ଭୁବନେଶ୍ୱର, ୫ା୨(କ୍ରୀଡ଼ା ପ୍ରତିନିଧି)-କଶ୍ମୀରର ଗୁଲମାର୍ଗଠାରେ ୭ମ ଜାତୀୟ ଆଇସ୍ଷ୍ଟକ୍ କ୍ରୀଡ଼ା ପ୍ରତିଯୋଗିତା ଅନୁଷ୍ଠିତ ହୋଇଯାଇଛି। ଏଥିରେ ୨୫ ରାଜ୍ୟରୁ ୩୦୦ ପ୍ରତିଯୋଗୀ ଅଂଶଗ୍ରହଣ କରିଥିଲେ। ଆଇସ୍ଷ୍ଟକ୍ ସ୍ପୋଟର୍ସ ଆସୋସିଏଶନ ଅଫ୍ ଓଡ଼ିଶା ପକ୍ଷରୁ ୫ ପ୍ରତିଯୋଗୀଙ୍କୁ ମିଶାଇ ମୋଟ ୭ ଜଣ ଏଥିରେ ଭାଗ ନେଇଥିଲେ। ସେମାନଙ୍କ ମଧ୍ୟରୁ ସବ୍ଜୁନିୟର କାଟେଗୋରିରେ ୨ ଜଣ ବ୍ରୋଞ୍ଜ ପଦକ ହାସଲ କରି ରାଜ୍ୟକୁ ଗର୍ବିତ କରିଛନ୍ତି। ଏହି ଦୁଇ ଖେଳାଳି ହେଲେ କୁନାଲ ବେହେରା ଓ ଅନୁଜ ଚୌଧୁରୀ। ଏହା ବ୍ୟତୀତ ଓଡ଼ିଶାର ୪ ଖେଳାଳି ଦ୍ୱିତୀୟ ଖେଲୋ ଇଣ୍ଡିଆ ନ୍ୟାଶନାଲ ଓ୍ବିଣ୍ଟର ଗେମ୍ସ ପାଇଁ ମନୋନୀତ ହୋଇଛନ୍ତି। ସେମାନେ ହେଲେ ଚନ୍ଦନ ମାହାନା, ଅରବିନ୍ଦ ପାଢ଼ୀ, ସ୍ବରାଜ ମହାପାତ୍ର ଓ ସୋନୁ ସୋମଲିୟା। ଏମାନଙ୍କ ମଧ୍ୟରୁ ଚନ୍ଦନ, ଅରବିନ୍ଦ ଓ ସ୍ବରାଜ ଗୁଲମାର୍ଗ ଟୁର୍ନାମେଣ୍ଟରେ ସିନିୟର କାଟେଗୋରିରେ ଭାଗନେଇ ପଦକ ପାଇ ନ ଥିଲେ। ମାତ୍ର ପ୍ରଦର୍ଶନ ଭିତ୍ତିରେ ସେମାନଙ୍କ ଚୟନ କରାଯାଇଛି। ସୋନୁ ସୋମଲିୟା ପ୍ରଥମ ଖେଲୋ ଇଣ୍ଡିଆ ଗେମ୍ସରେ ଭାଗ ନେଇଥିଲେ। ତେଣୁ ସେ ମଧ୍ୟ ସ୍ବତଃ ଚୟନ ହୋଇଛନ୍ତି। ଓଡ଼ିଶା ଦଳ ପ୍ରତ୍ୟାବର୍ତ୍ତନ କରିବା ପରେ ଝାରସୁଗୁଡ଼ା ରେଲଓ୍ବେ ଷ୍ଟେଶନରେ ସେମାନଙ୍କୁ ସ୍ବାଗତ ସମ୍ବର୍ଦ୍ଧନା ଦିଆଯାଇଥିଲା। ଏହି ଅବସରରେ ଆସୋସିଏଶନ ପକ୍ଷରୁ ଅରବିନ୍ଦ ବାରିକ, ପ୍ରେମ୍ ସିଂ ଥାପ୍ପା, ରବୀନ୍ଦ୍ର ଚୌଧୁରୀ, ଅମ୍ବିକା ନାଥ ପ୍ରମୁଖ ଉପସ୍ଥିତ ଥିଲେ। ଓଡ଼ିଶା ଦଳର କୋଚ୍ ଥିଲେ ଆଶୁତୋଷ ନାୟକ ଓ ମ୍ୟାନେଜର ଭବାନୀ କୁମାର ସାହୁ।