୍ରୀଙ୍କ ନାଁ ଥିଲା ଓ ସେ କେଉଁଭଳି ଆଇଟମ ବୋଲି ରେଖା ଶର୍ମା ପ୍ରଶ୍ନ କରିଛନ୍ତି । ଆଉ କମଲନାଥ କ୍ଷମା ମାଗିବା ପରିବର୍ତ୍ତେ ବେକାର ସ୍ପଷ୍ଟି କରଣ ଦେଉଛନ୍ତି ତେଣୁ ଦଳ ତାଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରୁ ବୋଲି ରେଖା ଶର୍ମା କହିଛନ୍ତି ।