ରାୟପୁର,୧୩।୩: ଛତିଶଗଡ଼ର ବସ୍ତର ଜିଲାର ଜାତୀୟ ରାଜପଥ-୩୦ର ବଡଇଗୁଡା ସ୍ଥିତ ଟୋଲ ପ୍ଲାଜା ନିକଟରେ ସୋମବାର କେତେକ ସ୍ଥୀନୀୟ ଲୋକ ତୀବ୍ର ବିରୋଧ କରିଛନ୍ତି। ଗ୍ରାମବାସୀଙ୍କ ତୀବ୍ର ବିରୋଧ ମଧ୍ୟରେ ଏସ୍ଡିଏମ୍ ଏହି ଟୋଲ୍ ପ୍ଲାଜାକୁ ସିଲ୍ କରିଦେଇଥିବା ଜଣାପଡ଼ିଛି। ଫଳରେ ଏହାଦ୍ୱାରା ଏନ୍ଏଚ୍ଏଆଇକୁ ଏକ ବଡ଼ ଝଟ୍କା ଲାଗିଛି। ସୂଚନାଯୋଗ୍ୟ, ଟୋଲ ପ୍ଲାଜା ଅପରେଟରଙ୍କ ଅବହେଳା ବିରୋଧରେ ସୋମବାର ସକାଳେ ବହୁ ସଂଖ୍ୟାରେ ଗ୍ରାମବାସୀ ବିରୋଧ କରିଥିଲେ। ଗତ ୧୦ ମାସରୁ ଟୋଲ୍ ପ୍ଲାଜାର ବ୍ୟବସ୍ଥାରେ ଉନ୍ନତି ଆଣିବାକୁ ବସ୍ତରବାସୀ ଦାବି କରିଆସୁଛନ୍ତି। ଏହା ସତ୍ତ୍ୱେ ଟୋଲ ପ୍ଲାଜା ଅପରେଟର କୌଣସି ଠୋସ୍ ପଦକ୍ଷେପ ନେଇ ନ ଥିବାରୁ ଗ୍ରାମବାସୀମାନେ ଟୋଲ୍ ପ୍ଲାଜାରେ ବିରୋଧ ପ୍ରଦର୍ଶନ କରିବା ସହ ସେଠାରେ ପୋଡାଜଳା କରିଥିଲେ। ଏନେଇ ସୂଚନା ମିଳିବା ପରେ ଘଟଣାସ୍ଥଳରେ ପ୍ରଶାସନିକ ଟିମ୍ ପହଞ୍ଚି ସମସ୍ତଙ୍କୁ ବୁଝାଶୁଝା କରିଥିଲେ। ଏଥିସହ ବ୍ୟବସ୍ଥାରେ ଉନ୍ନତି ଆଣିବା ପାଇଁ ଗତ ୨ମାସରେ ଏନ୍ଏଚ୍ଆଇକୁ ୩ଥର ନୋଟିସ ଦେବା ପରେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ ନ କରିବାରୁ ଏସ୍ଡିଏମ୍ଙ୍କ ଉପସ୍ଥିତିରେ ତହସିଲଦାର ଟୋଲ ପ୍ଲାଜାକୁ ସିଲ୍ କରିଦେଇଛନ୍ତି।