ମାର୍ଶାଘାଇ,୨୯ା୪ (ଡି.ଏନ.ଏ.): କେନ୍ଦ୍ରାପଡ଼ା ଜିଲା ଦେଇ ଯାଇଥିବା ଚଣ୍ଡିଖୋଲ-ପାରାଦୀପ ୫୩ ନଂ. ଜାତୀୟ ରାଜପଥ ଏବେ ଲୁହାପଥର ବୋଝେଇ ଟ୍ରକ୍ଗୁଡ଼ିକର ପାର୍କିଂ ସ୍ଥଳ ପାଲଟିଛି। ବିଶେଷ ଭାବେ ମାର୍ଶାଘାଇ ଥାନା ଅନ୍ତର୍ଗତ ହଜାରୀ ଛକଠାରୁ ନୀଳାଚଳ ବଜାର ପର୍ଯ୍ୟନ୍ତ ପ୍ରାୟ ୨୦ କି.ମି. ରାସ୍ତାର ଗୋଟିଏ ପାର୍ଶ୍ୱ ସବୁବେଳେ ଜାମ ରହୁଥିବାରୁ ବିଭିନ୍ନ ସମୟରେ ଦୁର୍ଘଟଣା ଘଟି ଅକାଳରେ ଲୋକଙ୍କ ଜୀବନ ଚାଲିଯାଉଛି। ଦୁର୍ଘଟଣାକୁ ଦୃଷ୍ଟିରେ ରଖି ରାଜ୍ୟ ସରକାରଙ୍କ ନିୟମ ଅନୁସାରେ ରାଜପଥରେ କୌଣସି ଭାରିଯାନ ପାର୍କିଂ କରିପାରିବେ ନାହିଁ। କିନ୍ତୁ ଏଠାରେ ସବୁ ବେଳେ ରାଜପଥରେ ଟ୍ରକ୍ଗୁଡିକ ପାର୍କିଂ କରି ରହୁଛନ୍ତି। ପାରାଦୀପ ବନ୍ଦରରେ ଲୁହାପଥର ଖଲାସରେ ବିଳମ୍ବ ଯୋଗୁ ଏହି ଜାମ ରହୁଥିବା କୁହାଯାଉଛି। ଯେତେବେଳେ ଟ୍ରକ୍ଗୁଡିକ ଧୀରେ ଧୀରେ ରାଜପଥରେ ଆଗକୁ ଯିବା ଆରମ୍ଭ କରୁଛି ପଛରେ ଥିବା ଟ୍ରକ୍ କେମିତି ଆଗକୁ ଯିବ ସେଥିପାଇଁ ପ୍ରତିଯୋଗିତା ଚାଲିଛି। ଫଳରେ ରାଜପଥ ପାରହେଉଥିବା ଲୋକ ଓ ବାଇକ୍ ଆରୋହୀମାନେ ଦୁର୍ଘଟଣାର ଶିକାର ହେଉଛନ୍ତି। ୪ଦିନ ତଳେ କେନାଲ୍ ବ୍ରିଜଠାରେ ଜଣେ ବ୍ୟକ୍ତିଙ୍କ ଉପରେ ଆଇରନ ବୋଝେଇ ଟ୍ରକ୍ ଚଢିଯିବାରୁ ତାଙ୍କର ମୃତ୍ୟୁ ହୋଇଥିଲା। ଗତ ସପ୍ତାହରେ ନୀଳାଚଳ ବଜାରଠାରେ ଏହିଭଳି ଭାବେ ଜଣେ ଯୁବକ ଉପରେ ଟ୍ରକ୍ ମାଡିଯିବାରୁ ତାଙ୍କର ମଧ୍ୟ ଘଟଣାସ୍ଥଳରେ ମୃତ୍ୟୁକୁ ନେଇ ସ୍ଥାନୀୟ ଲୋକମାନେ ଟାୟାର ଜାଳି ରାଜପଥ ଅବରୋଧ କରିଥିଲେ। ପ୍ରଶାସନ ପକ୍ଷରୁ ଏହାର କୌଣସି ସ୍ଥାୟୀ ସମାଧାନ କରାଯାଉ ନ ଥିବାରୁ ସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଉଛି।