ନୂଆଦିଲ୍ଲୀ,୨୮ା୩: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଗିରଫ କରିବା ପରେ ଏହି କେନ୍ଦ୍ରଶାସିତ ଅଞ୍ଚଳରେ ରାଷ୍ଟ୍ରପତି ଶାସନ ଜାରି କରିବାକୁ କେନ୍ଦ୍ର ସରକାର ମସୁଧା ଚଳାଇଥିବା ଆମ୍ ଆଦ୍ମୀ ପାର୍ଟି (ଆପ୍) ଆଶଙ୍କା କରିଛି। ଏପରି କରାଗଲେ ଏହାକୁ ‘ରାଜନୈତିକ ପ୍ରତିଶୋଧ’ ବୋଲି ଧରାଯିବ ବୋଲି କ୍ୟାବିନେଟ ମନ୍ତ୍ରୀ ଆତିଶୀ କହିଛନ୍ତି।
ଉପରାଜ୍ୟପାଳ ଭି.କେ. ସକ୍ସେନା ବୁଧବାର ନିଜ ଏକ୍ସ’ ହ୍ୟାଣ୍ଡେଲରେ କହିଛନ୍ତି, ଜେଲରୁ ସରକାର ଚଳାଯାଇପାରିବ ନାହିଁ। ଏକ ସାକ୍ଷାତ୍କାର ବେଳେ ଅତିଶୀଙ୍କୁ ଏନେଇ ପ୍ରଶ୍ନ କରାଯିବାରୁ ସେ କହିଛନ୍ତି, ଜଣେ ଆଇନ ପ୍ରଣେତା ଦୋଷୀ ସାବ୍ୟସ୍ତ ହେଲେ ତାଙ୍କ ସଦସ୍ୟତା ରଦ୍ଦ ନେଇ ଜନ ପ୍ରତିନିଧି ଆଇନରେ ଉଲ୍ଲେଖ କରାଯାଇଛି। ତେବେ କେଉଁ ସର୍ତ୍ତକୁ ନେଇ ରାଷ୍ଟ୍ରପତି ଶାସନ ଲାଗୁ କରାଯିବ ବୋଲି ସେ ପ୍ରଶ୍ନ କରିଛନ୍ତି। କେବଳ ଅନ୍ୟ କୌଣସି ବିକଳ୍ପ ନ ଥିଲେ ସମ୍ବିଧାନର ଅନୁଚ୍ଛେଦ ୩୫୬ ଅନୁସାରେ ରାଜ୍ୟରେ ରାଷ୍ଟ୍ରପତି ଶାସନ ଲାଗୁ କରାଯାଇପାରିବ ବୋଲି ସୁପ୍ରିମକୋର୍ଟ ମଧ୍ୟ କହିଛନ୍ତି। ଦିଲ୍ଲୀରେ ଯଦି ଆଜି ରାଷ୍ଟ୍ରପତି ଶାସନ ଜାରି କରାଯାଏ, ତେବେ ଏହା ପଛରେ ରାଜନୈତିକ ପ୍ରତିଶୋଧମୂଳକ ମନୋଭାବ ରହିଛି ବୋଲି ଧରାଯିବ। ସବୁଠି ବିରୋଧୀ ଦଳଗୁଡ଼ିକର ସରକାର ଭାଙ୍ଗିବା ପାଇଁ ଏହା କେନ୍ଦ୍ରର ସରଳ ସୂତ୍ର। କେନ୍ଦ୍ର ସରକାରଙ୍କ ହାତରେ ଇଡି ଅଛି। ସେମାନଙ୍କୁ କୌଣସି ପ୍ରମାଣ ଦରକାର ନାହିଁ। ପିଏମ୍ଏଲ୍ଏ ଅଧୀନରେ ଗିରଫ ହେଲେ ନେତାଙ୍କୁ ଜାମିନ ମିଳୁନାହିଁ। ତେଣୁ ସମସ୍ତ ବିରୋଧୀ ମୁଖ୍ୟମନ୍ତ୍ରୀ ଏହି ଆଇନ ବଳରେ ଗିରଫ ହେବେ। ତା’ ପରେ କେନ୍ଦ୍ର କହିବ, ଇସ୍ତଫା ଦିଅ, ନଚେତ୍ ଆମେ ରାଷ୍ଟ୍ରପତି ଶାସନ ଜାରି କରିବୁ। ଅବକାରୀ ନୀତି ମାମଲାରେ ନିରପେକ୍ଷ ତଦନ୍ତ କରାଯାଇଥିଲେ ଭାଜପା ଅଭିଯୁକ୍ତ ଭାବେ ହୋଇଥାନ୍ତା। ଏପରି ହୋଇଥିଲେ କେଜ୍ରିଓ୍ବାଲଙ୍କ ପରିବର୍ତ୍ତେ ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜେ.ପି. ନଡ୍ଡା ଜେଲରେ ଥାଆନ୍ତେ ବୋଲି ଆତିଶୀ କହିଛନ୍ତି। ପ୍ରକାଶ ଯେ, ଇଡି ରିମାଣ୍ଡ୍ରେ ଥିବା କେଜ୍ରିଓ୍ବାଲ ଇସ୍ତଫା ଦେବେନାହିଁ, ବରଂ ସେ ଜେଲରୁ ସରକାର ଚଳାଇବେ ବୋଲି ଆପ୍ ନେତାମାନେ ଅନେକ ଥର ସ୍ପଷ୍ଟ କରିସାରିଛନ୍ତି।